Read სბს–2013 ეზეკიელი 40 Bible Online

ეზეკიელი 40 - სბს–2013 bible

ეზეკიელი 40

¹ჩვენი ტყვეობის ოცდამეხუთე წელს, წლის დასაწყისში, თვის მეათე დღეს, ქალაქის დაცემის მეთოთხმეტე წელს, სწორედ იმ დღეს იყო ჩემზე ხელი უფლისა და მიმიყვანა იქ.

²ღვთიურ ხილვებში მომიყვანა მე ისრაელის ქვეყანაში და დამსვა ძალიან მაღალ მთაზე, და მასზე, სამხრეთის მხარეს, ქალაქური შენობები იყო;

³და მიმიყვანა იქ. და, აჰა, ვნახე კაცი, რომელსაც სახე ბრიჯაოსავით უბზინავდა; ხელში სელის ლარი და საზომი ლერწამი ჰქონდა და იდგა იგი კარიბჭეში.

⁴და მელაპარაკა ის კაცი: ადამის ძევ! ნახე შენი თვალით და შენი ყურით მოისმინე და გულთან მიიტანე ყოველივე, რასაც მე გიჩვენებ, რადგან მოყვანილი ხარ აქ იმისათვის, რომ გიჩვენო. ყოველივე, რასაც აქ იხილავ, უთხრა ისრაელის სახლს.

⁵აჰა, გალავანია ტაძრის ირგვლივ და იმ კაცს ლერწმის ექვსი წყრთის სიგრძის საზომი აქვს ხელთ; იმ წყრთაში – წყრთა და ერთი მტკაველია. და გაზომა სიგანე ამ შენობისა და იყო ერთი ლერწამი, და სიმაღლეც – ერთი ლერწამი.

⁶და მივიდა კარიბჭესთან, რომელიც აღმოსავლეთისაკენ იყო მიმართული, და ავიდა მის საფეხურებზე და გაზომა კარიბჭის ერთი ზღურბლი; სიგანე ერთი ლერწამი, მეორე ზღურბლის სიგანეც ერთი ლერწამი.

⁷და თითო გვერდითა სენაკის სიგრძე ერთი ლერწამი იყო და სიგანეც – ერთი ლერწამი; და სენაკებს შორის ხუთი წყრთა იყო; კარიბჭის ზღურბლი შიდა კარიბჭის სტოასთან ერთი ლერწამი იყო;

⁸გაზომა შიდა კარიბჭის სტოა და ერთი ლერწამი იყო.

⁹გაზომა კარიბჭის სტოა – რვა წყრთა იყო; და მისი სვეტები ორ-ორი წყრთა იყო; კარიბჭის სტოა შიგნით იყო.

¹⁰აღმოსავლეთის კარიბჭეს ერთ მხარეს სამი სენაკი ჰქონდა, მეორე მხარესაც სამი; ერთი ზომის იყო სამივე; ერთი ზომის იყო ორივე მხარის სვეტები.

¹¹გაზომა კარიბჭის შესასვლელის სიგანე და ათი წყრთა იყო, სიგრძე – ცამეტი წყრთა;

¹²სენაკების წინ ფართობი თითო წყრთა იყო ორივე მხარეს; სენაკები – ექვსი წყრთა ერთ მხარეს და ექვსი წყრთა მეორე მხარეს.

¹³გაზომა კარიბჭე ერთი სენაკის სახურავიდან მეორე სენაკის სახურავამდე – სიგანე ოცდახუთი წყრთა; კარი კარის პირდაპირ იყო;

¹⁴სვეტებს შუა 60 წყრთა გამოუვიდა; სვეტების წინ ეზო და კარიბჭე იყო.

¹⁵და შესასვლელის კარიბჭიდან შიდა კარიბჭის სტოამდე – 50 წყრთა.

