Read სბს–2013 დანიელი 5 Bible Online

დანიელი 5 - სბს–2013 bible

დანიელი 5

¹მეფე ბელშაცარმა დიდი ლხინი გაუმართა თავის ათას დიდებულს და იმ ათასის თვალწინ სვა ღვინო.

²ღვინით გალეშილმა ბელშაცარმა ბრძანა, მოერთმიათ მისთვის ოქროს და ვერცხლის თასები, რომლებიც ნაბუქოდონოსორს, მამამისს, ჰქონდა წამოღებული იერუსალიმის ტაძრიდან, რათა მეფეს, მის დიდებულებს, მის ცოლებსა და ხარჭებს იმეებით ესვათ.

³მოიტანეს ის ოქროს თასები, რომლებიც წამოღებული იყო იერუსალიმის ტაძრიდან. იმ თასებით სვამდნენ მეფე, მისი დიდებულები, მისი ცოლები და ხარჭები.

⁴სვამდნენ ისინი ღვინოს და ადიდებდნენ ოქროს, ვერცხლის, ბრინჯაოს, რკინის, ხისა და ქვის ღმერთებს.

⁵სწორედ მაშინ გამოჩნდა ადამიანის ხელის თითები და სასანთლის წინ, მეფის სასახლის კედლის ბათქაშზე წერა იწყეს. როდესაც მეფემ დაინახა ხელის მტევანი, რომელიც წერდა,

⁶ფერი ეცვალა; ფიქრებმა შეაშფოთეს, წელი მოსწყდა და მუხლების კანკალი აუტყდა.

⁷ხმამაღლა იყვირა მეფემ, რათა მოეყვანათ შემლოცველები, ქალდეველები და მკითხავები. მეფემ უთხრა ბაბილონელ ბრძენკაცებს: „ვინც ამ წარწერას წაიკითხავს და მის მნიშვნელობას ამოხსნის, ძოწეულით შევმოსავ, კისერზე ოქროს შიბს ჩამოვკიდებ და ქვეყანაში მესამე იქნება მთავართა შორის.“

⁸მოვიდა მეფის ყველა ბრძენკაცი, მაგრამ წარწერის წაკითხვა და მეფისათვის მისი მნიშვნელობის ახსნა ვერ შეძლეს.

⁹მაშინ ძლიერ აღშფოთდა მეფე ბელშაცარი და სახეზე ფერი ეცვალა. აფორიაქდნენ მისი დიდებულებიც.

¹⁰მეფისა და დიდებულების ლაპარაკზე სანადიმო დარბაზში დედოფალი შემოვიდა. მიუგო დედოფალმა მეფეს და უთხრა: „მეფეო, იცოცხლე უკუნისამდე! ფიქრებმა ნუ შეგაკრთეს და ნუ გაფითრებულხარ!

¹¹შენს სამეფოში არის ერთი კაცი, რომელშიც წმიდა ღმერთის სულია. მამაშენის დროს მასში აღმოჩნდა ნათელი, გონიერება და სიბრძნე – ღმერთების სიბრძნის დარი. მამაშენმა, მეფე ნაბუქოდონოსორმა, მისნების, შემლოცველების, ქალდეველებისა და გრძნეულების მთავრად დააყენა ის,

¹²რადგან მასში, დანიელში, რომელსაც მეფემ ბელტეშაცარი დაარქვა, აღმოჩნდა საკვირველი სული, ცოდნა და გონიერება და უნარი სიზმრების ახსნისა, იგავთა განმარტებისა და კვანძების გახსნისა. ახლა დანიელს უხმე და ის აგიხსნის.“

¹³მაშინ მოიყვანეს დანიელი მეფის წინაშე. მიუგო მეფემ დანიელს და უთხრა: „შენა ხარ ის დანიელი, ტყვე იუდაელთაგანი, რომლებიც მამაჩემმა, მეფემ, იუდადან წამოასხა?

¹⁴შენზე გაგონილი მაქვს, რომ შენში ღვთის სულია და ნათელი, გონიერება და საკვირველი სიბრძნე.

