Read სბს–2013 ეზეკიელი 36 Bible Online

ეზეკიელი 36 - სბს–2013 bible

ეზეკიელი 36

¹და შენ, ადამის ძევ! უწინასწარმეტყველე ისრაელის მთებს და უთხარი: მთანო ისრაელისა, ისმინეთ უფლის სიტყვა!

²ასე ამბობს უფალი ღმერთი: იმის გამო, რომ მტერი ამბობს თქვენზე: აჰა, სამკვიდროდ დაგვრჩაო საუკუნო გორაკები!

³ამიტომ იწინასწარმეტყველე და თქვი: ასე ამბობს-თქო უფალი ღმერთი: რაკი განადგურებენ და ყოველი მხრიდან ესწრაფვიან თქვენს შთანთქმას, რათა გახდეთ წარმართთა საბრძანებელი, და მიეცეთ ენით ასაგდებად და საძრახავად.

⁴ამიტომ, ისრაელის მთებო, ისმინეთ უფალი ღმერთის სიტყვა: ასე ეუბნება უფალი ღმერთი მთებსა და ბორცვებს, ღარტაფებსა და ხეობებს, აოხრებულ ნანგრევებსა და მიტოვებულ ქალაქებს, რომელნიც იყვნენ ნადავლად და დასაცინად იმ ხალხებს, რომელნიც ირგვლივ არიან.

⁵ამიტომ ასე ამბობს უფალი ღმერთი: ხომ ჩემი რისხვის ცეცხლში ვამბობდი ამ ხალხებსა და მთელ ედომზე, რომელთაც მიითვისეს ჩემი ქვეყანა მემკვიდრეობად მთელი გულის სიხარულითა და სულის ზიზღით, რათა მისი სანახები გაძარცულიყო.

⁶ამიტომ იწინასწარმეტყველე ისრაელის მიწაზე და უთხარი მთებსა და ბორცვებს, ღარტაფებსა და ველებს: ასე ამბობს-თქო უფალი ღმერთი: აჰა, ჩემი შურითა და გულისწყრომით ვილაპარაკე ეს, რადგან წარმართთაგან შეურაცხყოფას ითმენდით.

⁷ამიტომ ასე ამბობს უფალი ღმერთი: მე ფიცით აღვმართე ხელი და ნახავთ, თუ წარმართებმა, რომელნიც თქვენს ირგვლივ არიან, არა ჭამონ სირცხვილი.

⁸თქვენ კი, მთანო ისრაელისა, კვლავაც ამწვანდებით და ნაყოფს მოუტანთ ჩემს ერს, ისრაელს, – რადგან ის მალე დაბრუნდება აქ.

⁹რადგან, აჰა, მე თქვენ მოგხედავთ, და მოიხვნებით და დაითესებით.

¹⁰და დავასახლებ თქვენზე ადამიანს, მთელ ისრაელის სახლს, მთლიანად, და დასახლდება ქალაქები და ნაოხარები აშენდება.

¹¹და გავამრავლებ თქვენზე ადამიანსა და პირუტყვს, და ინაყოფიერებენ და გამრავლდებიან, და დაგასახლებთ უწინდებურად და კეთილად მოგექცევით, უწინდელზე უკეთესად, და მიხვდებით, რომ მე ვარ უფალი.

¹²და მოვიყვან თქვენთან ხალხს – ჩემს ერს, ისრაელს, რათა დაგიმკვიდრონ და გახდე მათი წილხვედრი, რომ აღარასოდეს გახადო ისინი შვილმკვდარნი.

¹³ასე ამბობს უფალი ღმერთი: რადგან გეუბნებიან შენ: კაცის მჭამელი ხარ და შენი ერის შვილმკვდარმყოფელიო,

¹⁴ამიტომ კაცს აღარ შეჭამ და შენს ერს აღარ გახდი შვილმკვდარს, – ამბობს უფალი ღმერთი.

¹⁵და აღარ მოგასმენინებ შენს დაცინვას წარმართთაგან, და ლანძღვას ტომთაგან და შენს ხალხს შვილმკვდრად აღარ დასხავ, – ამბობს უფალი ღმერთი.

¹⁶და იყო სიტყვა უფლისა ჩემდამი თქმული:

¹⁷ადამის ძევ! როდესაც ისრაელის სახლი თავის მიწაზე ცხოვრობდა, შებილწა იგი თავისი საქმითა და საქციელით. მათი გზა ჩემს წინაშე ისეთი იყო, როგორც უწმიდურება დედაკაცისა წიდოვანებისას.

¹⁸და გადმოვანთხიე მათ ჩემი რისხვა იმ სისხლის გამო, რომელსაც ღვრიდნენ ქვეყანაზე, და იმის გამო, რომ კერპებით შებილწეს იგი.

