Read სბს–2013 ეზეკიელი 43 Bible Online

ეზეკიელი 43 - სბს–2013 bible

ეზეკიელი 43

¹წამიყვანა მან ჭიშკართან, იმ ჭიშკართან, რომელიც აღმოსავლეთით იყო მიქცეული.

²და, აჰა, ისრაელის ღმერთის დიდება მოვიდა აღმოსავლეთის გზიდან და დაიჭექა, როგორც მოვარდნილმა ღვართქაფმა. და მიწა განათდა მისი დიდებით.

³და ეს ხილვა ისეთივე იყო, რომელიც მე ადრე ვიხილე; სწორედ ისეთივე, რომელიც ვიხილე, როდესაც მოვედი ამ ქალაქის დაღუპვის საუწყებლად, და ხილვანი, მსგავსი იმ ხილვებისა, რომლებიც მე ვიხილე მდინარე ქებართან. და პირქვე დავემხე.

⁴და უფლის დიდება შემოვიდა ტაძარში კარიბჭის გზით, რომელიც აღმოსავლეთისკენ იყურებოდა.

⁵და ამაყენა მე სულმა და შემიყვანა შიდა ეზოში, და, აჰა, აავსო უფლის დიდებამ მთელი ტაძარი.

⁶და გავიგონე ვიღაცის ხმა, რომელიც ტაძრიდან მელაპარაკებოდა, ის კაცი კი ჩემს გვერდით იდგა.

⁷და მითხრა: ადამის ძევ! აჰა, ადგილი ჩემი ტახტისა და ადგილი ჩემი ტერფებისა, სადაც მე დავივანებ ისრაელის ძეთა შორის საუკუნოდ; და აღარ შებილწავს ისრაელის სახლი ჩემს წმიდა სახელს, აღარც ისინი და აღარც მათი მეფენი თავიანთი სიძვითა და თავიანთი მეფეთა გვამებით, თავიანთ სამსხვერპლო მაღლობებზე.

⁸ისინი დგამდნენ თავიანთ ზღურბლს ჩემს ზღურბლთან და თავიანთ წირთხლებს ჩემს წირთხლებთან, ასე, რომ ჩემსა და მათ შორის ერთი კედელი იყო; ბილწავდნენ ჩემს წმიდა სახელს თავიანთი სისაძაგლეებით, რასაც ისინი აკეთებდნენ, და ამიტომაც მოვსპე ისინი ჩემი რისხვით.

⁹ახლა მომაშორებენ თავიანთ სიძვასა და თავიანთ მეფეთა გვამებს, და დავივანებ მათ შორის საუკუნოდ.

¹⁰შენ, ადამის ძევ! აუწყე ისრაელის სახლს ამ ტაძარზე, რათა შერცხვეთ თავიანთი ურჯულოებისა, და რათა გაზომონ ის შენობა.

¹¹თუ შერცხვებათ ყველაფრისა, რაც ჩადენილი აქვთ, გამოუცხადე მათ ტაძრის ნახაზი, მისი აღნაგობა, მისი შესასვლელ-გამოსასვლელები, მთელი მისი ნახაზი და ყოველი წესი და კანონი; დაწერე მათ თვალწინ, რომ დაიცვან ყოველი მისი ნახაზი და წესი, და შეასრულონ.

¹²ეს არის ტაძრის რჯული: მთის თხემზე მთელი მიდამო ირგვლივ – წმიდათა წმიდაა. აჰა, ეს არის ტაძრის რჯული.

¹³ეს არის სამსხვერპლოს ზომები წყრთით (ამ წყრთაში წყრთა და ერთი მტკაველია). საფუძველი – ერთი წყრთა, სიგანე – ერთი წყრთა, და მისი ძგიდე მის კიდეზე ირგვლივ ერთი მტკაველი; ეს არის სიმაღლე სამსხვერპლოსი.

¹⁴მიწაზე მდგარი საფუძვლიდან ქვემო შვერილამდე ორი წყრთა და სიგანე ერთი წყრთა; მცირე შვერილიდან დიდ შვერილამდე ოთხი წყრთა, სიგანე ერთი წყრთა.

¹⁵და სამსხვერპლოს კერა – ოთხი წყრთა და კერიდან მაღლა ამოდის ოთხი რქა.

¹⁶და კერა – 12 წყრთაა სიგრძით და 12 – სიგანით და ოთხკუთხედია მის ოთხივე მხარეს.

¹⁷შვერილის სიმაღლე 14 წყრთა, სიგანეც 14 წყრთა მის ოთხივე მხარეს; ძგიდე მის ირგვლივ ნახევარი წყრთა, მისი საფუძვლის ირგვლივ კი ერთი წყრთა; მისი საფეხურები აღმოსავლეთისკენაა.

¹⁸და მითხრა მან: ადამის ძევ, ასე ამბობს უფალი ღმერთი: ესაა წესები სამსხვერპლოსი მისი გაკეთების დღისათვის, რათა აღავლინონ მასზე სრულადდასაწველი და მოაპკურონ მასზე სისხლი.

¹⁹და მისცემ ლევიან მღვდლებს, ცადოკის შთამომავალთ, ჩემთან დაახლოებულთ მსახურებისთვის, – ამბობს უფალი ღმერთი, – ხვასტაგიდან ხბოს ცოდვის გამოსასყიდ მსხვერპლად.

²⁰აიღე მისი სისხლი და აპკურე სამსხვერპლოს ოთხივე რქას და შვერილის ოთხივე კუთხეს და ძგიდეს ირგვლივ, და ასე განწმენდ მას ცოდვისგან და გაასუფთავებ.

²¹და გაიყვანე ხბო ცოდვის მსხვერპლად და დაწვი ის ტაძრის დანიშნულ ადგილზე, საწმიდრის გარეთ.

²²და მეორე დღეს შესწირე უხინჯო თიკანი ცოდვის მსხვერპლად; და ასე განწმენდ ცოდვისგან სამსხვერპლოს, როგორც განწმინდე ხბოთი.

²³როდესაც დაასრულებ განწმედას, შესწირე უხინჯო ხბო და უხინჯო ვერძი ფარიდან.

²⁴და შესწირე ისინი უფლის წინაშე; და მღვდლები დააყრიან მათ მარილს და სრულადდასაწველ მხვერპლად აღუვლენენ უფალს.

²⁵შვიდი დღის მანძილზე სწირავდე ცოდვისათვის. თითო თხა დღეში და თითო ხბო და უხინჯო ვერძი ფარიდან.

²⁶შვიდი დღის მანძილზე წმინდონ მათ სამსხვერპლო, ასუფთაონ და აკურთხონ, და აივსონ ხელი.

²⁷და როდესაც დასრულდება ეს დღეები, მერვე დღეს და შემდგომაც, მღვდლებმა მიიტანონ სამსხვერპლოზე თქვენი სრულადდასაწველი და თქვენი სამშვიდობო მსხვერპლები; და მე გამოვიჩენ თქვენს მიმართ წყალობას, – ამბობს უფალი ღმერთი.