Read სბს–2013 რიცხვნი 24 Bible Online

რიცხვნი 24 - სბს–2013 bible

რიცხვნი 24

¹და დაინახა ბალაამმა, რომ უფალს სურდა კურთხევა მიეცა ისრაელისათვის, და აღარ შეუდგა მისნობას, არამედ უდაბნოსაკენ იბრუნა პირი.

²გაიხედა ბალაამმა და დაინახა ტომებად დაწყობილი ისრაელი, და ღვთის სული გადმოვიდა მასზე.

³და წარმოთქვა ბალაამმა თავისი იგავი: „ნათქვამი ბალაამისა, ბეყორის ძისა, ნათქვამი თვალახელილი კაცისა,

⁴ნათქვამი ღვთის სიტყვის გამგონისა, ხილვათა მხილველისა ყოვლადძლიერისაგან; ეცემა, მაგრამ თვალახელილია:

⁵რა მშვენიერია შენი კარვები, იაკობ, შენი სადგომები, ისრაელ!

⁶როგორც გაშლილი მინდორ-ველი, როგორც ბაღები მდინარის პირას, როგორც უფლის დარგული ალოე, როგორც კედარნი წყლის ნაკადებთან:

⁷ცვარი მოსწვეთს მათი რტოებიდან, და მათი თესლი წყალუხვ ნაკადებთანაა. აგაგზე მეტად ამაღლდება მისი მეფე და უფრო აღზევდება მისი სამეფო!

⁸ღმერთი, რომელმაც ეგვიპტიდან გამოიყვანა იგი, გარეული ხარის ძალაა მისთვის, იგი შთანთქავს ხალხებს, რომლებიც მას მტრობენ, და მათ ძვლებს შემუსრავს, და განგმირავს თავისი ისრებით.

⁹ჩაიმუხლა, გაწვა ხვადი ლომივით, და ლომის ბოკვერივით; ვინ წამოაგდებს მას? კურთხეულია შენი მაკურთხეველი, და წყეულია შენი მაწყევარი.“

¹⁰რისხვით აინთო ბალაკი ბალაამის მიმართ, და ხელი ხელს შემოჰკრა და უთხრა ბალაამს: „მე ჩემი მტრების დასაწყევლად მოგიხმე, შენ კი მესამეჯერ ლოცავ მას.

¹¹ახლა კი გასწი, გაიქეცი აქედან შინისაკენ. მე ვიფიქრე, პატივს მოგაგებდი, მაგრამ აჰა, უფალი არ გაძლევს პატივს.“

¹²და უთხრა ბალაამმა ბალაკს: „განა არ ვუთხარი შენს მოციქულებს, რომლებიც მომიგზავნე,

¹³რომ თუნდაც ოქრო-ვერცხლით სავსე სახლი მომცეეს-მეთქი ბალაკმა, ვერ გადავალ ჩემი უფლის ბრძანებას. ვერც კარგს გავაკეთებ და ვერც ავს ჩემი ნებით; რასაც უფალი იტყვის, იმას ვიტყვი-მეთქი.

¹⁴და ახლა მე მივდივარ ჩემს ხალხთან. მოდი და იქ გაგიცხადებ, ბოლოს რასაც უზამს ეს ხალხი შენს ხალხს.“

¹⁵და წარმოთქვა მან თავისი იგავი: „ნათქვამი ბალაამისა, ბეყორის ძისა, ნათქვამი თვალახელილი კაცისა;

¹⁶ნათქვამი ღვთის სიტყვათა მომსმენისა, უზენაესის ზრახვის შემცნობისა, რომელიც ხედავს ხილვებს ყოვლადძლიერისა, და რომელიც ეცემა, მაგრამ თვალახელილია:

¹⁷მე ვხედავ მას, მაგრამ არა ახლა, მას ვუყურებ მე, მაგრამ არა ახლოდან – ამობრწყინდება ვარსკვლავი იაკობისგან, და აღიმართება კვერთხი ისრაელისგან, და შემუსრავს მოაბის საზღვრებს, და გაანადგურებს შეთის ყოველ ძეს.

¹⁸მის საკუთრებად იქცევა ედომი, და მისი მტრების საკუთრება იქნება სეყირი; და ისრაელი გამოაჩენს ძალას.

¹⁹დაეპატრონება იაკობისგან გამოსული, და გაჟლეტს ქალაქში გადარჩენილთ.“

²⁰და შეხედა მან ყამალეკს და წარმოთქვა თავისი იგავი, და თქვა: „ყამალეკი პირველია ხალხებს შორის, მაგრამ განადგურებაა მისი ბოლო.“

²¹და შეხედა კენიელთ და წარმოთქვა თავისი იგავი: „ძლიერია შენი სამყოფელი, და კლდეზე დაგიდვია ბუდე,

²²მაგრამ გაპარტახდება კაენი და მალე ტყვედ წაგიყვანს აშური.“

²³და წარმოთქვა ბალაამმა თავისი იგავი: „ვაი, ვაი, ვინ დარჩება ცოცხალი, როცა ამას მოახდენს ღმერთი?

²⁴გამოვლენ გემები ქითიმიდან და დაიმორჩილებენ აშურს, და დაიმორჩილებენ ყებერს, მაგრამ თავადაც დაიღუპებიან.“

²⁵და ადგა ბალაამი, და წავიდა და დაბრუნდა თავის ადგილას. და წავიდა ბალაკიც თავისი გზით.