¹⁶ცხაურიანი სარკმლები ჰქონდა სენაკებს და სვეტებს კარიბჭის შიგნით, ირგვლივ; და ასევე სტოებს; სარკმლები იყო ირგვლივ შიდა მხარეს და სვეტებზე პალმები იყო.

¹⁷და მიმიყვანა მე გარეთა ეზოში და, აჰა, ვნახე სენაკები, და ქვაფენილია დაგებული ეზოში ირგვლივ, 30 სენაკი იმ ქვაფენილზე.

¹⁸ქვაფენილი კარიბჭეთა გვერდით იყო, მთელს სიგრძეზე; ეს იყო ქვედა ქვაფენილი.

¹⁹გაზომა სიგანე ქვედა კარიბჭიდან შიდა ეზოს ბოლომდე 100 წყრთა აღმოსავლეთით და ჩრდილოეთით.

²⁰ჩრდილოეთისკენ მიმართული გარეთა ეზოს კარიბჭის სიგრძე და სიგანეც გაზომა.

²¹სენაკები ერთ მხარეს სამი იყო, მეორე მხარესაც სამი; მისი სვეტები და სტოა პირველი კარიბჭის ზომისა იყო – სიგრძე 50 წყრთა და სიგანე 25 წყრთა.

²²სარკმლები, სტოები და ფინიკის ჩუქურთმები იმავე ზომისა ჰქონდა, როგორც აღმოსავლეთის კარიბჭეს; შვიდი საფეხური იყო ასასვლელი და სტოა მის წინ;

²³შიდა ეზოს კარიბჭე ჩრდილოეთის და აღმოსავლეთის კარიბჭეთა პირდაპირ იყო; და გაზომა კარიბჭიდან კარიბჭემდე 100 წყრთა.

²⁴და წამიყვანა მან სამხრეთისაკენ, და აჰა, სამხრეთის კარიბჭე. და გაზომა მისი სვეტები და სტოა და იგივე ზომისა იყო.

²⁵და ჰქონდა სარკმლები და სტოები ირგვლივ ისეთივე, როგორც სხვა სარკმლები იყო; სიგრძე 50 წყრთა და სიგანე 25 წყრთა.

²⁶და იყო ასასვლელი შვიდ საფეხურიანი, სტოა მის წინ და პალმის ჩუქურთმები მის სვეტებზე, თითო-თითო ორივე მხარეს;

²⁷და იყო შიდა ეზოს კარიბჭე სამხრეთისაკენ. გადაზომა იმ კარიბჭიდან მეორე კარიბჭემდე სამხრეთისაკენ 100 წყრთა.

²⁸და შემიყვანა სამხრეთის კარიბჭით შიდა ეზოში, და გაზომა სამხრეთის კარიბჭე და იგივე ზომისა იყო.

²⁹მათი გვერდითი სენაკები, მათი სვეტები და სტოები იმავე ზომისა იყო. ირგვლივ სარკმლები ჰქონდა სენაკებსა და სტოებს; სენაკებსა და მათ სტოებს 50 წყრთა ეჭირა სიგრძით და 25 სიგანით.

³⁰ირგვლივ სტოები იყო სიგრძით 25 და სიგანით ხუთი წყრთა.

³¹მისი სტოები გადიოდა გარეთა ეზოსაკენ; და ფინიკები იყო დახატული მის სვეტებზე, და რვა საფეხური ჰქონდა მასზე ასასვლელად.

³²და შემიყვანა აღმოსავლეთის კარიბჭით შიდა ეზოში და გაზომა ის კარიბჭე და იგივე ზომების იყო.

³³მისი სენაკები, სვეტები და სტოები იმავე ზომისა იყო. სარკმლები ჰქონდა ირგვლივ სენაკებსა და მათ სტოებს: სიგრძე 50 წყრთა და სიგანე 25 წყრთა.

³⁴მისი სტოები გადიოდა გარეთა კარიბჭისაკენ; და მის სვეტებზე ფინიკები იყო ორივე მხრიდან; რვა საფეხური ადიოდა მისკენ.

