Read სბს–2013 ეზეკიელი 14 Bible Online

ეზეკიელი 14 - სბს–2013 bible

ეზეკიელი 14

¹მოვიდა ჩემთან რამდენიმე კაცი ისრაელის უხუცესთაგან და ჩემს წინ დაჯდა.

²და იყო სიტყვა უფლისა ჩემდამი თქმული:

³ადამის ძევ! ამ ხალხმა გული გაუღო თავის კერპებს და თავისი უკეთურება დაბრკოლებად დაიდო წინ. განა დავუშვებ, რომ მე მათ რჩევას მოვუსმინო?

⁴ამიტომ ილაპარაკე მათთან და უთხარი: ასე ამბობს-თქო უფალი ღმერთი: ყოველი კაცი ისრაელის სახლიდან, რომელიც გულს გაუღებს თავის კერპებს და თავის უკეთურებას დაბრკოლებად დაიდებს წინ და მივა წინასწარმეტყველთან, მე, უფალი, როგორ მივაგებ მას პასუხს, როცა მოდის თავისი მრავალი კერპებით?

⁵დაე მიხვდეს ისრაელის სახლი თავის გულში, რომ უცხონი გახდნენ ჩემთვის ყველანი თავიანთი კერპების გამო.

⁶ამიტომ უთხარი ისრაელის სახლს: ასე თქვა-თქო უფალმა ღმერთმა: დაბრუნდით და მოიქეცით თქვენი კერპებისაგან და ყველა თქვენი სისაძაგლისაგან მოაბრუნეთ თქვენი პირი,

⁷რადგან ყოველი კაცი ისრაელის სახლიდან და მწირთაგან, რომელიც იცხოვრებს ისრაელში, და რომელიც უცხო გახდება ჩემთვის, და თავის კერპებს გაუღებს გულს და თავის უკეთურებას დაბრკოლებად დაიდებს წინ, და მივა წინასწარმეტყველთან და შეეკითხება ჩემზე, განა მე, თავად უფალი, მივაგებ მას პასუხს?

⁸და მივაქცევ ჩემს პირს იმ კაცის წინააღმდეგ, ნიშნად და იგავად დავდებ მას და მოვსპობ ჩემი ერიდან, და მიხვდებით, რომ მე ვარ უფალი.

⁹და ეს წინასწარმეტყველი თუ ცდუნდება და ალაპარაკდება, თითქოს მე, უფალმა, ვაცდუნე ის წინასწარმეტყველი, ხელს მოვუღერებ მას და მოვსპობ ჩემი ერიდან, ისრაელიდან.

¹⁰და ორივე იტვირთავს თავის დანაშაულს და როგორიცაა დანაშაული შემკითხველისა, ისეთივე იქნება დანაშაული წინასწარმეტყველისა,

¹¹რათა მეტად აღარ განმიდგეს მე სახლი ისრაელისა და მეტად აღარ შეიბილწოს ყოველი თავისი დანაშაულით, არამედ ისინი იქნებიან ჩემი ერი და მე ვიქნები მათი ღმერთი! – ამბობს უფალი ღმერთი.

¹²და იყო უფლის სიტყვა ჩემდამი თქმული:

¹³ადამის ძევ! თუ ქვეყანა შესცოდავს ჩემს წინაშე და ღალატით განმიდგება, მე ხელს მოვუღერებ მას და შევუმუსრავ პურის ბეღლებს, და მოვუვლენ მას შიმშილს და მოვკვეთ მისგან კაცსა და პირუტყვს;

¹⁴და რომ იქ აღმოჩნდეს სამი კაცი: ნოე, დანიელი და იობი, ისინი თავიანთი სიმართლით გადარჩებიან! – ამბობს უფალი ღმერთი. –

¹⁵ანდა, მძვინვარე მხეცები რომ მიმეშვა იმ ქვეყანაზე, ამოძირკვავდნენ ხალხსა და უდაბნოდ აქცევდნენ იქაურობას, და ვერავინ გაბედავდა იქ გავლას იმ მხეცების შიშით,

¹⁶ის სამი კაცი იქ რომ ყოფილიყო, ცოცხალი ვარ მე! – ამბობს უფალი ღმერთი, – ვერც ძეთ და ვერც ასულთ ვერ გადაარჩენდა, მხოლოდ ისინი გადარჩებოდნენ, ის ქვეყანა კი უდაბნოდ იქცეოდა.

¹⁷ან თუ მახვილს მოვუვლენდი იმ ქვეყანას და ვიტყვი: მახვილმა დაიაროს ამ ქვეყანაში და მოკვეთოს მისგან კაცი და პირუტყვი,

¹⁸ის სამი კაციც, ცოცხალი ვარ მე! – ამბობს უფალი ღმერთი, – ვერ გადაარჩენდა ძეთა და ასულთ, მხოლოდ ისინი გადარჩებოდნენ.

¹⁹ან თუ შავ ჭირს მოვუვლენდი იმ ქვეყანას და დავანთხევდი მასზე ჩემს რისხვას სისხლისღვრით კაცისა და პირუტყვის ამოსაწყვეტად.

²⁰ნოე, დანიელი და იობიც რომ ყოფილიყვნენ იქ, ცოცხალი ვარ მე, – ამბობს უფალი ღმერთი, – ვერც ძეს და ვერც ასულს ვერ გადაარჩენენ. ისინი თავიანთი სიმართლით გადაარჩენენ მხოლოდ თავიანთ სულებს.

²¹რადგან ასე ამბობს უფალი ღმერთი: ჩემი ოთხი მძიმე სასჯელიც რომ მოვუვლინო: მახვილი, შიმშილი, მძვინვარე მხეცი და შავი ჭირი იერუსალიმს კაცისა და პირუტყვის აღმოსაკვეთად,

²²აჰა, დარჩება მასში ნატამალი – ძენი და ასულნი, რომელნიც გამოყვანილ იქნებიან იქიდან. აჰა, გამოვლენ ისინი თქვენთან და დაინახავთ მათ გზასა და მათ საქციელს, და დაგავიწყდებათ უბედურება, რაც მე მოვაწიე იერუსალიმს, ყველაფერი, რაც მე მოვაწიე მას.

²³და განუგეშებენ, როცა დაინახავთ მათ საქმეებსა და მათ საქციელს და მიხვდებით, რომ ამაოდ არ გამიკეთებია ყოველივე, რაც იქ გავაკეთე, – ამბობს უფალი ღმერთი.