Read სბს–2013 ეზეკიელი 47 Bible Online

ეზეკიელი 47 - სბს–2013 bible

ეზეკიელი 47

¹და დამაბრუნა ტაძრის კართან და, აჰა, წყალი გამოდის ტაძრის ზღურბლის ქვეშიდან აღმოსავლეთისაკენ, რადგან ტაძარი პირით აღმოსავლეთისაკენ იდგა, და წყალი ჩამოდიოდა ტაძრის მარჯვენა მხრის ქვეშიდან, სამსხვერპლოს სამხრეთით.

²და გამომიყვანა ჩრდილოეთის კარიბჭით, და გარეთა გზით გამატარა გარეთა კარიბჭისაკენ, იმ გზით, რომელიც აღმოსავლეთით მიდიოდა; და, აჰა, წყალი მოედინება მარჯვენა მხრიდან.

³როდესაც ეს კაცი წავიდა აღმოსავლეთით, მას ხელში ლარი ეჭირა და გადაზომა ათასი წყრთა და გამიყვანა წყალში – წყალი კოჭებამდე მწვდებოდა.

⁴კვლავ გადაზომა ათასი და გამიყვანა წყალში – მუხლებამდე მწვდებოდა წყალი; და კვლავ გადაზომა ათასი და კვლავ გამიყვანა წყალში – წყალი ამჯერად წელამდე მწვდებოდა.

⁵და კვლავ გადაზომა ათასი – და ისეთი დინება იყო, რომლის გადალახვა არ შემეძლო, რადგან აიწია წყალმა. წყალი გადასაცური იყო, დინების გადალახვა კი შეუძლებელი იყო.

⁶და მითხრა მან: ნახე, ადამის ძევ? და წამიყვანა და დამაბრუნა მდინარის ნაპირას.

⁷და როდესაც დავბრუნდი, მდინარის ნაპირებზე მრავალი ხე დავინახე, ორივე მხარეს.

⁸და მითხრა მან: ეს წყალი მიედინება დედამიწის აღმოსავლეთის მხარეს, გადაივლის ტრამალს და ჩაედინება ზღვაში, რომლის წყალსაც გააჯანსაღებს.

⁹და ყოველი სულიერი არსება, რომელიც იძვრის ყველგან, სადაც ეს ორი ნაკადი ჩაივლის, გაცოცხლდება, და გამრავლდება თევზი, რადგან სადაც ეს წყლები ჩაივლის, ყველაფერი განიკურნება და გაცოცხლდება.

¹⁰და დადგებიან მასთან მებადურნი ყენ-გედიდან ყენ-ეგლაიმამდე, ბადეებს მოისვრიან. ისეთივე იქნება მათი თევზი, როგორც დიდი ზღვისა; და უამრავი იქნება თევზი.

¹¹მისი ჭაობები და მისი ჭყანტობები არ განიკურნება – მარილისთვის დარჩება.

¹²მდინარის ორსავე ნაპირას გაიზრდება ყველანაირი ნაყოფიერი ხე, ფოთოლი რომ არ დაუჭკნება და ნაყოფი რომ არ მოელევა. ყოველ თვეს დამწიფდება ახალი ხილი, რადგან მისთვის წყალი საწმიდრიდან გამოედინება; და იქნება მათი ნაყოფი საჭმელად და მათი ფოთოლი – წამლად.

¹³ასე ამბობს უფალი ღმერთი: ესაა საზღვრები, რომელთა თანახმად უნდა დაუნაწილოთ მიწა, ისრაელის თორმეტ ტომს: იოსებს ექნება ორი წილი.

¹⁴და დაიმკვიდრეთ იგი, როგორც ერთმა, ისე მეორემ, თითოეულმა თანაბრად; რადგან ხელის აღმართვით შევფიცე თქვენს მამებს, რომ მათ მივცემდი ამ ქვეყანას, ამიტომაც თქვენი სამკვიდრო იქნება ეს ქვეყანა.

¹⁵ეს არის ამ ქვეყნის საზღვრები: ჩრდილოეთით დიდი ზღვიდან ხეთლონის გზის ცედადამდე.

¹⁶ხამათამდე, ბეროთამდე, სიბრაიმამდე, რომელიც დამასკოს საზღვარსა და ხამათის საზღვარს შორის არის მოქცეული, და შუა ხაცერ-ჰათიქონამდე, რომელიც ხავრანის საზღვართან მდებარეობს.

¹⁷საზღვარი გავა ზღვიდან ხაცარ-ყენონამდე, საზღვარი დამასკოსა და ცაფონის საზღვართან, ჩრდილოეთით, და ხამათის საზღვართან. ეს არის ჩრდილოეთის მხარე.

¹⁸აღმოსავლეთის მხრიდან ხავრანსა და დამასკოს შორის, და გალაადსა და ისრაელს შორის – იორდანე; ჩრდილოეთის საზღვრიდან აღმოსავლეთის ზღვამდე გადაზომე. ეს იქნება აღმოსავლეთის მხარე.

¹⁹და სამხრეთის საზღვარი – სამხრეთისაკენ თამარიდან მერიბათ-კადეშის წყლებამდე, მდინარის გაყოლებაზე დიდი ზღვისაკენ. და ეს არის სამხრეთის საზღვარი, სამხრეთით.

²⁰და დასავლეთის საზღვარი – დიდი ზღვა, სამხრეთის საზღვრიდან ხამათში მიმავალ გზამდე. ეს არის დასავლეთის საზღვარი.

²¹გაინაწილეთ წილისყრით ეს ქვეყანა თქვენს შორის, ისრაელის ტომების მიხედვით.

²²და გაანაწილეთ წილისყრით თქვენთვის და თქვენს შორის მცხოვრებ ხიზანთათვის, რომელთაც თქვენს შორის შობეს შვილები; და ისინიც, როგორც ისრაელის ძენი, ბუნებრივ მკვიდრთა თანასწორად უნდა ჩაითვალნენ, და თქვენთან ერთად უნდა იყარონ წილი ისრაელის ტომთა შორის.

²³და იმ ტომში, რომელშიც ხიზანი იცხოვრებს, იქ მისცემთ მას მის წილს, – ამბობს უფალი ღმერთი.