Read სბს–2013 ეზეკიელი 44 Bible Online

ეზეკიელი 44 - სბს–2013 bible

ეზეკიელი 44

¹და დამაბრუნა მან საწმიდრის აღმოსავლეთისაკენ მიქცეული გარეთა კარიბჭის გზით, და დახშული იყო იგი.

²და მითხრა მე უფალმა: ეს კარიბჭე დახშული იქნება, არ გაიღება და კაცი არ შევა მასში, რადგან ისრაელის უფალი ღმერთი შევიდა მასში, და იქნება იგი დახშული.

³ხოლო მთავარი კი დაჯდება იქ, როგორც მთავარი, რათა ჭამოს პური უფლის წინაშე. სტოას კარიბჭის გზით შევა და იმავე გზით გამოვა.

⁴შემდეგ მიმიყვანა მან ჩრდილოეთის კარიბჭის გზით ტაძრის წინ და დავინახე, რომ უფლის დიდებამ გაავსო ტაძარი უფლისა, და პირქვე დავემხე.

⁵და მითხრა უფალმა: ადამის ძევ! დაიმახსოვრე და დაინახე შენი თვალით, და გაიგონე შენი ყურით ყოველივე, რასაც გეუბნები უფლის ტაძრის ყველა წესსა და რჯულზე, და დაიმახსოვრე ტაძარში ყველა შესასვლელი და საწმიდრის ყველა გასასვლელი.

⁶და უთხარი ისრაელის მეამბოხე სახლს: ასე ამბობს-თქო უფალი ღმერთი: გეყოფათ სისაძაგლეთა კეთება, სახლო ისრაელისა!

⁷რომ მოგყავდათ უცხოტომელნი, წინადაუცვეთელნი გულით და წინადაუცვეთელნი ხორცით, რათა ყოფილიყვნენ ისინი ჩემს საწმიდარში, რათა შეებღალათ ჩემი ტაძარი, როდესაც მსხვერპლად მოგქონდათ ჩემი პური, ლურთები და სისხლი და არღვევდით ჩემს აღთქმას მთელი თქვენი სისაძაგლეებით.

⁸არ ასრულებდით მოვალეობას ჩემს სიწმიდეთა მიმართ, და თქვენს ნაცვლად მათ აყენებდით ჩემი საწმიდრის გუშაგებად.

⁹ასე ამბობს უფალი ღმერთი: არც ერთი უცხოთესლი, რომელიც ისრაელის ძეთა შორის ცხოვრობს – წინადაუცვეთელი გულითა და წინადაუცვეთელი ხორცით – არ უნდა შემოვიდეს ჩემს საწმიდარში, თვით ის უსხოთესლი, რომელიც ისრაელიანთა შორის ცხოვრობს.

¹⁰რადგან ლევიანებიც, რომელნიც განმიდგნენ ისრაელის განდგომისას, რომელთაც მიმატოვეს და კერპებს გაედევნენ, იტვირთავენ სასჯელს თავიანთი ურჯულოების გამო.

¹¹და იქნებიან ლევიანები ჩემს საწმიდარში ტაძრის კარიბჭეთა მცველებად და ტაძრის სამსახურის აღმსრულებლებად; ისინი დაკლავენ ხალხისთვის სრულადდასაწველს და სხვა მსხვერპლებს და იდგებიან მათ წინაშე, რათა მოემსახურონ მათ.

¹²რადგან ისინი ემსახურებოდნენ მათ მათი კერპების წინაშე და აცდუნებდნენ ისრაელის სახლს ურჯულოებისაკენ, ამიტომაც მე ხელი აღვმართე მათზე, – ამბობს უფალი ღმერთი, – და იტვირთავენ ისინი თავიანთ ცოდვების სასჯელს.

¹³ვერ მომეახლებიან ისინი, რომ მღვდლობა გამიწიონ და მიეახლონ ყოველ ჩემს სიწმიდეს, ჩემს წმიდათა წმიდას, არამედ იტვირთავენ თავიანთ სირცხვილს და თავიანთ სისაძაგლეს, რაც ჩაიდინეს.

