Read სბს–2013 დანიელი 11 Bible Online

დანიელი 11 - სბს–2013 bible

დანიელი 11

¹დარიოს მიდიელის პირველ წელს მე შემწედ და საყრდენად დავუდექი მას.

²„ახლა ჭეშმარიტებას გეტყვი: აჰა, სპარსეთში კიდევ სამი მეფე დადგება. მეოთხე კი ყველას გადააჭარბებს დიდძალი სიმდიდრით და, როდესაც თავისი სიმდიდრით გაძლიერდება, ყველას იავანის სამეფოს წინააღმდეგ აამხედრებს.

³აღდგება იქ ძლიერი მეფე, დიდი ძალაუფლებით იხელმწიფებს და, რასაც მოისურვებს, იმას გააკეთებს.

⁴მაგრამ როცა ის აღდგება, შეიმუსრება მისი სამეფო და ზეცის ოთხ ქარს გაუნაწილდება, მაგრამ არა მის შთამომავლებს, და არც იმ ხელმწიფებით, რომლითაც ხელმწიფებდა; რადგან დაქუცმაცდება მისი სამეფო და სხვების გახდება, და არა მათი.

⁵გაძლიერდება სამხრეთის მეფე, მაგრამ მასზე მეტად გაძლიერდება ერთ-ერთი მისი მთავართაგანი და ხელმწიფებას მოიხვეჭს. მისი ხელმწიფება დიდი ხელმწიფება იქნება.

⁶წლების მერე ისინი კავშირს შეკრავენ, და სამხრეთის მეფის ასული ჩრდილოეთის მეფესთან მივა წრფელი პირობის შესაკვრელად, მაგრამ ასული ვერ შეინარჩუნებს თავისი მკლავის ძალას და ვერც მეფე და მისი მოდგმა გაძლებს, და გადასცემენ მას თავისი ამალით, თავისი შვილებითა და თავისი შემწითურთ იმ ხანებში.

⁷მისი ფესვიდან მორჩი ამოვა, გამოილაშქრებს ჯარის წინააღმდეგ, ჩრდილოეთის მეფის ციხესიმაგრეში შეიჭრება, გაუსწორდება მათ და გაძლიერდება.

⁸თვით მათ ღმერთებს, მათ კერპებს, ძვირფას ჭურჭელს – ოქრო-ვერცხლისას წაიღებს ეგვიპტეში, და წლობით ამაღლდება ჩრდილოეთის მეფეზე.

⁹ის გაილაშქრებს სამხრეთის სამეფოზე, მაგრამ უკანვე დაბრუნდება თავის ქვეყანაში.

¹⁰მისი ვაჟები იარაღს აისხამენ და დიდ ურდოს შეყრიან; და ერთ-ერთი მათგანი წარღვნასავით წამოვა და გადაივლის. მერე შემობრუნდება და შეებრძოლება მის ციხესიმაგრემდე.

¹¹გამძვინვარდება სამხრეთის მეფე და გამოვა და შეებრძოლება ჩრდილოეთის მეფეს. იგი დიდ ურდოს გამოიყვანს, მაგრამ ეს ურდო ხელში ჩაუვარდება მის მოწინააღმდეგეს.

¹²და გამხნევდება ურდო და აღზევდება მეფე, 10 ათასებს დასცემს, მაგრამ ამით ვერ გაძლიერდება.

¹³რადგან ჩრდილოეთის მეფე დაბრუნდება და პირვანდელზე დიდ ურდოს შეყრის, და რამდენიმე წლის შემდეგ მოვა დიდი ურდოთი და კარგად შეიარაღებული.

¹⁴იმ ხანებში მრავალნი აღუდგებიან სამხრეთის მეფეს და მეამბოხენი წამოიმართებიან შენი ხალხიდან, რათა აღსრულდეს ხილვა, მაგრამ დაეცემიან ისინი.

