Read სბს–2013 ეზეკიელი 22 Bible Online

ეზეკიელი 22 - სბს–2013 bible

ეზეკიელი 22

¹და იყო სიტყვა უფლისა ჩემდამი თქმული:

²და შენ, ადამის ძევ! გინდა, რომ განსაჯო ამ მკვლელთა ქალაქი? გამოუცხადე მას მთელი მისი სისაძაგლე

³და უთხარი: ასე ამბობს-თქო უფალი ღმერთი: ოჰ, ქალაქო, შენს კედლებში მართალთა სისხლი რომ დაათხიე, შენს განსაკითხად, და კერპებს რომ აკეთებდი, შენს შესაბილწად!

⁴იმ სისხლით, რომელიც დაღვარე, დადანაშაულდი და შენი კერპებით, რომლებიც გააკეთე, შეიბილწე. და მოიახლოვე შენი აღსასრულის დღეები და მიილია შენი წლები. ამის გამო წარმართთა საგინებლად გაქცევ და მთელი ქვეყნის სამასხროდ.

⁵ახლობელნი და შორეულნი დაგცინებენ შენ, უწმიდურო და მრავალი ურჯულოებით სავსევ!

⁶აჰა, ისრაელის მთავარნი, თითოეული ძალას იკრებდა, რათა სისხლი დაეთხია შენში.

⁷მამას და დედას ამცირებენ თქვენში, მწირს უპატიოდ ექცევიან, ქვრივ-ობლებს ჩაგრავენ.

⁸ჩემს სიწმიდეებს აბუჩად იგდებ და ჩემს შაბათებს არღვევ;

⁹ცილისმწამებელნი არიან შენში, რომლებიც სისხლს ღვრიან; სამსხვერპლო მალობებზე ჭამენ ნაზორევს; გარყვნილებას ეწევიან შენში.

¹⁰მამის სიშიშვლეს აჩენენ თქვენში, წიდოვან ქალზე ძალადობენ,

¹¹ერთი თავისი მოყვასის ცოლთან სჩადის სისაძაგლეს, მეორე თავის რძალს ბილწავს, და სხვა – თავის დას, თავისი მამის ასულს, ხდის ნამუსს.

¹²ქრთამებს იღებენ თქვენში, რათა სისხლი დაღვარონ; ვახშსა და სარგებელს იღებენ და ძალადობით ყვლეფ შენს მოყვასს, მე კი დამივიწყე! – ამბობს უფალი ღმერთი. –

¹³და, აჰა, მე ხელი ხელს შემოვკარი შენი ანგარების გამო, რაც აკეთებ, და შენგან დაღვრილი სისხლისღვრის გამო, რაც თქვენში ხდება.

¹⁴თუ დამიდგება შენი გული, ან თუ შერჩება ძალა შენს ხელებს იმ დღეებში, როცა აღვიძვრები შენს წინააღმდეგ? მე, უფალი, ვამბობ ამას და გავაკეთებ.

¹⁵და მე გაგფანტავ შენ წარმართთა შორის, და მიმოგაბნევ სხვადასხვა ქვეყნებში, რათა ბოლო მოვუღო შენს სისაძაგლეს.

¹⁶და შეიბღალები წარმართთა თვალწინ და მიხვდები, რომ მე ვარ უფალი!

¹⁷და იყო სიტყვა უფლისა ჩემს მიმართ ნათქვამი:

¹⁸ადამის ძევ! ისრაელის სახლი ჩემთვის წიდას დაემსგავსა; ყველა ისინი, როგორც სპილენძი, კალა, რკინა და ტყვია ბრძმედში ყრია და ვერცხლის წიდა და ხენჯი არიან.

¹⁹ამიტომ ასე ამბობს უფალი ღმერთი: რადგან თქვენ ყველანი იქეცით წიდად, ამიტომ მე შეგაგროვებთ იერუსალიმში,

²⁰როგორც აგროვებენ ვერცხლს და სპილენძს, რკინას, ტყვიასა და კალას ბრძმედში, რათა შეუნთონ ცეცხლი გამოსადნობად, ასე შეგაგროვებთ ჩემი რისხვითა და წყრომით, და ჩაგყრით და გადაგადნობთ.

²¹შეგკრებთ და გავაღვივებ თქვენზე ჩემი წყრომის ცეცხლს და გადადნებით მასში.

²²როგორც ვერცხლი დნება ბრძმედში, ისე გადადნებით თქვენ და მიხვდებით, რომ მე, უფალმა, გადმოვანთხიე ჩემი რისხვა თქვენზე.

²³და იყო სიტყვა უფლისა ჩემს მიმართ ნათქვამი:

²⁴ადამის ძევ! უთხარი მას: შენა ხარ-თქო გამოგოლვილი მიწა რისხვის დღეს!

²⁵შეთქმულან იქ მისი წინასწარმეტყველნი, ლომებივით ბრდღვინავენ, ნადავლს გლეჯენ და ცოცხლად ჭამენ; საუნჯესა და განძეულს იტაცებენ, ქვრივებს ამრავლებენ იქ.

²⁶მისი მღვდლები ჩემს რჯულს აყალბებენ და ჩემს სიწმიდეებს ბღალავენ; წმიდასა და შებღალულს ერთმანეთისაგან ვერ არჩევენ და შებილწულსა და განწმედილს არ აცხადებენ; ჩემს შაბათებს თვალს არიდებენ, და მე შევილახე მათ გარემოში.

²⁷მისი მთავრები მგლებს ჰგვანან, ნადავლს რომ იტაცებენ; სისხლს ღვრიან; სიცოცხლეს უსწრაფებენ ადამიანებს თავიანთი გამდიდრებისათვის.

²⁸მისი წინასწარმეტყველნი თვალში ნაცარს აყრიან მათ ამაო ხილვებით და ცრუმისნობით სიცრუეს ეუბნებიან: ასე ამბობსო უფალი ღმერთი, უფალს კი არ უთქვამს.

²⁹ამ ქვეყნის ერი ერთმანეთზე ძალადობს, ძარცვავს ღარიბსა და ღატაკს, მწირს ავიწროვებს უსამართლოდ.

³⁰და მე ვეძიე მათში კაცი, რომელიც აღადგენდა ზღუდეს და ჩემს წინაშე დადგებოდა ნანგრევებთან ამ ქვეყნის გადასარჩენად, რათა არ დამეღუპა იგი, მაგრამ ვერ ვიპოვე.

³¹ამიტომ გადმოვანთხევ მათზე ჩემს რისხვას, ჩემი მძვინვარების ცეცხლით გავწყვეტ მათ და მათს ნამოქმედარს მათსავე თავზე მოვაქცევ, – ამბობს უფალი ღმერთი.