Read სბს–2013 ეზეკიელი 5 Bible Online

ეზეკიელი 5 - სბს–2013 bible

ეზეკიელი 5

¹შენ კი, ადამის ძევ, აიღე მჭრელი დანა და დალაქის სამართებელივით გადაიტარე თავზე და წვერზე. აიღე სასწორი და გაანაწილე თმა.

²ერთი მესამედი ცეცხლში დაწვი ქალაქის შუაგულში, როცა ალყის დღეები დასრულდება; აიღე მესამედი და მახვილით დაკეპე ქალაქის განაპირას; სხვა მესამედი კი ქარს გაატანე, და მე მახვილს ვიშიშვლებ მათ კვალზე.

³იქიდან მცირეოდენი აიღე და შენი სამოსლის კალთაში გამოიკარი.

⁴და მათგან კიდევ აიღე და ჩაყარე ცეცხლში და დაწვი. და გამოვა იქიდან ცეცხლი მთელ ისრაელის სახლზე.

⁵და ასე ამბობს უფალი ღმერთი: ეს იერუსალიმია! წარმართთა შორის დავადგინე მე იგი, და ქვეყნებია მის ირგვლივ.

⁶ის კი წინ აღუდგა ჩემს სამართალს და შესცოდა წარმართებზე მეტად და წინ აღუდგა ჩემს წესებს იმ ქვეყნებზე უარესად, რომლებიც მის ირგვლივაა; რადგან ჩემი სამართალი შეიჯავრეს და ჩემი წესებით არ დადიან.

⁷ამიტომ ასე ამბობს უფალი ღმერთი: რადგან ურჯულოებით გადააჭარბეთ წარმართებს, რომლებიც თქვენს ირგვლივ არიან, ჩემი წესებით არ დადიხართ და ჩემს სამართალს არ მიჰყვებით, და არც წარმართთა სამართალს, რომლებიც თქვენს ირგვლივ არიან.

⁸ამიტომ ასე ამბობს უფალი ღმერთი: აჰა, მეც შენს წინააღმდეგ ვიქნები და შენს შიგნით აღვასრულებ სამართალს წარმართთა თვალწინ.

⁹და გაგიკეთებ იმას, რაც არასოდეს გამიკეთებია და რის მსგავსსაც მეტად აღარ გავაკეთებ მთელი შენი სისაძაგლის გამო.

¹⁰ამიტომ თქვენში მამები შვილებს დაუწყებენ ჭამას და შვილები შეჭამენ თავიანთ მამებს; და აღვასრულებ შენში სამართალს და გავფანტავ მთელ შენს ნატამალს ყველა ქარისაკენ.

¹¹და თუ ვყოფილვარ! – ამბობს უფალი ღმერთი, – იმიტომ, რომ ჩემი საწმიდარი შებილწე შენი ყოველი სისაძაგლით და შენი ყოველი საზიზღრობით, მე დაგამცირებ შენ, და არ შეგიბრალებს ჩემი თვალი და არც მე დაგინდობ.

¹²შენი მესამედი შავი ჭირით დაიხოცება და სხვა მესამედი შიმშილით გაწყდება შენ შორის, მესამედი მახვილით დაეცემა შენს ირგვლივ, მესამედს ყველა ქარისაკენ გავფანტავ და მახვილს გავაშიშვლებ მათ კვალზე.

¹³და დასრულდება ჩემი რისხვა და დავაცხრობ ჩემს გულისწყრომას მათზე, და დავწყნარდები და გაიგებენ, რომ მე, უფალი ვლაპარაკობდი ჩემი ეჭვიანობისას, მათზე ჩემი რისხვის დასრულებისას.

¹⁴და მიგცემ შენ ასაოხრებლად და შესარცხვენად ხალხებს, შენს ირგვლივ რომ არიან, და ყოველი გამვლელის თვალში.

¹⁵და იქნები სამარცხვინოდ და სასაცილოდ, სალექსოდ და საშინელებად იმ ხალხებისათვის, შენს ირგვლივ რომ არიან, როცა აღვასრულებ შენზე მსჯავრს რისხვით და წყრომითა და სასტიკი სასჯელებით. მე, უფალი, ვლაპარაკობ ამას.

¹⁶როცა გავუშვებ მათკენ შიმშილის ულმობელ ისრებს, რომლებიც თქვენი დამღუპველნი იქნებიან, რადგან თქვენს დასაღუპად მოვავლენ, და შიმშილს გავაძლიერებ თქვენზე და შევმუსრავ თქვენს პურის მარაგებს.

¹⁷და მოგივლენთ შიმშილსა და მძვინვარე მხეცებს, და შენი შვილები მათ მსხვერპლად იქცევიან; და შავი ჭირი და სისხლი გადაგივლის და მახვილს მოვაწევ შენზე. მე, უფალი ვამბობ ამას!