Read სბს–2013 ეზეკიელი 37 Bible Online

ეზეკიელი 37 - სბს–2013 bible

ეზეკიელი 37

¹იყო უფლის ხელი ჩემზე, და გამიყვანა მე უფლის სულმა და დამსვა შუაგულ ველზე, რომელიც ძვლებით იყო სავსე.

²და შემომატარა მათ ირგვლივ, და აჰა, ძალზე ბევრი ეყარა ისინი ველზე და, აჰა, მთლად გამხმრები იყო.

³და მითხრა მან მე: ადამის ძევ! თუ გაცოცხლდებიან ეს ძვლები? და ვუთხარი მე: უფალო ღმერთო, მხოლოდ შენ უწყი ეს.

⁴და მითხრა მან: უწინასწარმეტყველე ამ ძვლებს და უთხარი: გამხმარო ძვლებო, ისმინეთ სიტყვა უფლისა!

⁵ასე ეუბნება უფალი ღმერთი ამ ძვლებს: შემოვიყვან თქვენში სულს და გაცოცხლდებით.

⁶მოგცემთ თქვენ ძარღვებს და ამოვიყვან თქვენზე ხორცს, დაგფარავთ კანით და მოგცემთ სულს, და გაცოცხლდებით და მიხვდებით, რომ მე ვარ უფალი.

⁷და ვიწინასწარმეტყველე მე, როგორც მებრძანა; და როდესაც ვწინასწარმეტყველებდი, მესმა ხმა, და აჰა, შეიქმნა ზრიალი, და მიედგა ძვალი თავის ძვალს.

⁸და დავინახე: აჰა, ძარღვებით შეივსო და ხორცი და ტყავი გადაეკრა ზედ, სული კი არ იყო მათში.

⁹და მითხრა მე: უწინასწარმეტყველე სულს, უწინასწარმეტყველე, ადამის ძევ, და უთხარი: ასე ამბობს-თქო უფალი ღმერთი: ოთხი ქარიდან მოდიო, სულო, და შთაბერე ამ დახოცილებს და გაცოცხლდებიან.

¹⁰მეც ვიწინასწარმეტყველე, როგორც უფალმა მიბრძანა. და შევიდა მათში სული და გაცოცხლდნენ და დადგა ფეხზე ძალზე, ძალზე დიდი ლაშქარი.

¹¹და მითხრა მე უფალმა: ადამის ძევ! ეს ძვლები მთელი ისრაელის სახლია. აჰა, შენ გესმის, რომ ისინი ამბობენ: გახმა ჩვენი ძვლები და წარწყმდაო სასოება ჩვენი, მოვისპენითო.

¹²ამიტომ უწინასწარმეტყველე და უთხარი მათ: ასე ამბობს-თქო უფალი ღმერთი: მე გავხსნიო თქვენს საფლავებს და ამოგიყვანთო იქიდან, ჩემო ხალხო, და მიგიყვანთო ისრაელის მიწაზე.

¹³და მიხვდებით, რომ მე ვარ უფალი, როდესაც გავხსნი თქვენს საფლავებს და ამოგიყვანთ თქვენი საფლავებიდან, ჩემო ერო!

¹⁴და ჩავდებ ჩემს სულს თქვენში და გაცოცხლდებით. და დაგსხამთ თქვენს მიწაზე და მიხვდებით, რომ მე, უფალმა, ვთქვი და გავაკეთე, – ამბობს უფალი.

¹⁵და იყო სიტყვა უფლისა ჩემდამი თქმული:

¹⁶და შენ, ადამის ძევ! აიღე ერთი ჯოხი და დააწერე: იუდასთვის და მის თანამდგომ ისრაელიანთათვის; და აიღე მეორე ჯოხი და დაწერე: ჯოხი ეფრემის, იოსებისთვის; ეს ჯოხი არის ეფრემისა და მთელი ისრაელის სახლისა, მისი თანამდგომისა.

¹⁷ერთმანეთს მიადგი შენთვის ის ჯოხები და იყოს, როგორც ერთი, შენს ხელში.

¹⁸და როდესაც გკითხავენ ძენი შენი ერისა: არ გაგვაგებინებ, ეს რა გიჭირავს?

¹⁹უთხარი მათ: ასე ამბობს-თქო უფალი ღმერთი: აჰა, ავიღებ იოსების კვერთხს, რომელიც ეფრემისა და მასთან გაერთიანებულ ისრაელის ტომების ხელშია, და მივუდგამ მას იუდას კვერთხს და ერთ კვერთხად ვაქცევ მათ, და ერთნი გახდებიან ჩემს ხელში;

²⁰და კვერთხები, რომლებზეც შენ დაწერე, ხელში გექნება მათ თვალწინ.

²¹და უთხარი მათ: ასე ამბობს-თქო უფალი ღმერთი: მე გამოვიყვან ისრაელის ძეთ წარმართთაგან, რომლებთანაც წასული არიან, და შემოვიკრებ მათ ყოველი მხრიდან და მოვიყვან თავიანთ მიწაზე.

²²და ამ მიწაზე, ისრაელის მთებზე, ერთ ხალხად ვაქცევ მე და ერთი მეფე ეყოლება ყველას და აღარ იქნება ორი ხალხი, და აღარასოდეს გაიყოფიან ორ სამეფოდ.

²³და აღარ შეიბილწებიან თავიანთი კერპებით და თავიანთი სისაძაგლეებით და ყოველგვარი მანკიერებით, და ვიხსნი მათ მათი ყველა საცხოვრებლიდან, სადაც სცოდავდნენ, და განვწმედ მათ, და იქნებიან ჩემს ერად, და მე ვიქნები მათი ღმერთი.

²⁴და ჩემი მსახური დავითი იქნება მათი მეფე და მათი მწყემსი, და ჩემი მცნებებით ივლიან ისინი, და ჩემს წესებს დაიცავენ და შეასრულებენ.

²⁵და იცხოვრებენ მიწაზე, რომელიც მე მივეცი ჩემს მსახურს, იაკობს, სადაც ცხოვრობდნენ მათი მამები; იქ იცხოვრებენ ისინი და მათი შვილები და შვილიშვილები უკუნისამდე; და ჩემი მსახური დავითი იქნება მათი მთავარი საუკუნოდ.

²⁶და დავუდებ მათ მშვიდობის აღთქმას, და საუკუნო აღთქმა იქნება ის. და დავამკვიდრებ მათ და გავამრავლებ, და აღვმართავ ჩემს საწმიდარს მათ შორის საუკუნოდ.

²⁷და მათთან იქნება ჩემი სავანე, და ვიქნები მათი ღმერთი და ისინი იქნებიან ჩემი ერი.

²⁸და მიხვდებიან წარმართნი, რომ მე ვარ უფალი, განმწმედელი ისრაელისა, როდესაც ჩემი საწმიდარი იქნება მათ შორის საუკუნოდ.