Read სბს–2013 რიცხვნი 18 Bible Online

რიცხვნი 18 - სბს–2013 bible

რიცხვნი 18

¹უთხრა უფალმა აარონს: „შენ და შენმა ძეებმა და შენმა მამისსახლმა შენთან ერთად უნდა იტვირთოთ შეცოდება საწმიდარში. და შენს ძეებთან ერთად უნდა იტვირთო დანაშაული თქვენს სამღვდელო მსახურებისას.

²შენი ძმები, ლევის ტომისა, გუნდი მამაშენისა შენ წაიყვანე, რათა შენთან იყვნენ განუყრელად და გემსახურონ, შენ და შენი ძენი კი საკრებულო კარვის წინ უნდა იყვნეთ.

³და ისინი უნდა გემსახურონ შენ და აღასრულონ კარვის მთელი სამსახური, ოღონდ არ უნდა მიეკარონ საწმიდრის ჭურჭელსა და საკურთხეველს, რათა არ დაიხოცნეთ თქვენცა და ისინიც.

⁴თან გახლდნენ შენ, და აღასრულონ საკრებულო კარვის სამსახური, კარვის ყოველი სამუშაო. და უცხო კაცი არ უნდა მოგეკაროთ თქვენ.

⁵აღასრულეთ საწმიდრისა და სამსხვერპლოს სამსახური, რათა მეტად აღარ მოვიდეს რისხვა ისრაელიანებზე.

⁶აჰა, მე გამოვირჩიე შენი ძმები, ლევიანები, ისრაელიანთაგან, და მოგეცით თქვენ, ძღვნად უფლისა, რათა აღასრულონ საკრებულო კარვის სამსახური.

⁷ხოლო შენ და შენმა ძეებმა აღასრულეთ თქვენი მღვდლობა სამსხვერპლოს ყველა წესით და ფარდის მიღმა, და იმსახურეთ; მღვდლობა თქვენთვის მომინიჭებია. თუ უცხოელი მიუახლოვდება მსახურებას, უნდა მოკვდეს.“

⁸უთხრა უფალმა აარონს: „აჰა, მე დაგავალე შენ მეთვალყურეობა ყოველ შემოწირულობაზე, ისრაელიანთა ყოველ წმიდა მსხვერპლზე, და მოგეცით სამღვდელო წილად შენ და შენს ძეებს საუკუნო წესით.

⁹აი, რა გეკუთვნის დიდი სიწმიდადან, საცეცხლო მსხვერპლიდან: ყოველი მათი პურეულის ძღვენი და ყოველი მათი ცოდვის მსხვერპლი, და ყოველი მათი დანაშაულის მსხვერპლი, რასაც მე ისინი მომიძღვნიან; ესაა დიდი სიწმიდე შენთვის და შენს ძეთათვის.

¹⁰უწმიდეს ადგილზე ჭამეთ იგი; ყოველ მამრს შუძლია ჭამოს იგი. სიწმიდე იყოს ის შენთვის.

¹¹ასევე გეკუთვნის შენ: წმიდა ძღვენი მათი შემოწირულობიდან, ისრაელიანთა ყოველი შესარხეველი მსხვერპლიდან შენ გაძლევ, შენს ძეებსა და შენს ასულებს შენთან ერთად სამარადისო წესად. შენს სახლში ყოველ სუფთას შეუძლია ჭამოს იგი.

¹²ყოველ შესაწირავს საუკეთესო ზეთისაგან, ყოველი საუკეთესო ღვინისაგან და საუკეთესო მარცვლეულისაგან, პირველმოწეულ ნაყოფთაგან, უფალს რომ უძღვნიან, შენ გაძლევ.

¹³და ყოველი პირველმოწეული ნაყოფი მათი მიწისა, როდესაც მიუტანენ უფალს, შენი იქნება. შენ სახლში ყოველ გასუფთავებულს შეუძლია ჭამოს იგი.

¹⁴ისრაელის მიწაზე ყფელაფერი დარისხებული შენ გეკუთვნის.

¹⁵ყოველი ხორციელის პირველნაშობი, რომელსაც მიუძღვნიან უფალს, ადამიანი იქნება თუ პირუტყვი, შენ გეკუთვნის. მაგრამ ადამიანთაგან პირმშო გამოსყიდულ უნდა იქნეს, და უწმიდური პირუტყვის პირველმოგებულიც გამოსყიდულ უნდა იქნეს.