¹⁵მოვა ჩრდილოეთის მეფე, მიწაყრილებს მოაწყობს და გამაგრებულ ქალაქს დაიპყრობს. სამხრეთის ძალები ვერ გაუწევენ წინააღმდეგობას და ვერც რჩეული მხედრობა; აღარ იქნება ძალა წინააღმდეგობისთვის.

¹⁶მის წინააღმდეგ გამოსული მასვე დაემორჩილება და წინ ვერავინ აღუდგება. იგი მშვენიერ ქვეყანაში დასცემს თავის ბანაკს და მის ხელთ იქნება იმ ქვეყნის დაღუპვა.

¹⁷განიზრახავს, რომ გაილაშქროს მთელი თავისი სამეფოს ძლიერებით და თავისი მთავრებითურთ სამხრეთის სამეფოს წინააღმდეგ, და ამ განზრახვას შეასრულებს კიდეც; და თავის ასულს ცოლად მისცემს მას, რათა დაღუპოს, მაგრამ ეს განზრახვა არ აღსრულდება, და ვერც ვერაფერს ისარგებლებს აქედან.

¹⁸პირს კუნძულებისკენ იბრუნებს და მრავალს დაიპყრობს; მაგრამ ერთი მთავარი აღკვეთს მისგან შერცხვენას, და მისგან შერცხვენას მასვე შეაჭმევს.

¹⁹ამის შემდეგ თავისი ქვეყნის ციხესიმაგრეებისაკენ იბრუნებს პირს, მაგრამ წაიფორხილებს, დაეცემა და ვეღარსად იპოვიან.

²⁰მის ნაცვლად სხვა დადგება, რომელიც გზირებს დაგზავნის, რომ მეფეს პატივი მიაგონ; მაგრამ ის რამდენიმე დღეში დაიღუპება, რისხვისა და ბრძოლის გარეშე.

²¹მის ნაცვლად საძულველი კაცი დადგება, რომელსაც სამეფო პატივს არ მიაგებენ. იგი უჩუმრად შემოიპარება და მზაკვრობით დაეუფლება სამეფოს.

²²წამლეკავი ურდოები წაილეკებიან და შეიმუსრებიან მის მიერ, და თვით აღთქმის მთავარიც.

²³რადგან მასთან კავშირის შეკვრის შემდეგ, მზაკვრულად იმოქმედებს, აღზევდება და გაძლიერდება ერთი მუჭა ხალხის შემწეობით.

²⁴ქვეყნის მშვიდსა და ნაყოფიერ მხარეებში შეიჭრება და ისეთ რამეს ჩაიდენს, რაც არც მის მამებს და არც მის მამის მამებს ჩაუდენიათ; ნაალაფარს და ნაძარცვ დოვლათს გაუნაწილებს თავისიანებს, ციხესიმაგრეებისკენ ექნება ზრახვები, მაგრამ ეს გაგრძელდება გარკვეულ დრომდე.

²⁵აღძრავს თავის ძალასა და გულს სამხრეთის მეფის წინააღმდეგ დიდძალი ურდოთი; სამხრეთის მეფეც დიდძალი და მეტისმეტად ძლიერი ლაშქრით გამოვა საომრად, მაგრამ მას ვერ გაუძლებს, რადგან მის წინააღმდეგ ვერაგობას ექნება ადგილი.

²⁶მისი თანამეინახენი დაღუპავენ მას. განადგურდება მისი ლაშქარი და მრავალი მოკლული დაეცემა.

²⁷ორთავე მეფეს გულში მზაკვრობა ექნება. სიცრუეს ილაპარაკებენ ერთ სუფრაზე, მაგრამ ვერ წარემართებათ, რადგან აღსასრული კვლავ მოსასვლელია დათქმულ ჟამამდე.

²⁸დიდძალი დოვლათით გაბრუნდება ის თავის ქვეყანაში, მაგრამ გული წმიდა აღთქმის წინააღმდეგ ექნება მიმართული. შეასრულებს მას და თავის ქვეყანაში დაბრუნდება.

²⁹დათქმულ ჟამს დაბრუნდება და მოვა სამხრეთში, მაგრამ პირვანდელივით არ იქნება ეს უკანასკნელი ლაშქრობა.

