Read სბს–2013 დანიელი 9 Bible Online

დანიელი 9 - სბს–2013 bible

დანიელი 9

¹პირველ წელს, დარიოს ახაშვეროშის ძის მეფობისა, მოდგმით მიდიელისა, რომელიც ქალდეველთა სამეფოზე გამეფდა,

²სწორედ მისი მეფობის იმ პირველ წელს მე, დანიელმა, წიგნებით გავიგე იმ წლების რიცხვი, რომელთა შესახებაც იყო უფლის სიტყვა იერემია წინასწარმეტყველისადმი, რომ 70 წელიწადი შეუსრულდებოდა იერუსალიმის ნანგრევებს.

³პირი ვიბრუნე უფალი ღმერთისაკენ, რათა პასუხი მიმეღო ლოცვით და ვედრებით, მარხვით, ჯვალოთი და მიწა-მტვრის დაყრით.

⁴ვილოცე ჩემი უფალი ღმერთის მიმართ, ვაღიარე და ვუთხარი: „ჰოი, უფალო ჩემო, ღმერთო დიდებულო და მრისხანეო, რომელიც უნახავ აღთქმასა და წყალობას შენს მოყვარულებს და შენი მცნებების დამცველთ!

⁵ჩვენ შევცოდეთ და უკეთურება ჩავიდინეთ; ურჯულოდ ვიქცეოდით; გავჯიუტდით და გადავუხვიეთ შენს მცნებებსა და წესებს.

⁶ყურს არ ვუგდებდით შენს მსახურებს – წინასწარმეტყველთ, რომლებიც შენი სახელით ელაპარაკებოდნენ ჩვენს მეფეებს, ჩვენს მთავრებს, ჩვენს მამებსა და მთელი ქვეყნის ხალხს.

⁷უფალო, შენა ხარ მართალი, ხოლო ჩვენ – სახე შერცხვენილნი, დღეს, – იუდას კაცნი, იერუსალიმის მკვიდრნი, მთელი ისრაელი, ახლობლები და შორეულები ყველა იმ ქვეყანაში, სადაც შენ განდევნე იმ სიმუხთლის გამო, რომლითაც შენ გიმუხთლეს.

⁸უფალო, სირცხვილი გვაწერია სახეზე, ჩვენს მეფეებს, ჩვენს მთავრებსა და ჩვენს მამებს, რადგან შეგცოდეთ შენ,

⁹ჩვენს უფალსა და ჩვენს ღმერთს; შეწყალებასა შენსა და პატიებასა შენსა განვუდექით

¹⁰და ყურს არ ვუგდებდით უფლის, ჩვენი ღმერთის, ხმას, რათა გვევლო მისი რჯულდებებით, თავისი მსახურების – წინასწარმეტყველების – ხელით რომ დაგვიდო წინ.

¹¹მთელი ისრაელი გადავიდა შენი რჯულიდან და გადაუხვია, რათა შენი ხმა არ მოესმინა. ამიტომაც გადმოინთხა ჩვენზე ის წყევლა და ფიცი, რომელიც ღვთის მსახურის, მოსეს, რჯულში სწერია, რადგან შევცოდეთ მას.

¹²შეასრულა მან თავისი სიტყვა, რომელიც ნათქვამი ჰქონდა ჩვენი და ჩვენი მსაჯულების წინააღმდეგ, სამართალს რომ გვიდგენდნენ, და თავს დიდი უბედურება დაგვატეხა. მთელს ცისქვეშეთში იმის მსგავსი არაფერი მომხდარა, რაც იერუსალიმში მოხდა.

¹³როგორც მოსეს რჯულში სწერია, ყველა ეს უბედურება დაგვატყდა თავს; მაგრამ ჩვენ მაინც არ შევევდრეთ უფალს, ჩვენს ღმერთს, რათა მიგვეტოვებინა ჩვენი უკეთურება და შენი ჭეშმარიტება შეგვეგნო.

¹⁴ამიტომაც დაგვატეხა თავს უფალმა ეს უბედურება. რადგან მართალია უფალი, ჩვენი ღმერთი, ყველა მის საქმეში, მაგრამ ჩვენ ყურს არ ვუგდებდით მის ხმას.