¹⁵ახლახან ბრძენკაცები და შემლოცველები მყავდნენ მოყვანილნი ჩემს წინაშე წარწერის წასაკითხად და მის ასახსნელად; მაგრამ მათ ვერ შეძლეს მისი ახსნა.

¹⁶შენზე გაგონილი მაქვს, რომ შენ შეგიძლია მნიშვნელობის ახსნა და კვანძების გახსნა. თუ შენ ახლა შეძლებ ამ წარწერის ამოკითხვას და ამიხსნი მას, ძოწეულით შეგმოსავ, ყელზე ოქროს შიბს ჩამოგკიდებ და სამეფოში მესამე იქნები ჩემს მთავრებში.“

¹⁷მაშინ მიუგო დანიელმა მეფეს და უთხრა: „შენი საჩუქარი შენვე გქონდეს და შენი ძღვენი სხვას მიეცი. წარწერას კი მე წავუკითხავ მეფეს და მის მნიშვნელობასაც ვაუწყებ.

¹⁸მეფეო, მაღალმა ღმერთმა უბოძა მამაშენს, ნაბუქოდონოსორს, სამეფო, სიდიადე, პატივი და დიდება.

¹⁹ღვთის მიერ ნაბოძები დიდების გამო ყველა ხალხი, ტომი და ენა მის წინაშე ძრწოლასა და შიშს მოეცვა. ვისაც უნდოდა, ჰკლავდა, ვისაც უნდოდა, ცოცხალს ტოვებდა, ვისაც უნდოდა, აღამაღლებდა და ვისაც უნდოდა, დაამდაბლებდა.

²⁰მაგრამ, როდესაც გული აღიმაღლა და სული ამპარტავნებით აივსო, სამეფო ტახტიდან ჩამოგდებულ იქნა და პატივაყრილი.

²¹მოკვეთილ იქნა ადამიანის ძეთაგან, გულმხეცი გახდა და კანჯრებთან დაიდო ბინა. ბალახს აჭმევდნენ, როგორც ხარს და მისი ტანი ციური ცვარით ინამებოდა, ვიდრე არ შეიგნო, რომ უზენაესი ხელმწიფებს კაცთა სამეფოზე და, ვისაც უნდა, იმას აძლევს მეფობას.

²²შენ, ბელშაცარმა, მისმა ძემ, გული არ დაიმდაბლე, თუმცა იცოდი ეს ყველაფერი,

²³არამედ აღზევდი ცათა უფლის წინააღმდეგ. შენს წინაშე მოიტანეს მისი ტაძრის თასები და შენ, შენი დიდებულები, შენი ცოლები და ხარჭები იმით სვამდით ღვინოს. ადიდებდი ვერცხლის, ოქროს, ბრინჯაოს, რკინის, ხისა და ქვის ღმერთებს, რომელნიც ვერ ხედავენ, არ ესმით და ვერ აზროვნებენ. ის ღმერთი, რომლის ხელშიც შენი სიცოცხლე და ყოველი შენი გზა-სავალია, არ განადიდე.

²⁴ამიტომაც მოივლინა მისგან ხელის მტევანი და დაიწერა ეს წარწერა.

²⁵აჰა, წარწერა, რომელიც დაიწერა: მენე, მენე, თეკელ უფარსინ.

²⁶აჰა, ამ სიტყვების მნიშვნელობა: მენე – აღრიცხა ღმერთმა შენი სამეფო და ბოლო მოუღო მას.

²⁷თეკელ – სასწორზე აიწონე და მსუბუქი აღმოჩნდი.

²⁸ფერეს – გაიყო შენი სამეფო და მიდიელებსა და სპარსელებს გადაეცა იგი.“

²⁹მაშინ ბრძანა მეფე ბელშაცარმა და დანიელს ძოწეული ჩააცვეს, კისერზე ოქროს შიბი შეაბეს და გამოაცხადეს, რომ იგი სამეფოში მესამე მთავარი იყო.

³⁰იმავე ღამეს იქნა მოკლული ბელშაცარი, ქალდეველთა მეფე.

³¹და დარიოს მიდიელმა 62 წლისამ მიიღო სამეფო.