¹⁶მისი გამოსასყიდია: ერთი თვის ასაკიდან გამოსასყიდი ფასი იქნება შენი შეფასების მიხედვით, ხუთ ვერცხლ შეკელად, საწმიდრის შეკელით – 20 გერაა.

¹⁷მაგრამ ძროხის, ცხვრის, ან თხის პირველმოგებულზე არ აიღო გამოსასყიდი: ისინი წმიდა ცხოველებია. მათი სისხლი მოაპკურე სამსხვერპლოზე და მათი ქონი დააკმიე საცეცხლო მსხვერპლად, კეთილსურნელებად უფლისათვის.

¹⁸და მათი ხორცი შენი იყოს ისევე, როგორც შესარხეველი მკერდი და მარჯვენა ბეჭი არის შენი.

¹⁹ყოველი წმიდა შესაწირავი, რასაც სწირავენ ისრაელიანები უფალს, შენთვის მომიცია, შენი ძეებისა და ასულებისათვის შენთან ერთად, საუკუნო წესად. ეს არის საუკუნო აღთქმა მარილისა უფლის წინაშე შენთვის და შენი შთამომავლობისათვის.“

²⁰და უთხრა უფალმა აარონს: „მათ ქვეყანაში ვერ დაიმკვიდრებ სამკვიდრებელს და წილი არ გექნება მათ შორის; მე ვარ შენი წილი და შენი სამკვიდრებელი ისრაელიანთა შორის.

²¹და ლევიანებს მე მივეცი ყოველი მეათედი ისრაელში სამკვიდრებლად, მათი სამსახურის სანაცვლოდ, რასაც ისინი ასრულებენ საკრებულო კარავში.

²²და ამიერიდან აღარ მიუახლოვდნენ ისრაელიანები საკრებულო კარავს, რომ არ დაიდონ ცოდვა და არ დაიხოცნენ.

²³და ემსახურონ ლევიანები საკრებულო კარავს და იტვირთონ თავიანთი ცოდვები. ეს საუკუნო წესია თქვენთვის თაობიდან თაობამდე; და ისრაელიანთა შორის არ მიიღონ მათ სამკვიდრებელი,

²⁴რადგან ისრაელიანთა მეათედი, რომელსაც შესაწირავად სწირავენ უფალს, მე ლევიანებს ვაძლევ სამკვიდროდ. ამიტომ ვუთხარი მათ: ისრაელიანთა შორის არ მიიღებთ-მეთქი სამკვიდრებელს.“

²⁵და ელაპარაკა უფალი მოსეს და უთხრა:

²⁶„განუცხადე ლევიანებს და უთხარი მათ: ‘როდესაც აიღებთ ისრაელიანთაგან მეათედს, რომელიც მე მოგეცით მათგან სამკვიდროდ, შესწირეთ მისგან უფალს შესაწირავი – მეათედი მეათედიდიდან.

²⁷და ჩაგეთვლებათ თქვენი შესაწირავი, როგორც მარცვლეული კალოდან და როგორც ღვინო საწნახლიდან.

²⁸ეგრე შესწირეთ თქვენც შესაწირავი უფალს ყოველი თქვენი მეათედიდან, რასაც აიღებთ ისრაელიანთაგან, და მისცემთ მისგან უფლის შესაწირავს აარონ მღვდელს;

²⁹ყველაფრიდან, რასაც მოგიძღვნიან, შესწირეთ უფალს, საუკეთესო ნაწილი უნდა შეიწიროს მისგან.’

³⁰და უთხარი მათ: ‘როცა შესწირავ საუკეთესოს მისგან, ეს ჩაეთვლება ლევიანთ, კალოს შემოსავლად და საწნახლის შემოსავლად.

³¹ჭამეთ ის ყოველ ადგილზე თქვენ და თქვენმა შვილებმა; რადგან ეს საზღაურია თქვენი სამსახურისათვის საკრებულო კარავში.

³²და არ დაგედებათ ამისათვის ცოდვა, როცა შესწირავთ საუკეთესოს მისგან ღალად; და ისრაელიანთა შემოწირულობანი არ შებილწოთ და არ დაიხოცებით.’“