Read სბს–2013 ეზეკიელი 27 Bible Online

ეზეკიელი 27 - სბს–2013 bible

ეზეკიელი 27

¹იყო სიტყვა უფლისა ჩემდამი თქმული:

²და შენ, ადამის ძევ! იწყე გოდება ცორზე,

³და უთხარი ცორს, დასახლებულს ზღვის მისადგომებში, მრავალი კუნძულის ხალხებთან მოვაჭრეს: ასე ამბობს-თქო უფალი ღმერთი: ცორო, შენ ამბობ, სრულქმნილი მშვენება ვარო.

⁴ზღვის გულშია შენი საზღვრები; შენმა მშენებლებმა სრულქმნეს შენი მშვენება.

⁵სენირის კვიპაროსებისგან გაგითალეს ყველა ფიცარი, ლიბანიდან კედარი მოზიდეს, რომ გაეკეთებინათ შენთვის ანძები;

⁶ბაშანის მუხის ნიჩბები გაგითალეს; მერხები ქითიმელთა კუნძულების წიფლისაგან გაგიკეთეს და სპილოსძვლით მორთეს;

⁷ეგვიპტური მოქარგული ქსოვილისა იყო შენი იალქნები, რათა გქონოდა დროშად. ელიშას კუნძულებიდან მოტანილი ცისფერი და მეწამული იყო შენი გადასაფარებელი.

⁸ციდონის და არვადის მცხოვრებნი იყვნენ შენი მენიჩბენი; მესაჭეებად შენივე მცოდნე ხალხი გყავდა.

⁹ღებალის უხუცესნი და მისი მცოდნენი გყავდნენ შენი გემების ბზარების შესაკეთებლად; ყველა გემი და ყველა მათი მეზღვაური იყო თქვენში საქონლის გაცვლა-გამოცვლისვის.

¹⁰სპარსელნი, ლუდელნი და ფუტელნი იყვნენ შენი ჯარისკაცნი; ფარსა და მუზარადს შენთან ჰკიდებდნენ; ისინი გიქმნიდნენ დიდებას.

¹¹არვადელები და შენი ლაშქარი ირგვლივ იცავდნენ შენს ზღუდეებს, და გამადელნი გუშაგობდნენ შენს გოდლებზე. თავიანთ კაპარჭებს ჰკიდებდნენ შენს კედლებზე ირგვლივ; ისინი სრულჰყოფდნენ შენს მშვენებას.

¹²თარშიში, შენთან ვაჭრობდა შენი სიმდიდრის გამო; ვერცხლს, რკინას, კალას და ტყვიას სცვლიდა შენს საქონელში.

¹³იავანი, თუბალი და მეშექი ვაჭრობდნენ შენთან ადამიანთა სულადობითა და სპილენძით.

¹⁴თოგარმას სახლიდან საომარ და საფერხე ცხენებს და ჯორებს ცვლიდნენ შენს საქონელში.

¹⁵დედანელები ვაჭრობდნენ შენთან. მრავალი კუნძული გიცვლიდა საქონელს; სპილოსძვალსა და ებანოზს გთავაზობდნენ.

¹⁶არამელნი ვაჭრობდნენ შენთან შენი დიდძალი ნახელავის გამო; ზურმუხტს, ძოწეულს და ნაქარგ ქსოვილს, ბისონს, მარჯანს და ლალს გიცვლიდნენ შენს საქონელში.

¹⁷იუდა და ისრაელი ვაჭრობდა შენთან; მინითის ხორბალსა და ტკბილეულს, თაფლს, ზეთსა და ბალზამს გიცვლიდნენ შენს საქონელში.

¹⁸დამასკო ვაჭრობდა შენთან შენი მრავალი ნახელავის გამო და აურაცხელი დოვლათის გამო, ხელბონის ღვინითა და თეთრი მატყლით.

¹⁹ვედანი და იავანი უზალიდან შენს საქონელში გამოჭედილ რკინას, კასიასა და სურნელოვან ლერწამს გიცვლიდნენ.

²⁰დედანი ვაჭრობდა შენთან ცხენის შატროვნებით.

²¹არაბნი და კედარის ყველა მთავარი გაცვლა-გამოცვლას ეწეოდა შენთან კრავებით, ვერძებითა და ვაცებით.

²²შებასა და რაყმას ვაჭარნი ვაჭრობდნენ შენთან ყოველგვარი საუკეთესო სურნელითა და პატიოსანი ქვებით, და ოქროს გაძლევდნენ შენს საქონელში.

²³ხარანი, ქანე, ყედენი, შებას მოვაჭრენი, აშური და ქილმადი შენთნ ვაჭრებდნენ.

²⁴ისინი ვაჭრობდნენ შენთან ბრწყინვალე ტანსაცმლით, აბრეშუმისა და ნაქარგი ქსოვილებით, რაც მოჰქონდათ შენს ბაზრებში კედარის ძვირფას ყუთებში ჩაწყობილი.

²⁵თარშიშის ხომალდები იყო შენი სავაჭრო ქარავნები, და გამდიდრდი და სახელი გაითქვი მთელს ზღვებზე.

²⁶დიდ წყლებზე გატარეს შენმა ნიჩბოსნებმა; აღმოსავლეთის ქარმა დაგლეწა შენ ზღვების გულში.

²⁷შენი სიმდიდრე და შენი საქონელი, შენი სავაჭრო, შენი მეზღვაურნი და შენი მესაჭენი, შენი ბზარების შემკეთებელნი და შენი საქონლის გამსაღებლები, და ყველა შენი მებრძოლი, და მთელი შენი კრებული, ზღვის გულში ჩაინთქმებიან შენი დაცემის დღეს.

²⁸შენს მესაჭეთა ღრიალით შეირყევიან შემოგარენი.

²⁹და მათი ხომალდებიდან ჩამოვა ყველა ნიჩბოსანი, მეზღვაური, ყველა ზღვის მესაჭე და ხმელეთზე დადგება.

³⁰მაღალი ხმით იყვირებენ შენს გამო, და მწარედ აქვითინდებიან თავზე ნაცარგადაყრილნი და მტვერში დაიწყებენ გორვას.

³¹თავებს გადიპარსავენ, ძაძებს ჩაიცვამენ და იტირებენ შენზე სულგამწარებულნი და მწარე გოდებით.

³²და აამაღლებენ შენზე მჭმუნვარე გოდებას, და ასე ივალალებენ შენზე: ვინ არის, რომ ცორივით დადუმებულიყოს შუაგულ ზღვაში?!

³³როდესაც ზღვებიდან გადიოდა შენი საქონელი, აძღობდი ხალხებს შენი სიმდიდრით, და შენი საქონლით ამდიდრებდი ქვეყნის მეფეებს.

³⁴და ახლა, როცა დაგლეწეს შენ ზღვებმა წყლების ჯურღმულებში, შენი სავაჭრო და მთელი შენი კრებული შთაინთქა.

³⁵კუნძულთა მცხოვრებნი შეძრწუნდნენ შენს გამო, მათი მეფეები შეირყნენ და სახე შეეშალათ.

³⁶სხვა ხალხთა ვაჭრებმა დაგისტვინეს; საშინელებად იქეცი და აღარ იქნები საუკუნოდ.