Read სბს–2013 ეზეკიელი 30 Bible Online

ეზეკიელი 30 - სბს–2013 bible

ეზეკიელი 30

¹და იყო სიტყვა უფლისა ჩემდამი თქმული:

²ადამის ძევ! იწინასწარმეტყველე და თქვი: ასე ამბობს-თქო უფალი ღმერთი: ივალალეთ, ვაი, უბედურ დღეს!

³რადგან ახლოს არის ის დღე, და ახლოს არის დღე უფლისა, დღე ღრუბლიანი. დგება ხალხების ჟამი!

⁴და მოვა მახვილი ეგვიპტეზე და იქნება ძრწოლა ქუშში, როცა მახვილით დაეცემიან ეგვიპტეში, როცა წაიღებენ მის სიმდიდრეს და დაანგრევენ მის ფუძეებს.

⁵ქუში და ფუტი, ლუდი და მათთან ერთად ყოველნი მწირნი და ქუბი და მათი მეკავშირენი მათთან ერთად დაეცემიან მახვილით.

⁶ასე ამბობს უფალი: დაეცემიან ეგვიპტის მხარდამჭერნი და დამდაბლდება მისი ძლიერების ამპარტავნება. მიგდოლიდან სიენემდე მახვილით დაეცემიან, – ამბობს უფალი ღმერთი.

⁷და მოოხრდება განადგურებულ ქვეყნებს შორის და მისი ქალაქები ნაოხარ ქალაქთა შორის იქნება.

⁸და მიხვდებიან, რომ მე ვარ უფალი, როცა ცეცხლს მივცემ ეგვიპტეს და გაცამტვერდება ყველა მისი შემწე.

⁹იმ დღეს ხომალდებით გავლენ ჩემგან წარგზავნილნი, რათა შეაშინონ უზრუნველი ქუშელნი, და დათესონ მათში საშინელება ეგვიპტის დღეს, რადგან, აჰა, მოდის იგი.

¹⁰ასე ამბობს უფალი ღმერთი: და მე ბოლოს მოვუღებ ეგვიპტელთ ბაბილონის მეფის, ნაბუქოდონოსორის ხელით.

¹¹ის და მისი ხალხი, უსასტიკესნი ხალხთაგან, მოყვანილნი იქნებიან ეგვიპტის ქვეყნის მოსასპობად, და მახვილებს იშიშვლებენ ეგვიპტეზე, და გაავსებენ ქვეყანას განგმირულებით.

¹²და ამოვაშრობ მის მდინარეებს, და ამ ქვეყანას ჩავაგდებ ბოროტეულთა ხელთ, და წარვწყმედ ქვეყანას და მის სისავსეს უცხოთა ხელით. მე, უფალმა, ვთქვი ეს.

¹³ასე ამბობს უფალი ღმერთი: გავანადგურებ კერპებს და აღვგვი ცრუღმერთებს ნოფში, და მბრძანებელი აღარ იქნება ეგვიპტის მიწიდან, და შიშის ზარს დავცემ ეგვიპტის ქვეყანას. დ

¹⁴ა გავაუდაბურებ ფათროსს, ცეცხლს წავუკიდებ ცოყანს, და სასჯელს დავადებ თებეს.

¹⁵და გადმოვღვრი ჩემს რისხვას სინიზე, ეგვიპტის სიმაგრეზე, წარვწყმედ თებელთა სიმრავლეს.

¹⁶და ცეცხლს გავუგზავნი ეგვიპტეს. ძრწოლით აწრიალდება სინი, და დაინგრევა თებე, ნოფს კი მტერი მოადგება დღისით.

¹⁷ჭაბუკნი ონისა და ფი-ბესეთისა მახვილით დაეცემიან და მათ ცოლებს ტყვეობაში წაიყვანენ.

¹⁸თახფანხესში დღე დაბნელდება, როცა დავლეწავ იქ ეგვიპტის უღელს და შეწყდება იქ ამპარტავნება მისი ძლიერებისა. ღრუბელი დაფარავს მას და ტყვეობაში წავლენ მისი ასულნი.

¹⁹სასჯელს დავადებ ეგვიპტეს და მიხვდებიან, რომ მე ვარ უფალი.

²⁰მეთერთმეტე წელს, პირველი თვის მეშვიდე დღეს, იყო სიტყვა უფლისა ჩემს მიმართ ნათქვამი:

²¹ადამის ძევ! მე შევმუსრე მკლავი ფარაონისა, ეგვიპტის მეფისა, და, აჰა, ჯერ კიდევ შეუხვეველია იგი, რომ განკურნებულიყო; არტახებით არ შეუკრავთ, რომ გამაგრებულიყო მახვილის ამოსაწვდელად.

²²ამიტომ ასე ამბობს უფალი ღმერთი: აჰა, ფარაონის, ეგვიპტის მეფის, წინააღმდეგ ვარ და შევმუსრავ მის მკლავებს – მთელსაც და მოტეხილსაც, და გავაგდებინებ მახვილს ხელიდან.

²³და გავფანტავ ეგვიპტელებს ხალხებში და გავაბნევ ქვეყნებში.

²⁴და გავუმაგრებ ბაბილონის მეფეს მკლავებს და მივცემ ჩემს მახვილს ხელში, ფარაონს კი გადავუმსხვრევ მკლავებს, და იკვნესებს სასიკვდილოდ დაჭრილის კვნესით მის წინაშე.

²⁵და გავუმაგრებ ბაბილონის მეფეს მკლავებს და ჩამოუცვივა ფარაონს მკლავები. და მიხვდებიან, რომ მე ვარ უფალი, როცა მივცემ ჩემს მახვილს ბაბილონის მეფეს ხელში და მოუღერებს მას ეგვიპტის ქვეყანას.

²⁶და გავფანტავ ეგვიპტელებს ხალხებში და გავაბნევ მათ ქვეყნებში, და მიხვდებიან, რომ მე ვარ უფალი.