Read სბს–2013 ეზეკიელი 38 Bible Online

ეზეკიელი 38 - სბს–2013 bible

ეზეკიელი 38

¹და იყო სიტყვა უფლისა ჩემდამი თქმული:

²ადამის ძევ! პირი ქენი მაგოგელი გოგისკენ, როშის, მეშექისა და თუბალის უმაღლესი მთავრისკენ და იწინასწარმეტყველე მასზე.

³და უთხარი: ასე ამბობს-თქო უფალი ღმერთი: აჰა, შენს წინააღმდეგ ვარ, გოგ, როშის, მეშექისა და თუბალის უმაღლესო მთავარო!

⁴და მოგიტყუებ შენ და ჩანგლებს გაგიყრი ყბებში და გამოგიყვან შენ და მთელ შენს ლაშქარს, ცხენებსა და მხედრებს, ბრწყინვალედ დარახტულთ; მთელ ურდოს აბჯრითა და ფარით აღჭურვილს; ყველა მახვილის ამომწვდელს;

⁵სპარსელთ, ქუშელთ და ფუტელთ, მათთან ერთად, და ყველა ფარ-მუზარადიანს;

⁶გომერსა და მთელ მის ურდოს; თოგარმას სახლს ჩრდილოეთის კიდეებიდან მთელი მისი ურდოებით; მრავალ ხალხს შენთან ერთად.

⁷გაემზადეთ და საჭურველი აისხით შენ და მთელმა შენმა ურდომ, შენთან შემოკრებილმა, და იყავი მათი სარდალი!

⁸მრავალი ხნის შემდეგ განემზადები და უკანასკნელ ჟამს შეხვალ მახვილს გადარჩენილ ქვეყანაში, მრავალი ხალხისგან შემოკრებილში, ისრაელის მთებზე, რომელიც მუდამ უკაცრიელი იყო; ისინი გამოვლენ ხალხებიდან და უზრუნველად იცხოვრებენ ყველანი.

⁹აღიძვრებით, როგორც ქარიშხალი, წამოხვალთ, როგორც ღრუბელი, რათა დაფაროთ ქვეყანა შენ და შენმა ურდოებმა და შენთან მყოფმა უამრავმა სხვა ხალხებმა.

¹⁰ასე ამბობს უფალი ღმერთი: იმ დღეს აღგეძვრება ფიქრები გულში და განიზრახავ ბოროტ ზრახვებს,

¹¹და იტყვი: გავილაშქრებ გაუმაგრებელ ქვეყანაზე, დავეცემი მშვიდად და უსაფრთხოდ მცხოვრებთ, რომლებიც უკედლებოდ დამკვიდრებულან და ურდულები და კარებები არა აქვთ,

¹²რათა გავძარცვო და მოვიხვეჭო, ვიალაფო და ხელი გავიწოდო ხელახლა აღორძინებულ ნანგრევებზე დასახლებულ წარმართთაგან გამოსულ ერზე, რომელმაც გაიმრავლა ცხვარ-ძროხა და დოვლათი, და, რომელიც ცხოვრობს ქვეყნის ჭიპზე.

¹³შება და დედანი და ვაჭარნი თარშიშისა და მისი ბოკვრები გეტყვიან: ჩვენს გასაძარცვად მოხვედი? ნადავლის საალაფოდ შეკრიბე შენი ურდო, ოქრო-ვერცხლის წასაღებად, ცხვარ-ძროხის გასარეკად და დოვლათის დასატაცებლად, დიდი ძარცვით საძარცვავად?

¹⁴ამიტომ იწინასწარმეტყველე, ადამის ძევ, და უთხარი გოგს: ასე ამბობს-თქო უფალი ღმერთი: განა იმ დღეს, როდესაც ჩემი ერი, ისრაელი, უსაფრთხოდ იცხოვრებს, არ გეცოდინება ეს?

¹⁵და მოხვალ შენი სამყოფიდან, ჩრდილოეთის კიდეებიდან, შენ და შენი ურიცხვი ხალხი, ცხენებზე ამხედრებულნი, დიდი კრებული და დიდძალი ლაშქარი.

¹⁶და აღიმართები ჩემს ერზე, ისრაელზე, როგორც ღრუბელი, რათა დაფარო ეს ქვეყანა: უკანასკნელ დღეებში მოხდება ეს, რომ მე წამოგიყვან ჩემი ქვეყნის წინააღმდეგ, რათა მიცნონ ხალხებმა, როცა ჩემს სიწმიდეს გამოვაჩენ შენში, გოგ, მათ თვალწინ.

¹⁷ასე ამბობს უფალი ღმერთი: განა შენ ის არა ხარ, რომელზეც ვლაპარაკობდი მე შორეულ წარსულში ჩემს მსახურთა, ისრაელის წინასწარმეტყველთა პირით, რომელნიც წინასწარმეტყველებდნენ იმ დღეებში, რომ მე მოგიყვანდით მათ წინააღმდეგ.

¹⁸და იქნება იმ დღეს, გოგის მოსვლის დღეს ისრაელის მიწაზე, – ამბობს უფალი ღმერთი, – როცა გოგი მოვა, აღეგზნება ჩემი გულისწყრომის რისხვა.

¹⁹და ჩემი შურით, ჩემი მძვინვარების ცეცხლით ვთქვი მე: მართლაც იმ დღეს მოხდება დიდი ძვრა ისრაელის მიწაზე.

²⁰და შეიძვრებიან ჩემს წინაშე ზღვის თევზნი და ცის ფრინველნი, და ნადირნი ველისა და ყოველი ქვეწარმავალი, მიწაზე მცოცავნი, ყოველი კაცი, რომელიც დედამიწის ზურგზეა; და ჩამოინგრევა მთები და ჩაიშლებიან უფსკრულები და ყველა ზღუდე დაეცემა მიწაზე.

²¹და მოვუხმობ მის წინააღმდეგ ჩემს ყველა მთაზე მახვილს, – ამბობს უფალი ღმერთი, – და ყოველი კაცი მახვილს აღმართავს თავის ძმაზე.

²²და დავსჯი მას შავი ჭირითა და სისხლისღვრით; თავსხმა წვიმას და ქვის სეტყვას, ცეცხლსა და გოგირდს დავუშენ მასა და მის რაზმებს და იმ ურიცხვ ხალხებს, რომლებიც მასთან არიან.

²³და გამოვაჩენ ჩემს დიდებას და სიწმიდეს, და გამოვცხადდები მრავალი ხალხის თვალწინ, და მიხვდებიან, რომ მე ვარ უფალი.