³⁰ქითიმის ხომალდები წამოვლენ მის წინააღმდეგ, და დაფრთხება იგი და უკან გაბრუნდება, და გაშმაგდება წმიდა აღთქმაზე, და აღასრულებს თავის განზრახვას, და კვლავ შეეკვრება წმიდა აღთქმისგან განდგომილთ.

³¹და წამოვა მისი ურდოების ნაწილი და შებილწავენ ძლიერების საწმიდარს, და გააუქმებენ ყოველდღიურ მსხვერპლს, და გატიალების სიბილწეს დაამყარებენ.

³²აღთქმის მიმართ უკეთურად მოქმედთ მზაკვრობით მიიმხრობს; თავისი ღმერთის მცოდნე ხალხი კი მტკიცედ დადგება და იმოქმედებს.

³³გონიერი ხალხი კი მრავალთ მოიყვანენ გონთ, თუმცა კი ერთხანს ევნებიან მახვილით, ცეცხლით, ტყვეობითა და ძარცვით;

³⁴დევნულობისას მცირეოდენ შეწევნას მიიღებენ, და მრავალნი შეუერთდებიან მათ, თუმცა კი თვალთმაქცურად.

³⁵ზოგიერთი გონიერი დაეცემა, რათა გამოიცადოს, განიწმიდოს და განსპეტაკდეს უკანასკნელ ჟამებამდე, რადგან ჯერ კიდევ არის დრო დათქმულ ვადამდე.

³⁶თავის ნებაზე მოიქცევა ის მეფე, თავს აღიზევებს და განიდიდებს ყველა ღმერთზე მაღლა და საშინელებებს ილაპარაკებს ღმერთთა ღმერთზე, და წარმატებული იქნება, ვიდრე დადგებოდეს რისხვის ჟამი, რადგან რაც განისაზღვრა, აღსრულდება.

³⁷იგი არც მამების ღმერთებს ჩააგდებს რამედ, არც ქალთა სანუკვარს და არც ყველა სხვა ღმერთს მიაგებს პატივს, რადგან ყველა მათზე განიდიდებს თავს.

³⁸სამაგიეროდ ციხესიმაგრეთა ღმერთს განადიდებს, ღმერთს, რომელსაც მისი მამები არ იცნობდნენ, ოქრო-ვერცხლით, ძვირფასი ქვებითა და სხვა ძვირფასეულობით განადიდებს.

³⁹და აუგებს მტკიცე ციხესიმაგრეებს უცხო ღმერთს, რომელიც მის ამღიარებელთ პატივს გაუმრავლებს, და ხელმწიფებას მისცემს მრავალზე და მიწებს დაურიგებს ჯილდოდ.

⁴⁰აღსასრულის ჟამს სამხრეთის მეფე შეებმება მას და ქარტეხილივით ეკვეთება ჩრდილოეთის მეფე ეტლებით, მხედრებითა და უამრავი ხომალდებით, დააცხრება მხარეებს, წალეკავს და გადაუვლის.

⁴¹შევა უმშვენიერეს ქვეყანაში, და მრავალი მხარე დაეცემა, და მის ხელს გადაურჩება ედომი, მოაბი და ყამონელთა დიდი ნაწილი.

⁴²ხელს მოუღერებს ქვეყნებს და ეგვიპტის ქვეყანაც კი ვერ გადარჩება.

⁴³დაეპატრონება იგი ეგვიპტის ოქრო-ვერცხლის საგანძურებსა და ყველა სხვა ძვირფასეულობას; ლიბიელნი და ქუშელნი.

⁴⁴მაგრამ აღმოსავლეთიდან და ჩრდილოეთიდან მოსული ხმები შეაწუხებენ მას და დიდი რისხვით გამოვა მრავალთა გასაწყვეტად და გასაჟლეტად.

⁴⁵დასცემს თავის სეფე-კარვებს ზღვასა და მშვენიერ წმიდა მთას შორის. მერე მიატანს თავის აღსასრულამდე და ვეღარავინ უშველის მას.“