Read სბს–2013 დანიელი 12 Bible Online

დანიელი 12 - სბს–2013 bible

დანიელი 12

¹„იმ დროს აღდგება მიქაელი, დიდი მთავარი, შენი ხალხის ძეთა მფარველად მდგომი; და ისეთი ვაების დრო მოვა, კაცის გაჩენიდან დღემდე რომ არ ყოფილა; იმ დროს შენი ხალხიდან ყველა გადარჩება, ვინც კი წიგნში იქნება ჩაწერილი.

²და მრავალი მიწის მტვერში მიძინებული გამოიღვიძებს, ზოგი საუკუნო სიცოცხლისათვის, ზოგი საუკუნო გმობისა და შერცხვენისათვის.

³გონიერნი გაბრწყინდებიან, როგორც ცის კამარის მნათობნი, და მრავალთა სამართლისკენ მომაქცეველნი, როგორც ვარსკვლავები უკუნითი უკუნისამდე.

⁴შენ კი, დანიელ, დაფარე ეს სიტყვები და დაბეჭდე ეს წიგნი უკანასკნელ ჟამამდე. მრავალნი გადაშლიან მას და დიდ ცოდნას ეზიარებიან.“

⁵მაშინ მე, დანიელმა, გავიხედე და, აჰა, ორი სხვა დგას: ერთი მდინარის გამოღმა ნაპირზე, ერთი გაღმა ნაპირზე.

⁶უთხრა მან სელით შემოსილ კაცს, მდინარის წყლებზე რომ იდგა: „როდის იქნება ამ საოცრებათა ბოლო?“

⁷მოვუსმინე სელით შემოსილ კაცს, მდინარის წყლებზე რომ იდგა. ზეცისკენ აღაპყრო მან მარჯვენა და მარცხენა და დაიფიცა მარადცოცხალი: „ეს იქნება დათქმული ჟამისა და ჟამის ნახევრისთვის. და როდესაც გათავდება წმიდა ერის ძალის მუსვრა, ყოველივე ეს აღსრულდება.“

⁸მესმოდა, მაგრამ ვერ ვხვდებოდი და ვუთხარი: „უფალო ჩემო, რა იქნება ამის შემდეგ?“

⁹და თქვა მან: „წადი, დანიელ, რადგან ეს სიტყვები დაფარული და დაბეჭდილია ბოლო ჟამამდე.

¹⁰მრავალი განიწმიდება, განსპეტაკდება და გამოხურდება; ხოლო ურჯულონი ურჯულოებაში დარჩებიან; და ვერც ერთი ურჯულო ვერ ჩასწვდება ამას, ხოლო ბრძენნი ჩასწვდებიან.

¹¹მუდმივი მსხვერპლის გაუქმებისა და გატიალების სიბილწის დადგომიდან 1 250 დღე გავა.

¹²ნეტარია, ვინც დაელოდება და მიაწევს 1 335 დღეს.

¹³შენ კი გასწიე შენი აღსასრულისაკენ, და დაისვენე, და აღდგები შენი წილის მისაღებად დღეთა დასასრულისას.“