¹⁹და გავფანტე ისინი წარმართთა შორის და გავაბნიე ქვეყნებში, და განვსაჯე მათი გზისა და მათი საქმეებისამებრ.

²⁰და მივიდნენ ისინი წარმართებთან, და სადაც მივიდნენ, შელახეს ჩემი წმიდა სახელი, რადგან მათზე ამბობდნენ: ეს უფლის ერია და მისი ქვეყნიდან არიანო გამოსული.

²¹და შევიბრალე ჩემი წმიდა სახელი, რომელიც შელახა ისრაელის სახლმა წარმართთა შორის, სადაც ისინი მივიდნენ.

²²ამიტომ უთხარი ისრაელის სახლს: ასე ამბობს-თქო უფალი ღმერთი: თქვენი გულისთვის არ ვაკეთებ ამას, სახლო ისრაელისა, არამედ ჩემი წმიდა სახელისათვის, რომელიც შელახეთ წარმართთა შორის, სადაც მიხვედით.

²³და მე განვწმედ ჩემს დიად სახელს, შელახულს წარმართთა შორის, რომელიც შელახეთ თქვენ მათ შორის. და მიხვდებიან წარმართნი, რომ მე ვარ უფალი! – ამბობს უფალი ღმერთი, – როდესაც გამოვაჩენ ჩემს სიწმიდეს თქვენზე მათ თვალწინ.

²⁴და გამოგიყვანთ წარმართთაგან და გამოგკრებთ ყველა ქვეყნიდან და მოგიყვანთ თქვენს მიწაზე.

²⁵და გასხურებთ წმიდა წყალს, და განიწმიდებით მთელი თქვენი სიბილწისაგან, და ყველა თქვენი კერპისაგან განგწმედთ.

²⁶და მოგცემთ თქვენ ახალ გულს და ახალ სულს მოგცემთ თქვენ, ამოგარიდებთ ქვის გულს სხეულიდან და ხორცის გულს ჩაგიდგამთ.

²⁷ჩემს სულს ჩავდებ თქვენში და გავაკეთებ ისე, რომ ჩემი მცნებებით ივლით და ჩემს სამართალს დაიცავთ და შეასრულებთ.

²⁸და იცხოვრებთ ქვეყანაში, რომელიც თქვენს მამებს მივეცი, და იქნებით ჩემი ერი და მე ვიქნები თქვენი ღმერთი.

²⁹მე გიხსნით ყველა თქვენი უწმიდურებისაგან, და მოვუხმობ ხორბალს, და გავამრავლებ მას, და არ მოვავლენ თქვენზე შიმშილობას.

³⁰გავამრავლებ ხეზე ნაბამსა და მინდვრის მოსავალს, რათა აღარ დაითმინოთ შიმშილის სირცხვილი წარმართთა შორის.

³¹მაშინ გაიხსენებთ თქვენს ბოროტ გზებს და თქვენს ცუდ საქციელს, და შეგძაგდებათ საკუთარი თავი თქვენი ურჯულოებისა და თქვენი სისაძაგლის გამო.

³²იცოდეთ, რომ თქვენი გულისთვის არ ვაკეთებ ამას, – ამბობს უფალი ღმერთი, – გრცხვენოდეთ და გაწითლდით თქვენი გზების გამო, ისრაელის სახლო.

³³ასე ამბობს უფალი ღმერთი: მაშინ, როცა მე განგწმედთ თქვენი ყველა ურჯულოებისაგან და დავასახლებ თქვენს ქალაქებს და აშენდება ნაოხარები,

³⁴და ეს გაჩანაგებული მიწა, უდაბურად რომ უჩანდა ყოველ ჩამვლელს, მოიხვნება,

³⁵და იტყვიან: ეს გაუდაბურებული ქვეყანა ედემის ბაღად ქცეულა; და ეს აოხრებული, გაუდაბურებული და დანგრეული ქალაქები გამაგრებულია და დასახლებული.

³⁶და მიხვდებიან წარმართნი, რომლებიც თქვენს ირგვლივ დარჩებიან, რომ მე, უფალმა, აღვადგინე დანგრეული, გავაშენე გაუდაბურებული. მე, უფალმა, ვთქვი და გავაკეთე.

³⁷ასე ამბობს უფალი ღმერთი: კიდევ იმით გამოვავლენ ჩემს წყალობას ისრაელის სახლის მიმართ, რომ ცხვრის ფარასავით გავუმრავლებ ხალხს.

³⁸როგორც მრავალია სამცხვერპლო ცხვარი იერუსალიმში მის დღესასწაულებზე, ისე აივსება გაუდაბურებული ქალაქები ხალხით, და მიხვდებიან, რომ მე ვარ უფალი.