Read სბს–2013 ეზეკიელი 19 Bible Online

ეზეკიელი 19 - სბს–2013 bible

ეზეკიელი 19

¹შენ კი გოდება იწყე ისრაელის მთავრებზე

²და თქვი: ძუ ლომი იყო დედაშენი! ლომებს შორის იწვა, ლომის ბოკვერებთან ერთად ზრდიდა თავის ბოკვრებს.

³და გამოზარდა ერთი თავის ბოკვერთაგან, ლომი გახდა და ისწავლა ნადავლის ტაცება – ადამიანებს ჭამდა.

⁴და ესმათ მისი ამბავი ხალხებს; ორმოში შეიპყრეს ის და ჭიმით ჩაიყვანეს ეგვიპტეში.

⁵და ნახა ძუ ლომმა, რომ ამაოდ ელოდა, რომ დაიკარგა მისი იმედი, და აიყვანა ერთი სხვა თავის ლეკვთაგანი და ბოკვრად დააწესა.

⁶და ცხოვრობდა ის ლომებში, გაიზარდა და ისწავლა ნადავლის ტაცება – ადამიანებს ჭამდა.

⁷და ანგრევდა მათ სიმაგრეებს და მათ ქალაქებს აოხრებდა; და შეძრწუნდა ქვეყანა მისი ღრიალის ხმაზე.

⁸და აღდგნენ მასზე ხალხები შემოგარენთაგან, ბადე ესროლეს და შეიპყრეს ორმოში.

⁹და ჩასვეს გალიაკში ჭიმით და მიიყვანეს ბაბილონის მეფესთან და შეაყენეს საპყრობილეში, რათა აღარ გაისმას მისი ღრიალის ხმა ისრაელის მთებში.

¹⁰დედაშენი ვაზს ჰგავდა, წყლის პირას დანერგილ ბროწეულის ყვავილს; ნაყოფიერი და რტომრავალი იყო უხვი წყლებისაგან.

¹¹მაგარი ტოტები ჰქონდა მბრძანებელთა კვერთხებისათვის; გაიზარდა, ღრუბლებამდე აიყარა ტანი – ასე ჩანდა აზიდული და რტომრავალი.

¹²მაგრამ აღმოიფხვრა რისხვით, მიწაზე იქნა დანარცხებული და ხორშაკმა ქარმა გაახმო მისი ნაყოფი. გახმა მისი ძლიერების კვერთხი, ცეცხლმა შეჭამა იგი.

¹³ახლა უდაბნოშია დარგული, გამოწრეტილ და გვალვიან ქვეყანაში.

¹⁴და გამოვარდა ცეცხლი მისი მძლავრი ტოტებიდან, შეჭამა მისი ნაყოფი და აღარ შერჩა მას მაგარი ტოტი ხელმწიფის კვერთხისათვის. ეს არის გოდება და დარჩება გოდებად.