Read სბს–2013 ეზეკიელი 7 Bible Online

ეზეკიელი 7 - სბს–2013 bible

ეზეკიელი 7

¹და იყო სიტყვა უფლისა ჩემდამი თქმული:

²შენ კი, ადამის ძევ, თქვი: ასე ამბობს-თქო უფალი ღმერთი: აღსასრული! აღსასრული მოადგა ისრაელის ქვეყანას ოთხივ მხრით.

³ახლა შენი აღსასრულიც დადგა; და მოვავლენ ჩემს რისხვას შენზე, და განგსჯი შენი გზებისამებრ, და თავს დაგათევ ყველა შენს სისაძაგლეს.

⁴და არ შეგიცოდებს ჩემი თვალი და არ შეგიწყალებ, რადგან შენი გზებისამებრ მოგიზღავ! და შენი სისაძაგლენი შენში იქნება და მიხვდებით, რომ მე ვარ უფალი!

⁵ასე ამბობს უფალი ღმერთი: უბედურება, გაუგონარი უბედურება მოდის!

⁶აღსასრული დგება, მოვიდა აღსასრული, თავს გატყდება, აჰა, მოვიდა!

⁷მოვიდა შენი რიგი, ამ ქვეყნის მკვიდრო! მოვიდა ჟამი, მოახლოებულია დღე შეშფოთებისა და არა მთებზე მხიარული ყიჟინისა.

⁸ახლა მალე გადმოგანთხევ ჩემს გულისწყრომას და დავასრულებ ჩემს რისხვას შენს მიმართ, და განგსჯი შენი გზებისამებრ, და შენ აგკიდებ ყველა შენს სისაძაგლეს.

⁹არ შეგიცოდებს ჩემი თვალი, და არ შეგიბრალებ. შენი გზებისამებრ მოგიზღავ. და შენი სისაძაგლენი შენთანვე იქნება და გაიგებთ, რომ მე ვარ უფალი შემმუსრველი!

¹⁰გაფრთხილდით, დადგა სასჯელის დღე! კვერთხი აყვავდა, ამპარტავნება გაიფურჩქნა.

¹¹ძალადობა აღდგა ბოროტეულის კვერთხად. არ დარჩება არაფერი არც მათგან, არც მათი სიმდიდრიდან, არც მათი ზარ-ზეიმიდან, და არც მათი ბრწყინვალებიდან.

¹²მოვიდა ჟამი, დადგა ის დღე. მყიდველო, ნუ გიხარია და, გამყიდველო, ნუ იგლოვ, რადგან უფლის რისხვა მოაწევს მთელ ამ ხმაურიან ბრბოზე.

¹³რადგან გამყიდველი გაყიდულს ვერ დაუბრუნდება, თუნდაც ცოცხლები დარჩნენ ისინი, რადგან წინასწარმეტყველური ხილვა მთელ მათ სიმრავლეზე არ შეიცვლება და თავისი ურჯულოებით სიცოცხლეს ვერავინ შეინარჩუნებს.

¹⁴ნაღარას დაჰკრავენ და განემზადებიან, მაგრამ აღარავინ იქნება ომში წამსვლელი, რადგან ჩემი წყრომაა მთელ მათ სიმრავლეზე.

¹⁵მახვილი გარეთაა, შავი ჭირი და შიმშილი კი სახლში. ვინც ველადაა, მახვილით მოკვდება, და ვინც ქალაქშია, შიმშილი და შავი ჭირი შეჭამს მას.

¹⁶მათ შორის გადარჩენილნი მთებისკენ გაიქცევიან და იქ იქნებიან როგორც ველის მტრედები; ყოველი მათგანი იკვნესებს თავისი ურჯულოების გამო.

¹⁷ყველას ჩამოსწყდება მკლავები და მუხლები მოეკვეთება.

¹⁸ძაძებს ჩაიცვამენ და კანკალი აიტანთ, სახეზე ყველას სირცხვილი დაეწერება და ყველა თავი გაქაჩლდება.

¹⁹თავიანთ ვერცხლს ქუჩებში გადაყრიან და მათი ოქრო სიბილწედ იქცევა; ოქრო-ვერცხლი ვერ იხსნის მათ უფლის წყრომის დღეს. სულს ვერ გაიძღობენ და სტომაქს ვერ ამოიყორავენ, რადგან იგი იყო მათი უკეთურების მიზეზი.

²⁰და თავიანთი სამკაულების მშვენიერებით გაამაყდნენ და თავიანთ სიბილწეთა და სისაძაგლეთა კერპები შექმნეს, ამიტომ სიბინძურედ ვაქცევ მას მათთვის.

²¹უცხოთა საძარცვავად გავხდი მას და ქვეყნის ბოროტთა ნადავლად, და ისინი შებღალავენ მას.

²²პირს ვიბრუნებ მათგან, და შებღალავენ ჩემს საუნჯეს, შიგ შემოვლენ მძარცველნი და შებღალავენ მას.

²³გააკეთე ჯაჭვი, რადგან ქვეყანა აივსო სისხლიანი ბოროტმოქმედებით და ქალაქი სავსეა ძალადობით.

²⁴მოვიყვან უპირსისხლიანესთ ხალხებიდან და ისინი დაიმკვიდრებენ მათ სახლებს. და გავანადგურებ მძლავრთა სიამაყეს, და შეიბღალებიან მათი სიწმიდენი.

²⁵დაღუპვა ახლოვდება და მშვიდობას დაუწყებენ ძებნას და არ იქნება ის.

²⁶უბედურება უბედურებაზე მოვა და ამბავი ამბავზე იქნება, და მოითხოვენ ხილვას წინასწარმეტყველისაგან, და რჯული დაეკარგება მღვდელს და რჩევა – უხუცესს.

²⁷მეფე იგლოვებს და მთავარი ძრწოლით აღივსება, და ქვეყნის ერს ხელი აუკანკალდება. მათი გზებისამებრ მოვექცევი მათ და მათი სიმართლისამებრ განვსჯი მათ; და გაიგებენ, რომ მე ვარ უფალი!