Read სბს–2013 ეზეკიელი 26 Bible Online

ეზეკიელი 26 - სბს–2013 bible

ეზეკიელი 26

¹მეთერთმეტე წლის პირველი თვის პირველ დღეს იყო სიტყვა უფლისა ჩემდამი თქმული:

²ადამის ძევ! იმის გამო, რომ ცორი ამბობს იერუსალიმზე: აჰა! ვაშა! შემუსრულია ის – კარიბჭე ხალხთა; ის ჩემსკენ მოიქცევა და ავივსები, ის კი გაუკაცრიელდება.

³ამიტომ ასე ამბობს უფალი ღმერთი: აჰა, მე ვარ შენს წინააღმდეგ, ცორო, და აღვძრავ შენზე მრავალ ხალხებს, როგორც ზღვა აღძრავს თავის ტალღებს,

⁴და დაანგრევენ ცორის ზღუდეებს და დააქცევენ მის გოდლებს; მიწას ჩამოვრეცხავ და პიტალო კლდეებად ვაქცევ.

⁵ბადეების გასაფენი ადგილი იქნება ის შუაგულ ზღვაში, რადგან მე ვთქვი, – ამბობს უფალი ღმერთი, – და იქნება იგი ხალხების სათარეშოდ.

⁶და ხმელეთზე მყოფი მისი ასულნი მახვილით დაეცემიან. და მიხვდებიან, რომ მე ვარ უფალი.

⁷რადგან ასე ამბობს უფალი ღმერთი: მე მოვიყვან ცორზე ჩრდილოეთიდან ნაბუქოდონოსორს, ბაბილონის მეფეს, მეფეთა მეფეს, ცხენებითა და ეტლებით, მხედრებითა და კრებულით და მრავალი ხალხით.

⁸ხმელეთზე მყოფ შენს ასულებს მახვილით დახოცავს; საალყო კოშკებს მოგადგამს და მიწაყრილს შემოგავლებს გარს; და ფარს აღმართავს შენს წინააღმდეგ.

⁹ტარანებს დადგამს შენს კედლებთან და შენს გოდლებს წერაქვით დაანგრევს.

¹⁰მისი ცხენების კორიანტელი დაგფარავს; მხედრებისა და ეტლების ხმა შეარყევს შენს კედლებს, როდესაც შემოვლენ შენს კარიბჭეებში, როგორც ზღუდეგარღვეულ ქალაქში შედიან.

¹¹მისი ცხენების ფლოქვები გადაჯეგავენ შენს ქუჩებს, შენი ხალხი მახვილით დაეცემა და შენი ძლიერების სვეტები მიწაზე დაემხობა.

¹²გაძარცვავენ შენს დოვლათს, და დაიტაცებენ შენს ნავაჭრს, დაანგრევენ შენს კედლებს, შენს მშვენიერ სახლებს გააცამტვერებენ; შენს ქვასა და ხეს, შენს მიწას წყალს მისცემენ.

¹³დავადუმებ შენი სიმღერების გუგუნს და შენი ქნარების ხმა მიწყდება.

¹⁴შიშველ კლდეებად გაქცევ, ბადეების გასაფენი იქნები და აღარ აშენდები მეტად, რადგან მე, უფალმა, ვთქვი, – ამბობს უფალი ღმერთი.

¹⁵ასე ეუბნება უფალი ღმერთი ცორს: ნუთუ შენი დაცემის ხმისგან, ხოცვა-ჟლეტისას დაჭრილთა კვნესისაგან არ შეირყევიან კუნძულები?

¹⁶ჩამოვლენ თავიანთი ტახტებიდან ზღვის ხალხების ხელმწიფენი და მოიხსნიან მოსასხამებს, და ნაქარგ სამოსელს გაიხდიან, ძრწოლით შეძრწუნებულნი მიწაზე დასხდებიან და კვნესას მოჰყვებიან შენზე.

¹⁷გოდებას დაიწყებენ შენზე და გეტყვიან: როგორ დაიღუპე, ზღვაოსნებით დასახლებულო, განთქმულო ქალაქო, ზღვებზე რომ მძლავრობდით შენცა და შენი მკვიდრნიც, შიშის ზარს რომ სცემდით ყველას!

¹⁸ახლა, შენი დაცემის დღეს, შეძრწუნდებიან კუნძულები; და შეძრწუნდებიან ზღვის კუნძულები, შენი დაცემის გამო.

¹⁹რადგან ასე ამბობს უფალი ღმერთი: როდესაც გაქცევ აოხრებულ ქალაქად, უკაცრიელ ქალაქთა მსგავსად, როდესაც წამოიმართება შენზე უფსკრული და დაგფარავს ბევრი წყლები,

²⁰ჩაგიყვან საფლავად ჩამავლებთან, უწინდელ ხალხთან, და დაგამკვიდრებ ქვესკნელში, მარადიულ უდაბნოში, საფლავში ჩასულებთან, რათა აღარ დასახლდე; და დიდებას მივცემ ცოცხალთა ქვეყანას.

²¹საშინელებად გაქცევ შენ, და აღარ იარსებებ, ძებნას დაგიწყებენ და ვეღარ გიპოვიან საუკუნოდ, – ამბობს უფალი ღმერთი.