Read სბს–2013 ეზეკიელი 33 Bible Online

ეზეკიელი 33 - სბს–2013 bible

ეზეკიელი 33

¹და იყო სიტყვა უფლისა ჩემდამი თქმული:

²ადამის ძევ! ელაპარაკე შენი ერის ძეთ და უთხარი მათ: თუ აღვმართავ მახვილს რომელიმე ქვეყანაზე და აიყვანს იმ ქვეყნის ხალხი ერთ თავისიან კაცს და დაიყენებს მას გუშაგად,

³და დაინახავს ის მახვილს, აღმართულს ამ ქვეყანაზე, ჩაჰბერავს საყვირს და გააფრთხილებს იმ ერს,

⁴და მომსმენი მოისმენს ბუკის ხმას, მაგრამ არ გაფრთხილდება, – და როცა მოვა მახვილი და წაიყვანს მას, მისი სისხლი მის თავზე იქნება.

⁵ბუკის ხმა მოისმინა მან და არ გაფრთხილდა, მისი სისხლი მასზე იქნება; ხოლო ვინც გაფრთხილდება, გადაირჩენს თავს.

⁶გუშაგი კი, თუ დაინახავს მომავალ მახვილს და არ დასცემს ბუკს და ხალხს არ გააფრთხილებს, მაშინ, როცა მოვა მახვილი და წაართმევს მათგან რომელიმეს სულს, ის მისი ცოდვის გამო იქნება წაყვანილი, მის სისხლს კი გუშაგის ხელიდან მოვიკითხავ.

⁷შენ კი, ადამის ძევ, ისრაელის სახლის გუშაგად დაგაყენე და ჩემი პირიდან მოისმენ სიტყვას და გააფრთხილებ მათ ჩემგან.

⁸როდესაც მე ვეტყვი ბოროტს: ბოროტო! მოკვდები-მეთქი, შენ კი არაფერს ეტყვი ბოროტს, რომ გაფრთხილდეს მისი გზის გამო, ის ბოროტი თავის ურჯულოებაში მოკვდება, მის სისხლს კი შენი ხელიდან მოვიკითხავ.

⁹მაგრამ თუ გააფრთხილე ბოროტი მისი გზის გამო, რომ მოქცეულიყო, მაგრამ არ მოიქცა თავისი გზიდან, ის თავის ურჯულოებაში მოკვდება, შენ კი შენს სულს იხსნი.

¹⁰და შენ, ადამის ძევ! უთხარი ისრაელის სახლს: თქვენ ასე ამბობდით: რაკი ჩვენი დანაშაულებანი და ჩვენი ცოდვანი ჩვენზეა, და ჩვენ მათში ვდნებით, როგორღა ვიცოცხლებთ?

¹¹უთხარი მათ: ცოცხალი ვარ მე! – ამბობს უფალი ღმერთი, – მე არ მსურს ბოროტის სიკვდილი, არამედ ბოროტის მოქცევა მისი გზიდან, რომ იცოცხლოს მან. მოიქეცით, მოიქეცით თქვენი ბოროტი გზებიდან! რატომ უნდა დაიხოცოთ, ისრაელის სახლო?

¹²შენ კი, ადამის ძევ! უთხარი შენი ერის შვილებს: მართალს მისი სიმართლე ვერ იხსნის დანაშაულის დღეს, და ბოროტს ბოროტება ვერ დააბრკოლებს მისი ბოროტებისგან მოქცევისას, და მართალს მისი სიმართლე ვერ გადაარჩენს მისი ცოდვის დღეს.

¹³როდესაც ვეუბნები მართალს: იცოცხლებ-მეთქი, ხოლო მას იმედი აქვს თავისი სიმართლისა და ბოროტებას იქმს, მის სიმართლეს არავინ გაიხსენებს და მისგან ჩადენილი ბოროტებით მოკვდება.

¹⁴და როდესაც ვეუბნები ბოროტმომქმედს: მოკვდები-მეთქი, და ის მოიქცევა ცოდვებისგან და სამართალსა და სიმართლეს იქმს,

¹⁵გირაოს დააბრუნებს წაგლეჯილს ზღავს, სიცოცხლის წესებით ივლის, უსამართლობას აღარ ჩაიდენს, იცოცხლებს და არ მოკვდება.

¹⁶ყველა მის ცოდვას, რაც შესცოდა, აღარ გაუხსენებენ; სამართალსა და სიმართლეს იქმს და იცოცხლებს.

