Read სბს–2013 ეზეკიელი 28 Bible Online

ეზეკიელი 28 - სბს–2013 bible

ეზეკიელი 28

¹და იყო სიტყვა უფლისა ჩემდამი თქმული:

²ადამის ძევ! უთხარი ცორის მთავარს: ასე ამბობს-თქო უფალი ღმერთი: რადგან აღზევდა შენი გული და ამბობდი, მე ვარო ღმერთი, ღმერთის სამკვიდრებელი დავიმკვიდრეო ზღვის გულში, თუმცა ადამიანი ხარ და არა ღმერთი, ღმერთის გულს კი უტოლებ შენს გულს, –

³აჰა, შენ დანიელზე ბრძენი ხარ, არ არსებობს საიდუმლო შენგან დაფარული;

⁴შენი სიბრძნით და შენი გონებით მოიხვეჭე ქონება, ოქრო-ვერცხლით გაავსე შენი საგანძურები,

⁵შენი დიდი სიბრძნით, ვაჭრობით გაამრავლე შენი დოვლათი, და აღზევდა შენი გული შენი დოვლათით.

⁶ამიტომ ასე ამბობს უფალი ღმერთი: რადგან შენი გული ღმერთის გულს გაუტოლე,

⁷ამიტომ, აჰა, მოგისევ უცხოელებს, უსასტიკესთ ხალხთა შორის, და იშიშვლებენ მახვილებს შენი სიბრძნის მშვენების წინააღმდეგ და დააბნელებენ შენს ბრწყინვალებას.

⁸საფლავში ჩაგიყვანენ და ზღვების გულში დახოცილთა სიკვდილით მოკვდები.

⁹განა ეტყვი შენს მკვლელს: მე ღმერთი ვარო, როცა ადამიანი ხარ შენს დამღუპველთა ხელში და არა ღმერთი.

¹⁰წინადაუცვეთელთა სიკვდილით მოკვდები უცხოთა ხელით, რადგან მე ვთქვი, – ამბობს უფალი ღმერთი.

¹¹და იყო სიტყვა უფლისა ჩემდამი თქმული:

¹²ადამის ძევ! იტირე ცორის მეფეზე და უთხარი მას: ასე ამბობს-თქო უფალი ღმერთი: შენ ბეჭედი ხარ სრულყოფილებისა, სიბრძნით სავსე და მშვენებით სრული.

¹³ედემში იმყოფებოდი, ღმერთის ბაღში; შემკული იყო შენი შესამოსელი ყოველგვარი პატიოსანი ქვით: ლალით, ტოპაზით და ალმასით, ქრიზოლითით, ონიქსით, იასპით, საფირონით, ზურმუხტით, ბივრილითა და ოქრო-ქვით; ოქროთი და მარგალიტით იყო გაკეთებული შენი საყურეები, შენი შექმნის დღეს იქნა ისინი დამზადებული.

¹⁴შენ ცხებული ქერუბიმი იყავი, დამცველად დაგადგინე მე; შენ იყავი ღმერთის წმიდა მთაზე, და ცეცხლის ქვებს შორის დადიოდი.

¹⁵უნაკლო იყავი შენს გზაზე შენი შექმნის დღიდან, სანამ არ აღმოჩნდა შენში უსამართლობა.

¹⁶უზომო ნავაჭრმა აავსო შენი შიგნეულობა ძალადობით და შესცოდე; და მე გადაგაგდე ღმერთის მთიდან, როგორც უწმიდური, გაგაძევე, მფარველო ქერუბიმო, ცეცხლის ქვებიდან.

¹⁷აღზევდა შენი გული შენი მშვენების გამო, დაღუპე შენი სიბრძნე შენი ამპარტავნების გამო; ამიტომაც მიწაზე დაგანარცხე, მეფეთა წინაშე დაგსვი გასამასხრებლად.

¹⁸შენი მრავალი ურჯულოებით, შენი ვაჭრობის უსამართლობით შებღალე შენი საწმიდრები; და შენი შუაგულიდან ამოვიღებ ცეცხლს, რომელიც შეგჭამს შენ; და მე გაქცევ ნაცარ-მტვრად მიწაზე ყველა შენი მნახველის თვალწინ.

¹⁹ყველა, ვინც გიცნობს შენ წარმართთა შორის, გაოცებულნი შეგხედავენ; საშინელებად იქცევი და აღარ იქნები უკუნისამდე.

²⁰და იყო სიტყვა უფლისა ჩემდამი თქმული:

²¹ადამის ძევ! პირი ქენი ციდონისაკენ და იწინასწარმეტყველე მასზე.

²²და უთხარი: ასე ამბობს-თქო უფალი ღმერთი: აჰა, შენს წინააღმდეგ ვარ, ციდონო, და განვდიდდები შენს შორის, და მიხვდებიან, რომ მე ვარ უფალი, როდესაც აღვასრულებ მასზე სამართალს და გამოვაცხადებ ჩემს სიწმიდეს მასში;

²³და მოვუვლენ მას შავ ჭირსა და სისხლისღვრას ქუჩებში, და დაეცემიან მასში დახოცილნი მახვილით, ყოველი მხრიდან მათი შემჭმელი; და მიხვდებიან, რომ მე ვარ უფალი.

²⁴და აღარ იქნება ის ისრაელის სახლის მჩხვლეტავი ეკალი და შემაწუხებელი ხიჭვი, მათ შორის, ვინც გარს ახვევია და მისი მოძულენი არიან, და მიხვდებიან, რომ მე ვარ უფალი ღმერთი.

²⁵ასე ამბობს უფალი ღმერთი: როდესაც მე შევკრებ ისრაელის სახლს ხალხებიდან, რომლებშიც არიან გაფანტულნი, და გამოვაცხადებ მათში ჩემს სიწმიდეს წარმართთა თვალწინ, და დასახლდებიან თავიანთ მიწაზე, რომელიც მე მივეცი ჩემს მსახურს, იაკობს;

²⁶და დასახლდებიან მასზე უსაფრთხოდ, და ააშენებენ სახლებს, და ჩაყრიან ვაზს და იცხოვრებენ მშვიდად, როდესაც მე აღვასრულებ სამართალს ყველა მათ მოძულეზე მათ ირგვლივ, მაშინ მიხვდებიან, რომ მე ვარ უფალი, მათი ღმერთი.