³⁵მიმიყვანა მე ჩრდილოეთის კარიბჭესთან და გაზომა და იგივე ზომებისა იყო.

³⁶თავისი სენაკებით, თავისი სვეტებით, თავისი სტოებით და სარკმლებით ირგვლივ იყო სიგრძით 50 წყრთა და სიგანით 25 წყრთა.

³⁷მისი სტოა მიმართული იყო წინა ეზოსაკენ, სვეტებს ფინიკის ჩუქურთმები ედგა ორივე მხარეს და ასასვლელი რვა საფეხურიანი იყო.

³⁸სენაკი ჰქონდა თავისი შესასვლელით კარიბჭის სვეტებთან. იქ ბანდნენ სრულადდასაწველს.

³⁹კარიბჭის სტოაში ორი მაგიდა იდგა ერთ მხარეს და ორი მაგიდა მეორე მხარეს, რათა ზედ დაეკლათ სრულადდასაწველი და ცოდვის შესაწირავი და დანაშაულის შესაწირავი მსხვერპლები.

⁴⁰გარეთა ფრთაზე ასასვლელთან, ჩრდილოეთის კარიბჭის შესასვლელთან ორი მაგიდა იდგა, მეორე ფრთაზე კარიბჭის სტოასთანაც ორი მაგიდა იდგა;

⁴¹ოთხი მაგიდა ერთ მხარეს და ოთხი მაგიდა მეორე მხარეს, კარიბჭის ფრთასთან; რვა მაგიდა იყო მსხვერპლის დასაკლავად.

⁴²ოთხი მაგიდა სრულადდასაწველისთვის თლილი ქვისაგან გაკეთებული; სიგრძე ერთნახევარი წყრთა, სიგანე ერთნახევარი წყრთა და სიმაღლე ერთი წყრთა; მასზე აწყობდნენ იარაღს, რომლითაც უნდა დაეკლათ სრულადდასაწველი და სხვა მსხვერპლები.

⁴³და ორკაპი ჩანგლები, ერთი მტკაველის სიგანისა, მიმაგრებული იყო შენობის კედელზე ორივე მხარეს, მაგიდებზე კი სამსხვერპლო ხორცი ეწყო.

⁴⁴შიდა კარიბჭის გარეთ მგალობელთა სენაკები იყო; შიდა ეზოში, ჩრდილოეთის კარიბჭის ფრთასთან; ერთი სამხრეთისაკენ იყურებოდა, მეორე კი აღმოსავლეთის კარიბჭის ფრთასთან – ჩრდილოეთისაკენ იყო მიქცეული.

⁴⁵და მითხრა მან: ეს საკანი, სამხრეთისაკენ რომ არის მიქცეული, მღვდლებისათვისაა, რომლებიც ტაძრის სამსახურს ასრულებენ.

⁴⁶ხოლო სენაკი, ჩრდილოეთისკენ რომ არის მიქცეული, მღვდლებისთვისაა, რომლებიც სამსხვერპლოს სამსახურს ასრულებენ; ესინი ცადოკის ძენი არიან, ლევის ტომიდან, უფლის ახლოს მყოფნი და მისი მსახურნი.

⁴⁷და გადაზომა ეზო: სიგრძით 100 წყრთა და სიგანითაც 100 წყრთა. სამსხვერპლო ტაძრის წინ იდგა.

⁴⁸და მიმიყვანა ტაძრის სტოასთან და გადაზომა სტოას სვეტებში: ხუთი წყრთა ერთ მხარეს და ხუთი წყრთა მეორე მხარეს, კარიბჭის სიგანე სამი წყრთა ერთ მხარეს და სამი წყრთა მეორე მხარეს.

⁴⁹სტოას სიგრძე – 20 წყრთა და სიგანე – 12 წყრთა; აღსავალთან, რომლითაც ადიან, სვეტები იყო, ერთი – ერთ მხარეს, მეორე – მეორე მხარეს.