Read სბს–2013 ეზეკიელი 42 Bible Online

ეზეკიელი 42 - სბს–2013 bible

ეზეკიელი 42

¹გამიყვანა მე გარეთა ეზოში ჩრდილოეთის გზით და მიმიყვანა სენაკებთან, რომლებიც მოედნის პირდაპირ იყო მოთავსებული ჩრდილოეთის მხარეს.

²ჩრდილოეთის შესასვლელის წინა მხარის სიგრძე 100 წყრთა იყო, სიგანე – 50.

³შიდა ეზოს პირდაპირ ოც წყრთაზე და ქვაფენილის პირდაპირ, გარეთა ეზოში, დერეფანი დერეფნის პირდაპირ იყო სამ სართულად.

⁴და სენაკთა წინ გასავლელი 10 წყრთა სიგანით და შიდა გზა ერთი წყრთა; მათი კარებები ჩრდილოეთისკენ იყო.

⁵ზედა სენაკები უფრო მოკლე იყო, რადგან დერეფნებს მათგან უფრო მეტი ადგილი ეჭირათ, ვიდრე შენობის ქვემო და შუა სართულებს,

⁶რადგან სამსართულად იყო ისინი და არ ჰქონდათ სვეტები, ეზოს სვეტების მსგავსად, ამიტომ დაშორებული იყო ქვემო და შუა სართულებს იატაკიდან.

⁷და კედელი, რომელიც გარედან იყო სენაკთა პირდაპირ გარეთა ეზოსკენ, 50 წყრთა იყო.

⁸რადგან სენაკთა სიგრძე, რომლებიც გარეთა ეზოში იყო, 50 წყრთა იყო, ხოლო ტაძრის წინ 100 წყრთა იყო.

⁹ამ სენაკთა ქვევით, აღმოსავლეთის მხრიდან იყო შესასვლელი, გარეთა ეზოდან შესასვლელად.

¹⁰ეზოს გალავნის სიგანეზე აღმოსავლეთით, მოედნისა და შენობის პირდაპირ სენაკები იყო.

¹¹გზა მათ წინ იყო მსგავსი იმ სენაკების გზისა, რომლებიც ჩრდილოეთისკენ იყო მიმართული: სიგრძით, სიგანით, და ყველა მათი შესასვლელ-გამოსასვლელით ისეთივე იყო.

¹²ისეთივე კარებებით როგორიც სენაკებს ჰქონდა სამხრეთისაკენ, და მათში შესასვლელად კარი იყო გზის დასაწყისში, რომელიც მიუყვებოდა კედლის გასწვრივ აღმოსავლეთისკენ.

¹³და მითხრა მან: ჩრდილოეთის სენაკები, სამხრეთის სენაკები, რომლებიც ტაძრის დარბაზის წინაა, წმიდა სენაკებია, სადაც უფალს მიახლოებული მღვდლები ჭამენ უწმიდეს მსხვერპლს. იქ აწყობენ უწმიდეს მსხვერპლებს, და პურეულის ძღვენს, ცოდვისა და დანაშაულის შესაწირავს, რადგან წმიდაა ეს ადგილი.

¹⁴როდესაც იქ მღვდლები შედიან, აღარ უნდა გავიდნენ ამ წმიდა ადგილიდან გარეთა ეზოში, ვიდრე იქ არ დააწყობენ თავიანთ სამოსელს, რომლითაც მსახურება აღასრულეს, რადგან წმიდაა ისინი; მათ სხვა სამოსელი უნდა ჩაიცვან და ისე გავიდნენ ხალხთან.

¹⁵დაასრულა მან შიდა ტაძრის გაზომვა და გამომიყვანა კარიბჭის გზით, რომელიც აღმოსავლეთითაა მიმართული, და გაზომა ის ირგვლივ.

¹⁶და გაზომა აღმოსავლეთის მხარე ლერწმის საზომით – 500 წყრთა.

¹⁷გაზომა ჩრდილოეთის მხარე – 500 წყრთა საზომი ლერწმით.

¹⁸სამხრეთის მხარე გაზომა – 500 წყრთა საზომი ლერწმით.

¹⁹მიტრიალდა დასავლეთისკენ და გაზომა 500 წყრთა საზომი ლერწმით.

²⁰ოთხივ კუთხივ გაზომა მან იგი; გალავანი იყო მის ირგვლივ, სიგრძე – 500 და სიგანე – 500 წყრთა, რათა გამოეცალკევებინა წმიდა ადგილი არაწმიდისაგან.