¹⁴და დავაყენებ მათ ჩემი ტაძრის სამსახურის შესასრულებლებად ყველა საქმეში და ყველაფერში, რაც აქ კეთდება.

¹⁵ლევიანი მღვდლები, ცადოკის შთამომავალნი, რომელნიც ასრულებდნენ სამსახურს ჩემს საწმიდარში, როდესაც ისრაელის ძენი განმიდგნენ, მომიახლოვდებიან, რათა მემსახურონ და იდგნენ ჩემს წინაშე, რათა შემომწირონ მე ლურთები და სისხლი, – ამბობს უფალი ღმერთი.

¹⁶ისინი შემოვლენ ჩემს საწმიდარში და მიუახლოვდებიან ჩემს ტრაპეზს, რათა მემსახურონ მე და აღასრულონ თავიანთი მოვალეობა.

¹⁷და როდესაც მივლენ შიდა ეზოს კარიბჭესთან, სელის სამოსელი უნდა ეცვათ და არაფერი მატყლისა შიდა ეზოს კარიბჭეებში და ტაძარში მსახურებისას.

¹⁸სელის კიდარი ედგმებათ თავზე და სელის არდაგი ექნებათ შემორტყმული წელზე. ისეთი არაფერი უნდა შემოიხვიონ, რომ გაიოფლონ.

¹⁹და როდესაც გარეთა ეზოში გავლენ ხალხთან, უნდა გაიხადონ სელის სამოსელი, რომლითაც მსახურობენ და დააწყონ წმიდა სენაკებში, და ჩაიცვან სხვა სამოსელი, რათა არ შეეხონ ხალხს თავიანთი წმიდა სამოსლით.

²⁰თავი არ უნდა გადაიპარსონ, მაგრამ თმაც არ უნდა დაიგრძელონ – თავი უნდა გაიკრიჭონ.

²¹და ღვინო არ უნდა დალიონ მღვდლებმა შიგნითა ეზოში შესვლისას.

²²ქვრივი ან ქმრისგან გაშვებული არ უნდა შეირთონ ცოლად, არამედ მხოლოდ ქალწული ისრაელის სახლის თესლიდან და მღვდლის ქვრივი.

²³ჩემს ერს ასწავლონ გარჩევა წმიდისა და არაწმიდისა და განსხვავება უსუფთაოსა და სუფთას შორის აუწყონ მათ.

²⁴როცა დავის დროს დადგებიან განსასჯელად, ჩემი სამართლით განსაჯონ; ჩემი რჯული და ჩემი წესები დაიცვან ჩემს ყველა დღესასწაულზე და ჩემი შაბათები წმიდად შეინახონ.

²⁵მკვდარს არ შეეხონ, რათა არ შეიბილწონ; შეუძლიათ მხოლოდ მამას და დედას, ძესა და ასულს, ძმასა და გაუთხოვარ დას არ მოერიდნენ.

²⁶და მისი განწმედის შემდეგ შვიდ დღეს გადაუთვლიან მას.

²⁷და იმ დღეს, როდესაც შევა ის წმიდაში, შიდა ეზოში, რათა იმსახუროს წმიდაში, შესწირავს თავისი ცოდვის მსხვერპლს, – ამბობს უფალი ღმერთი.

²⁸და ნუ ექნებათ მათ სამკვიდრო, მე ვარ მათი სამკვიდრო; და საკუთრებას ნუ მისცემთ მათ ისრაელში, რადგან მე ვარ მათი საკუთრება.

²⁹მათ ჭამონ პურეულის ძღვენი, მსხვერპლი ცოდვისა და დანაშაულისა; და ყოველი დარისხებული ისრაელში მათ ეკუთვნით.

³⁰ყოველი ნათავარი, ყოველი პირველმოწეული და ყოველი აღსამართავი შესაწირი თქვენს აღსამართავთაგან მღვდლებს ეკუთვნით. თქვენი ცომის ნათავარი მღვდელს მიეცით, რომ კურთხევამ დაივანოს თქვენს სახლზე.

³¹არავითარი უსულადო და ნამხეცავი არ ჭამონ მღვდლებმა – არც ფრინველისა და არც პირუტყვისა.