Read სბს–2013 ეზეკიელი 46 Bible Online

ეზეკიელი 46 - სბს–2013 bible

ეზეკიელი 46

¹და თქვა უფალმა ღმერთმა: აღმოსავლეთით მიქცეული შიდა ეზოს კარიბჭე დახშული იქნება ექვსი საქმის დღის განმავლობაში, ხოლო შაბათ დღეს და ახალმთვარობის დღეს გაიღება.

²და შემოვა მთავარი კარიბჭის სტოას გზით გარედან და დადგება კარიბჭის წირთხლებთან; და შესწირავენ მღვდლები მის სრულადდასაწველსა და მის სამადლობელო მსხვერპლს; და თაყვანს სცემს იგი უფალს კარიბჭის ზღურბლთან და გავა, ხოლო კარიბჭე ღია დარჩება საღამომდე.

³და თაყვანს სცემს იმ ქვეყნის ხალხი უფლის წინაშე იმ ჭიშკრის შესასვლელში შაბათებსა და ახალმთვარობებში.

⁴და სრულადდასაწველი, რომელსაც შესწირავს მთავარი უფალს შაბათ დღეს, იქნება ექვსი უხინჯო კრავი და უხინჯო ვერძი,

⁵და პურეულის ძღვენი – ერთი ეფა ვერძზე, ხოლო ძღვენი კრავებზე – მისი ხელგაშლილობის მიხედვით, ხოლო ზეთი – ეფაზე ერთი ჰინი.

⁶ახალმთვარობის დღეს მან უნდა მოიყვანოს ერთი უხინჯო ხბო ნახირიდან, ასევე ექვსი უხინჯო კრავი და ერთი ვერძი, აგრეთვე უხინჯო.

⁷პურეულის ძღვენს ის მოიტანს ერთ ეფას ხბოზე და ერთ ეფას ვერძზე, ხოლო კრავებზე, მისი ხელგაშლილობის მიხედვით, და ზეთს ეფაზე ჰინს.

⁸და როდესაც მოვა მთავარი, კარიბჭის სტოას გზით შემოვა და იმავე გზით გავა.

⁹და როდესაც მოვა უფლის წინაშე ერი ქვეყნისა დღესასწაულებზე თაყვანისცემად, ჩრდილოეთის კარიბჭის გზით შემოსულნი სამხრეთის კარიბჭით უნდა გავიდნენ, ხოლო სამხრეთის კარიბჭის გზით შემოსულნი ჩრდილოეთის კარიბჭით უნდა გავიდნენ. არ უნდა გავიდნენ იმავე კარიბჭის გზით, რომლითაც შემოვიდნენ, არამედ მოპირდაპირეთი უნდა გავიდნენ.

¹⁰და მთავარიც მათ შორის უნდა იყოს; მათი შემოსვლისას შემოვა და მათი გასვლისას გავა.

¹¹და დღესასწაულებში და საზეიმო დღეებში მისი პურეულის ძღვენი უნდა იყოს: ერთი ეფა ხბოზე და ერთი ეფა ვერძზე, ხოლო კრავებზე – მისი შეძლებისდაგვარად, და ზეთი – ერთი ჰინი ეფაზე.

¹²და თუ მთავარს სურს უფალს შესწიროს სრულადდასაწველი ან სამადლობელო მსხვერპლი, უნდა გაუღონ მას აღმოსავლეთით მიქცეული კარიბჭე, და ის შეასრულებს თავის სრულადდასაწველს და თავის სამადლობელო მსხვერპლშეწირვას ისევე, როგორც შეასრულა შაბათის დღეს, და ამის შემდეგ ის გავა და დაიხურება კარიბჭე.

¹³ყოველდღე შესწირე უფალს სრულადდასაწველად უხინჯო თოხლი; ყოველ განთიადზე შესწირე.

¹⁴და პურეულის ძღვენი მოუტანე მას განთიადზე ეფის მეექვსედი და ზეთი ჰინის მესამედი, რათა მოზილოს განმტკიცული ფქვილი. ესაა საუკუნო წესი უფლისთვის პურეულის მიძღვნისა.

¹⁵და მოამზადონ კრავი და პურეულის ძღვენი და ზეთი განთიადზე – სამუდამო სრულადდასაწველად.

¹⁶ასე ამბობს უფალი ღმერთი: თუ მთავარი თავისი მემკვიდრეობიდან საბოძვარს აძლევს თავის ძეთაგან რომელიმეს, მის ძეთა მემკვიდრეობაც იქნება იგი; ეს საკუთრება მემკვიდრეობითი უნდა გახდეს.

¹⁷და თუ ის თავისი სამკვიდრებლიდან თავის რომელიმე მსახურთაგანს რაიმეს უბოძებს, მისი იქნება ეს საჩუქარი მისი გათავისუფლების წლამდე, შემდეგ კი მთავარსვე დაუბრუნდება. მხოლოდ მის ძეებზე გადადის მთავრის მემკვიდრეობა.

¹⁸ვერ აიღებს მთავარი ხალხის სამკვიდრებლიდან რაიმეს საკუთრებიდან მათი გამოძევებით. მხოლოდ თავისი საკუთრებიდან დაუმკვიდრებს თავის ძეთ, რათა ჩემი ხალხიდან არავინ იქნეს გამოძევებული თავისი სამკვიდრებლიდან.

¹⁹და მიმიყვანა შესასვლელთან, რომელიც კარიბჭის გვერდით არის, მღვდელთა წმიდა სენაკებთან, რომლებიც ჩრდილოეთითაა მიქცეული, და მიჩვენა იქ ერთი ადგილი კიდეზე, დასავლეთით.

²⁰და მითხრა: ეს არის ადგილი, სადაც მღვდლები ხარშავენ დანაშაულისა და ცოდვის მსხვერპლს, სადაც აცხობენ პურეულის ძღვენს, რათა არ იქნეს გატანილი გარეთა ეზოში, რომ არ შეეხოს ხალხი სიწმიდეს.

²¹და გამიყვანა გარეთა ეზოში და მომატარა ეზოს ოთხივე კუთხე. და, აჰა, ეზო ეზოს ყოველ კუთხეში.

²²ეზოს ოთხივე კუთხეში ჩაკეტილი ეზოები იყო, 40 წყრთა სიგრძით და 50 სიგანით. ერთი ზომისა ოთხივე კუთხეში.

²³და მათ ოთხივეს ირგვლივ – კედლები, და კედლებში ირგვლივ დატანებული იყო ცეცხლის კერები.

²⁴და მითხრა: ესაა სამზარეულოები, სადაც ტაძრის მსახურნი ხალხისგან შეწირულ მსხვერპლს ხარშავენ.