Read სბს–2013 ეზეკიელი 35 Bible Online

ეზეკიელი 35 - სბს–2013 bible

ეზეკიელი 35

¹და იყო სიტყვა უფლისა ჩემდამი თქმული:

²ადამის ძევ! სეყირის მთისკენ ქენი პირი და იწინასწარმეტყველე მასზე.

³და უთხარი მას: ასე ამბობს-თქო უფალი ღმერთი: აჰა, შენს წინააღმდეგ ვარ, სეყირის მთაო, ხელს მოგიღერებ და გაქცევ ოხრად და ტიალად.

⁴შენს ქალაქებს ნანგრევებად ვაქცევ და შენც გატიალდები და მიხვდები, რომ მე ვარ უფალი.

⁵რაკი საუკუნოდ დაემტერე ისრაელიანთ და მახვილს მიუგდე ისინი მათი გასაჭირის ჟამს, უკანასკნელი დაღუპვის ჟამს,

⁶ამიტომ, ცოცხალი ვარ მე, – ამბობს უფალი ღმერთი, – სისხლად გაგცევ და სისხლი დაგიწყებს დევნას; და რაკი სისხლი არ გძულდა, სისხლი დაგიწყებს დევნას.

⁷ოხრად და ტიალად ვაქცევ სეყირის მთას, და გამვლელ-გამომვლელის ფეხს ამოვკვეთ იქ.

⁸და გავავსებ მის ბორცვებს განგმირულებით. მახვილით განგმირულები დაეცემიან შენს ბორცვებსა და ხევებში, და შენს ღრანტეებში.

⁹საუკუნოდ აგაოხრებ და შენი ქალაქები აღარ დასახლდებიან, და მიხვდებით, რომ მე ვარ უფალი.

¹⁰რაკი ამბობდი, ჩემი იქნებაო ეს ორი ხალხი და ეს ორი ქვეყანა, და ჩვენ დავიმკვიდრებთო მათ, თუმცაღა უფალი იქ იყო.

¹¹ამიტომ, ცოცხალი ვარ მე! – ამბობს უფალი ღმერთი, – თუ არ მოგექცე შენი რისხვისამებრ და შენი შურისამებრ, როგორც მოექეცი მათ შენი სიძულვილით, და გამოვცხადდები მათში, როცა სასჯელს გამოგიტან.

¹²და მიხვდები, რომ მე, უფალმა, მოვისმინე ყველა შენი ლანძღვა, რომელიც წარმოსთქვი ისრაელის მთების მიმართ: აოხრდნენ, ჩვენ მოგვეცაო შესაჭმელად.

¹³ენით მედიდგულებოდით და მრავალსიტყვაობდით ჩემს წინააღმდეგ; ჩემი ყურით მესმოდა.

¹⁴ასე ამბობს უფალი ღმერთი: როცა მთელი ქვეყანა გაიხარებს, მაშინ გაქცევ შენ უდაბურად.

¹⁵როგორც ხარობდი შენ ისრაელის სახლის სამკვიდროს გაუდაბურებაზე, ისე მოგექცევი შენ: ერთად გაუდაბურდებით, სეყირის მთაო, და ედომო, მთლიანად, და მიხვდებიან, რომ მე ვარ უფალი.