Read სბს–2013 ეზეკიელი 29 Bible Online

ეზეკიელი 29 - სბს–2013 bible

ეზეკიელი 29

¹მეათე წელს, მეათე თვის მეთორმეტე დღეს იყო სიტყვა უფლისა ჩემდამი თქმული:

²ადამის ძევ! პირი ქენი ეგვიპტის მეფის, ფარაონის, მიმართ, და იწინასწარმეტყველე მასზე და მთელ ეგვიპტეზე,

³ელაპარაკე და უთხარი: ასე ამბობს-თქო უფალი ღმერთი: აჰა, შენ წინააღმდეგ ვარ, ფარაონო, ეგვიპტის მეფევ, დიდო ურჩხულო, რომელიც გაწოლილხარ შენს მდინარეთა შორის და ამბობ: ჩემია მდინარე და მე წარმოვშვიო იგი ჩემთვის.

⁴მაგრამ მე გაგიყრი ჩანგლებს ყბებში და აგაკრავ შენი მდინარეების თევზებს ქერეჭებზე, და ამოგათრევ შენი მდინარეებიდან და ყველა შენი მდინარის თევზი ქერეჭზე გექნება მიკრული;

⁵და დაგყრით უდაბნოში შენ და შენი მდინარეების თევზებს. ვრცელ ტრამალზე დაეცემი; არავინ აგკრეფთ და არავინ შეგაგროვებთ; ტყის ნადირსა და ცის ფრინველებს მიგცემ საჯიჯგნად.

⁶და გაიგებს ეგვიპტის ყველა მცხოვრები, რომ მე ვარ უფალი; რადგან ეგვიპტელნი ლერწმის საყრდენი იყვნენ ისრაელის სახლისთვის.

⁷როდესაც გიბჯენდნენ, შენ იმსხვრეოდი და მხრებში ესობოდი მათ; და როდესაც გეყრდნობოდნენ, ტყდებოდი და წელს უსერავდი.

⁸ამიტომ ასე ამბობს უფალი ღმერთი: აჰა, მე მომაქვს შენზე მახვილი და მოვსრავ შენს კაცსა და პირუტყვს.

⁹გაპარტახდება და გაუდაბნოვდება ეგვიპტის ქვეყანა, და მიხვდებიან, რომ მე ვარ უფალი, რადგან ის ამბობს: ჩემია მდინარე და მე წარმოვშვიო იგი;

¹⁰ამიტომ, აჰა, შენს წინააღმდეგ ვარ და შენი მდინარეების წინააღმდეგ, და გავხდი ეგვიპტის ქვეყანას უდაბურად, უკაცრიელად, მიგდოლიდან სიენემდე და ქუშის საზღვრამდე.

¹¹არ გაიჭაჭანებს იქ ადამიანის ფეხი და პირუტყვის ჩლიქი არ დაეკარება მას, და არავინ დასახლდება იქ ორმოც წელიწადს.

¹²და უდაბნოდ ვაქცევ ეგვიპტის ქვეყანას უკაცრიელ ქვეყნებს შორის; და მისი ქალაქები უდაბურ ქალაქებს შორის უკაცრიელნი იქნებიან ორმოც წელიწადს. და გავფანტავ ეგვიპტელთ ხალხებში და გავაბნევ ქვეყნებში.

¹³რადგან ასე ამბობს უფალი ღმერთი: 40 წლის ბოლოს შევკრებ ეგვიპტეს იმ ხალხებიდან, რომლებშიც გაიფანტნენ ისინი.

¹⁴და დავაბრუნებ ეგვიპტის ტყვეებს, დავაბრუნებ მათ ფათროსის ქვეყანაში, მათი წარმოშობის ქვეყანაში, და იქნებიან იქ დამდაბლებულ სამეფოდ.

¹⁵სხვა სამეფოებს შორის დამდაბლდება და ვეღარ აღზევდება ხალხებზე; და მე შევამცირებ მას, რათა ვეღარ გაუბატონდეს ხალხებს.

¹⁶და აღარ იქნება ის ისრაელის სახლის საყრდენად, მათი ურჯულოების გამახსენებლად, როდესაც მიმართავდნენ მას. და მიხვდებიან, რომ მე ვარ უფალი ღმერთი.

¹⁷ოცდამეშვიდე წელს, პირველი თვის პირველ დღეს, იყო სიტყვა უფლისა ჩემდამი თქმული:

¹⁸ადამის ძევ! ბაბილონის მეფე ნაბუქოდონოსორმა მოქანცა თავისი ლაშქარი ცორის წინააღმდეგ; ყველა თავი გაქაჩლდა და ყველა ბეჭი გადატყავდა, მაგრამ ვერც მან და ვერც მისმა ლაშქარმა ჯილდო ვერ მიიღო ცორიდან იმ კირთებისათვის, რასაც ირჯებოდა მის წინააღმდეგ.

¹⁹ამიტომ ასე ამბობს უფალი ღმერთი: აჰა, მე ვაძლევ ნაბუქოდონოსორს, ბაბილონის მეფეს, ეგვიპტის ქვეყანას, და წაიღებს ის მის ქონებას, მიიტაცებს მის ნადავლს, და გაძარცვავს მას და ექნება ჯილდო მის ლაშქარს.

²⁰მისი გარჯის ჯილდოდ, რომელიც გასწია მან იქ, ვაძლევ ეგვიპტის ქვეყანას, რადგან ისინი ჩემთვის ირჯებოდნენ, – ამბობს უფალი ღმერთი. –

²¹იმ დღეს დავუბრუნებ რქას ისრაელის სახლს, და გაგიხსნი ბაგეს მათ შორის და მიხვდებიან, რომ მე ვარ უფალი.