Read სბს–2013 ეზეკიელი 45 Bible Online

ეზეკიელი 45 - სბს–2013 bible

ეზეკიელი 45

¹და როდესაც წილისყრით გაინაწილებთ ქვეყანას სამემკვიდრეოდ, გამოუყავით უფალს წმიდა ნაწილი მიწიდან სიგრძით 25 ათასი და სიგანით 10 ათასი წყრთა ლერწმის საზომით; წმიდა იქნება ის ადგილი მთელ მის საზღვრებში ირგვლივ.

²აქიდან საწმიდრისა იქნება კვადრატული ნაკვეთი 500 წყრთა 500 წყრთაზე და 50 წყრთა სიგანის – მოედანი მის ირგვლივ.

³და ამ საზომით გადაზომე სიგრძე 25 ათასი წყრთა და სიგანე 10 ათასი, და იქ იქნება საწმიდარი და წმიდათა წმიდა.

⁴ამ მიწის წმიდა ნაწილი იქნება საწმიდრის მომსახურე მღვდლებისთვის, რომელნიც მიახლოებულნი არიან უფალს, რათა ემსახურონ. და იქნება ის მათი სახლების ჩასადგმელი ადგილი და წმიდა ნაკვეთი საწმიდრისათვის.

⁵და 25 ათასი წყრთა სიგრძე და 10 ათასი სიგანე იქნება ტაძარში მომსახურე ლევიანთა საკუთრებად, მათ საცხოვრებლად.

⁶და ქალაქის საკუთრებად გაეცით 5 ათასი სიგანით და სიგრძით 25 ათასი წყრთა უფლისთვის გამოყოფილი წმიდა ადგილის გასწვრივ; ეს მთელი ისრაელის სახლს უნდა ეკუთვნოდეს.

⁷მთავარს კი მიეცით წილი თითოეული მხრიდან, წმიდის შესაწირავისა და ქალაქის საკუთრებიდან წმიდის შესაწირავის წინ და ქალაქის საკუთრების წინ ზღვის მხრიდან ზღვისაკენ და აღმოსავლეთის მხრიდან აღმოსავლეთით. და სიგრძე მისი თანაბარი იქნება ერთი ნაწილისა დასავლეთის საზღვრიდან აღმოსავლეთის საზღვრამდე.

⁸ეს იქნება მისი მიწა, მისი სამფლობელო ისრაელში, რათა ჩემმა მთავრებმა აღარ შეავიწროვონ ჩემი ერი, და რათა მისცენ ისრაელის სახლს მიწა მათი ტომების მიხედვით.

⁹ასე ამბობს უფალი ღმერთი: გეყოთ, ისრაელის მთავარნო! დაივიწყეთ ძალადობა და ძარცვა-გლეჯა, ქმენით მართალი სამართალი და შეწყვიტეთ ჩემი ერის დევნა, – ამბობს უფალი ღმერთი. –

¹⁰გქონდეთ სწორი სასწორი, სწორი ეფა და სწორი ბათი.

¹¹ეფა და ბათი ერთი ზომისა იყოს, რათა ჩაეტიოს ხომერის მეათედი ბათში და მეათედი ხომერისა ეფაში; ხომერის მიხედვით იყოს მათი ტევადობა.

¹²შეკელში 20 გერაა. 20 შეკელი და 25 შეკელი და 15 შეკელი თქვენი ერთი მნა იქნება.

¹³ესაა შესაწირავი, რომელსაც უნდა სწირავდეთ: ერთი ხომერი ხორბლიდან მეექვსედი ეფა და მეექვსედი ეფა ერთი ხომერი ქერიდან.

¹⁴ზეთზე დაწესებულია: ერთი ქორი ზეთიდან ბათის მეათედი; 10 ბათი არის ერთ ხომერში, რადგან 10 ქორია ხომერში.

¹⁵ერთი კრავი ყოველი 200 ცხვრიდან, ისრაელის ნოყიერი საძოვრებიდან: ეს ყველაფერი პურეულის ძღვნად და სრულადდასაწველ და სამადლობელო მსხვერპლად, რათა განიწმიდონ, – ამბობს უფალი ღმერთი.

¹⁶ქვეყნის მთელმა ერმა უნდა მიუტანოს ეს შესაწირავი ისრაელის მთავარს.

¹⁷მთავარზე იქნება სრულადდასაწველნი და ძღვენი და პურეულის ძღვენი და საღვრელი დღესასწაულებში, ახალ მთვარობებში და შაბათებში, ისრაელის ტაძრის ყველა დღესასწაულებზე; მან უნდა მიიტანოს ცოდვის მსხვერპლი და პურეულის ძღვენი, და სრულადდასაწველი, და სამადლობელო მსხვერპლი, ისრაელის სახლის განსაწმედად.

¹⁸ასე ამბობს უფალი ღმერთი: პირველი თვის პირველ დღეს მოიყვანე უხინჯო ხბო ნახირიდან და გაწმიდე ცოდვისგან საწმიდარი.

¹⁹აიღოს მღვდელმა ცოდვის შესაწირავის სისხლი და აპკუროს ტაძრის წირთხლებსა და სამსხვერპლოს შვერილის ოთხივე კუთხეს და შიდა ეზოს კარიბჭის წირთხლებს.

²⁰ასე გააკეთე ამ თვის მეშვიდე დღეს მათთვის, ვინც შესცოდეს უნებლიედ ან უმეცრებით, და ასე განწმიდეთ ტაძარი.

²¹პირველი თვის მეთოთხმეტე დღეს უნდა გქონდეთ პასექი, შვიდდღიანი დღესასწაული, როცა უფუარს უნდა ჭამდეთ.

²²იმ დღეს მთავარმა უნდა გაამზადოს თავისთვის და ქვეყნის მთელი ერისთვის ხბო ცოდვის მსხვერპლად.

²³დღესასწაულის შვიდივე დღეს მან უნდა მიუტანოს უფალს სრულადდასაწველად დღეში შვიდი უხინჯო ხბო და შვიდი ვერძი, და ცოდვის მსხვერპლად დღეში ერთი თხა.

²⁴მიიტანოს ერთი ეფა პურეულის ძღვენი ხბოზე და ვერძზე და ერთი ჰინი ზეთი ეფაზე.

²⁵მეშვიდე თვის მეთხუთმეტე დღეს, დღესასწაულზე, ყოველივე ეს გააკეთოს შვიდი დღის განმავლობაში: იგივე ცოდვის მსხვერპლი, იგივე სრულადდასაწველი, და იმდენივე პურეულის ძღვენი და იმდენივე ზეთი.