¹⁵ახლა კი, უფალო, ღმერთო ჩვენო, რომელმაც შენი მტკიცე მარჯვენით გამოიყვანე შენი ერი ეგვიპტის ქვეყნიდან და სახელი მოიხვეჭე, დღეს რომ გაქვს! შევცოდეთ ჩვენ და უკეთურება ჩავიდინეთ.

¹⁶უფალო, მთელი შენი სიმართლით გაერიდოს შენი რისხვა და წყრომა შენს ქალაქს – იერუსალიმს, შენს წმიდა მთას; რადგან ჩვენი ცოდვებისა და ჩვენი მამების უკეთურების გამო არის იერუსალიმი და შენი ერი შეგინებული ყველა ჩვენს ირგვლივმყოფთაგან.

¹⁷ახლა კი, ჩვენო ღმერთო, ისმინე შენი მსახურის ლოცვა-ვედრება და შენი გულისთვის მოაპყარ შენი ნათელი სახე შენს გაპარტახებულ საწმიდარს, უფალო.

¹⁸ღმერთო ჩემო, ყური მომაპყარ და ისმინე, აახილე თვალი და მოხედე ჩვენს ნანგრევებსა და ქალაქს, შენი სახელი რომ ეწოდება. რადგან ჩვენი სიმართლის გამო კი არ მოგვაქვს შენს წინაშე ჩვენი სავედრებელი, არამედ შენი დიდი მოწყალების გამო.

¹⁹უფალო, ისმინე! უფალო, გვაპატიე! უფალო, ყური მოგვაპყარ და იმოქმედე, და ნუ დააყოვნებ, შენი გულისთვის, ღმერთო ჩემო! რადგან შენი სახელი ეწოდება შენს ქალაქს და შენს ერს.“

²⁰ჯერ კიდევ ვლაპარაკობდი და ვლოცულობდი და ვაღიარებდი ჩემი და ჩემი ერის, ისრაელის, ცოდვებს და მიმქონდა ჩემი სავედრებელი უფლის, ჩემი ღმერთის, წინაშე, ჩემი ღმერთის წმიდა მთაზე,

²¹ჯერ კიდევ ლოცვაში ვლაპარაკობდი, რომ გაბრიელი, ის კაცი წინა ხილვაში რომ მყავდა ნანახი, სწრაფი ფრენით მომიახლოვდა საღამოს მსხვერპლშეწირვისას.

²²შემაგონა, მელაპარაკა და მითხრა: „დანიელ! ახლა გამოვედი, რომ ჭკუა დაგარიგო.

²³შენი ვედრების დასაწყისში სიტყვა გამოვიდა და მე მოვედი, რომ შეგატყობინო, რადგან შენ სასურველი კაცი ხარ. გაიგე ეს სიტყვა და მიხვდი ხილვას.

²⁴შენი ერისთვის და შენი წმიდა ქალაქისთვის 70 შვიდეულია დადგენილი, რათა აღიკვეთოს დანაშაული, რათა ბოლო მოეღოს ცოდვებს, რათა შენდობილ იქნას უკეთურება, რათა დამყარდეს საუკუნო სამართლიანობა, რათა დაიბეჭდოს ხილვა და წინასწარმეტყველება და რათა ცხებულ იქნას წმიდათა წმიდა.

²⁵ოღონდ იცოდე და შეიგნე: იერუსალიმის აღდგენისა და აშენების ბრძანების გამოსვლიდან ცხებული მეფის მოსვლამდე, იქნება შვიდი შვიდეული. და 62 შვიდეულში აღდგება და აშენდება უბნები და ზღუდე, ოღონდ ძნელბედობის ჟამს.

²⁶62 შვიდეულის შემდეგ მოიკვეთება ცხებული და აღარავინ იქნება მასთან. ქალაქსა და საწმიდარს დაანგრევს მომავალი მბრძანებლის ხალხი, და მისი აღსასრული წარღვნასავით მოვა, და ომის ბოლომდე გაპარტახდება ყოველივე.

²⁷მრავალთათვის განამტკიცებს აღთქმას ერთ შვიდეულში, ხოლო ნახევარ შვიდეულში გააუქმებს მსხვერპლსა და ძღვენს. და ამ ადგილზე იქნება მოოხრების სისაძაგლე, და წინასწარ განსაზღვრული დაღუპვა ეწევა ამაოხრებელს.“