¹⁷მაგრამ ამბობენ ძენი შენი ერისა: უფლის გზა არ არისო სწორი! მაშინ, როცა მათი გზა არ არის სწორი.

¹⁸თუ მართალი თავისი სიმართლისგან მიიქცევა და ჩაიდენს უსამართლობას, მოკვდება.

¹⁹და როდესაც ბოროტი თავისი ბოროტებისგან მოიქცევა და იქმს სამართალსა და სიმართლეს, მათ გამო იცოცხლებს.

²⁰თქვენ კი ამბობთ: უფლის გზა არ არისო სწორი! მაგრამ თითოეულს თავისი გზისამებრ განგსჯით, ისრაელის სახლო.

²¹ჩვენი გადასახლების მეთორმეტე წლის, მეათე თვის მეხუთე დღეს, მოვიდა ჩემთან ერთი გადარჩენილი იერუსალიმიდან და მითხრა: დაიქცაო ქალაქი.

²²უფლის ხელი იყო ჩემზე იმ საღამოს გადარჩენილის მოსვლამდე და უფალმა გამიხსნა ბაგე დილით, მის მოსვლამდე. გამიხსნა ბაგე და აღარ დავდუმებულვარ.

²³იყო სიტყვა უფლისა ჩემდამი თქმული:

²⁴ადამის ძევ! ისრაელის ამ მოოხრებულ მიწაზე მცხოვრებნი ასე ამბობენ: ერთი იყოო აბრაამი და დაიმკვირდა ეს ქვეყანა, ჩვენ კი ბევრნი ვართ. ჩვენ მოგვეცაო ეს ქვეყანა დასამკვიდრებლად.

²⁵ამიტომ უთხარი მათ: ასე ამბობს-თქო უფალი ღმერთი: სისხლითურთ ჭამთ და თვალი კერპებისაკენ გაქვთ მიპყრობილი, და სისხლს ღვრით; და ეს ქვეყანა გინდათ დაიმკვიდროთ?

²⁶თქვენი მახვილის იმედით ხართ, სისაძაგლეს შვრებით, ერთმანეთის ცოლებს ბილწავთ და ამ ქვეყნის დამკვიდრება გსურთ?

²⁷ასე უთხარი მათ: ასე ამბობს-თქო უფალი ღმერთი: ცოცხალი ვარ მე! თუ ისინი, ვინც ნაოხარებში არიან, მახვილით არ დაეცნენ; და ისინი, ვინც გაშლილ ველზე არიან, თუ მხეცებს არ მივცე შესაჭმელად; და ვინც ციხესიმაგრეებში და გამოქვებულებში სხედან, თუ შავი ჭირით არ დაიხოცნენ.

²⁸და უდაბნოდ და უდაბურად ვაქცევ ამ ქვეყანას, და შეწყდება მისი ამპარტავნული ძლიერება და გაუკაცრიელდება ისრაელის მთები და აღარ იქნება მასზე ფეხის დამკარებელი.

²⁹და მიხვდებიან, რომ მე ვარ უფალი, როდესაც უდაბნოდ და უდაბურად ვაქცევ ამ ქვეყანას მათი ყველა სისაძაგლის გამო, რაც ჩაიდინეს.

³⁰და შენ, ადამის ძევ! ძენი შენი ერისა შენზე ლაპარაკობენ კედლებთან და სახლების შესასვლელებთან და ეუბნებიან ერთიმეორეს, თითოეული თავის ძმას: მოდით და მოისმინეთ სიტყვა, რომელიც გამოვიდაო უფლისაგან.

³¹და მოდიან შენთან, როგორც სახალხო შეკრებაზე, და სხდება შენს წინ ჩემი ერი და ისმენენ შენს სიტყვებს, მაგრამ არ ასრულებენ მას, რადგან სალაღობოდ აქცევენ მათ თავიანთი ბაგეებით, ანგარებისკენ მიუწევთ გული.

³²აჰა, სალაღობო გასართობი მომღერალი ხარ მათთვის ლამაზხმიანი და კარგი დამკვრელი. ისმენენ შენს ნათქვამს, მაგრამ არ ასრულებენ მას.

³³მაგრამ როცა აღსრულდება, – და, აჰა, ახდა კიდეც, – მიხვდებიან, რომ წინასწარმეტყველი იყო მათ შორის.