Read სბს–2013 ეზეკიელი 34 Bible Online

ეზეკიელი 34 - სბს–2013 bible

ეზეკიელი 34

¹და იყო სიტყვა უფლისა ჩემდამი თქმული:

²ადამის ძევ! იწინასწარმეტყველე ისრაელის მწყემსებზე, იწინასწამეტყველე და უთხარი მათ: ასე ამბობს-თქო უფალი ღმერთი: ვაი ისრაელის მწყემსებს, რომელნიც საკუთარ თავს მწყემსავენ! განა მწყემსები ცხვარს არ უნდა მწყემსავდნენ?

³ლურთებს თქვენა ჭამთ, მატყლით იმოსებით და ნასუქალ ცხვარს იკლავთ, ცხვრის ფარას კი არა მწყემსავთ.

⁴დავარდნილებს არ უვლით და ავადმყოფებს არ კურნავთ, ნაჭრილობევს არ უხვევთ და გზააბნეულს არ აბრუნებთ, დაკარგულს არ ეძებთ, უხინჯოებს კი ძალადობითა და სისასტიკით იურვებთ.

⁵და გაიფანტა უმწყემსოდ დარჩენილი ჩემი ფარა და გახდა ველის ნადირთა ლუკმა.

⁶გზააბნეულია ჩემი ცხვარი ყველა მთაზე და ყველა გორაკზე, და მთელს ქვეყანაზე გაიბნა ჩემი ფარა და არ არის მომკითხავი და არც მომძებნი.

⁷ამიტომ, მწყემსებო, ისმინეთ სიტყვა უფლისა:

⁸ცოცხალი ვარ მე! – ამბობს უფალი ღმერთი, – რაკი ჩემი ცხვარი იყო გასაძარცვავად და ველის ყველა ნადირის ლუკმად ქცეული უმწყემსობის გამო, და არ მოიკითხეს მწყემსებმა ჩემი ცხვარი, და მწყემსეს მათ თავისი თავი და ჩემი ცხვარი არა მწყემსეს, –

⁹ამიტომ, მწყემსებო, ისმინეთ სიტყვა უფლისა.

¹⁰ასე ამბობს უფალი ღმერთი: აჰა, მე მწყემსებთანა მაქვს საქმე, და მათ მოვკითხავ ჩემს ცხვრებს, და აღარ დავანებებ მათ ცხვრის მწყემსვას, და ვეღარც დამწყემსავენ ისინი თავის თავს; და ვიხსნი ჩემს ცხვრებს მათი პირიდან და აღარ გახდებიან მათი კერძი.

¹¹რადგან ასე ამბობს უფალი ღმერთი: თავად მე მოვიკითხავ ჩემს ცხვარს და მე მოვძებნი.

¹²როგორც მწყემსი ეძებს თავის ცხვარს, როცა თავის გაფანტულ ფარაში ჩადგება, მეც ისე მოვძებნი ჩემს ცხვარს და დავიხსნი ყველა იმ ადგილიდან, სადაც კი გაიფანტნენ ნისლიან და ღრუბლიან დღეს.

¹³და გამოვიყვან მათ ყველა ხალხებიდან და შევაგროვებ ყველა ქვეყნებიდან და მოვიყვან თავიანთ მიწაზე, და დავმწყემსავ მათ ისრაელის მთებზე და წყლის ნაკადებთან, და ამ ქვეყნის ყველა დასახლებულ ადგილას.

¹⁴კარგ სამწყემსურში დავმწყემსავ მათ და ისრაელის მაღალ მთებში იქნება მათი საძოვარი. იქ დაეყრებიან კარგ ფარეხებში და ისრაელის მთების ნოყიერ საძოვრებზე იბალახებენ.

¹⁵მე თავად დავმწყემსავ ჩემს ცხვარს და დავასვენებ მათ, – ამბობს უფალი ღმერთი.

¹⁶დაკარგულს მოვიკითხავ და გაბნეულს დავაბრუნებ, მოტეხილს შევუხვევ და დაცემულს მოვაძლიერებ, ჩასუქებულებს და გაჯიქებულებს გავანადგურებ. სამართლიანად დავმწყემსავ მათ.

¹⁷თქვენზე კი, ჩემო ცხვრებო, – ამბობს უფალი ღმერთი, – მე ვიქნები მსაჯული ცხვარსა და ცხვარს შუა, ვერძებსა და ვაცებს შუა.

¹⁸ის არა გყოფნით, რომ საუკეთესო საძოვარზე დაბალახობთ? რომ რაც ვერ გაძოვეთ, იმას ფეხით თელავთ? ანკარა წყალს რომ სვამთ? დარჩენილს რატომღა ამღვრევთ ფეხით?

¹⁹ჩემმა ცხვრებმა თქვენი ფეხით გათელილი უნდა ძოვონ და თქვენი ფეხით ამღვრეული უნდა სვან?

²⁰ამიტომ ასე ეუბნება მათ უფალი ღმერთი: აჰა, მე თვითონ განვსჯი მსუქან ცხვარსა და მჭლე ცხვარს შორის.

²¹რადგან ფერდისა და მხრის კვრით და რქების რქენით ერეკებით ყველა სუსტს გარეთ, –

²²მე ვიხსნი ჩემს ცხვრებს, და აღარ იქნებიან ისინი დასატაცებლად, და განვსჯი ცხვარსა და ცხვარს შუა.

²³და დავუყენებ მათ ერთ მწყემსს, ჩემს მსახურს, დავითს, და ის დამწყემსავს მათ, და ის იქნება მათი მწყემსი.

²⁴და მე, უფალი, ვიქნები მათი ღმერთი და ჩემი მსახური, დავითი, მათი მთავარი იქნება. მე, უფალმა, ვთქვი ეს.

²⁵და მე დავდებ მათთან მშვიდობის აღთქმას და მოვსპობ მძვინვარე მხეცებს ამ ქვეყნიდან, რომ ისინი უდაბნოში უსაფრთხოდ დაემკვიდრნენ და ტყეებში მშვიდად იძინონ.

²⁶და მე ვაკურთხებ მათ და ჩემი ბორცვის შემოგარენს, და დავუშვებ წვიმას თავის დროზე; და ის იქნება კურთხეული წვიმები.

²⁷და ველის ხეები გამოისხამენ ნაყოფს და მიწა გამოიღებს მოსავალს; და იქნებიან ისინი თავის მიწაზე უსაფრთხოდ და მიხვდებიან, რომ მე ვარ უფალი, როცა დავწყვეტ მათი უღლის აპეურებს და ვიხსნი მათი დამმონებლების ხელიდან.

²⁸და აღარ იქნებიან ხალხების ნადავლად, და ქვეყნის მხეცები არ დაჭამენ მათ; იცხოვრებენ უსაფრთხოდ და ვეღარავინ შეაშინებს მათი.

²⁹და აღმოვუცენებ მათ დიდებულ ნერგს, და აღარ დაიხოცებიან შიმშილით ამ ქვეყანაში და აღარ დაითმენენ წარმართთაგან შეურაცხყოფას.

³⁰და მიხვდებიან, რომ მე, მათი უფალი ღმერთი, მათთან ვარ, ისინი კი, სახლი ისრაელისა, ჩემი ხალხია, – ამბობს უფალი ღმერთი, –

³¹და რომ, თქვენ ხართ ჩემი ცხვრები, ჩემი სამწყსოს ცხვრები; თქვენ ადამიანები ხართ, მე კი თქვენი ღმერთი, – ამბობს უფალი ღმერთი.