Read სბს–2013 რიცხვნი 30 Bible Online

რიცხვნი 30 - სბს–2013 bible

რიცხვნი 30

¹და უთხრა მოსემ ისრაელის ტომთა მეთაურებს: „ასე ბრძანა უფალმა:

²თუ კაცი აღუთქვამს აღთქმას უფალს, ან დაიფიცებს ფიცით, ან რაიმეს აღიკვეთს, მან არ უნდა გატეხოს თავისი სიტყვა. ყველაფერი, რაც მისი პირიდან გამოვა, უნდა შეასრულოს.

³ქალი თუ აღუთქვამს აღთქმას უფალს და რაიმეს აღიკვეთს თავისი მამის სახლში, ყმაწვილქალობისას,

⁴და მამამისი გაიგებს მის აღთქმას და მის აღკვეთას, რაც აღიკვეთა, და არაფერს ეტყვის მამა, მაშინ უნდა ასრულდეს ყოველი მისი აღთქმა და ყოველი აღკვეთა, რაც აღუკვეთა თავის თავს.

⁵მაგრამ თუ დაუშლის მამა მას იმ დღეს, როცა გაიგებს, მაშინ ყოველი მისი აღთქმა და მისი აღკვეთა, რომელიც აღიკვეთა, ნუ ასრულდება და უფალი აპატიებს მას, რადგან მამამისმა დაუშალა მას.

⁶თუ იგი გათხოვდება, და მასზე მისი აღთქმები დარჩება, ანდა მის ბაგეს დაცდენილი სიტყვა, რითაც რაიმე აღიკვეთა,

⁷და როცა გაიგებს მისი ქმარი, და არაფერს იტყვის, მაშინ უნდა შესრულდეს მისი აღთქმები და მისი აღკვეთები, რაც აღიკვეთა.

⁸მაგრამ თუ ქმარი გაიგებს და დაუშლის მას, მაშინ მან უნდა გააუქმოს თავისი აღთქმა, რომელიც მასზეა, და მის ბაგეებს დაცდენილი სიტყვა, რითაც რაიმე აღიკვეთა, და უფალი აპატიებს მას.

⁹ქვრივისა და ქმარგაყრილის აღთქმა და ყოველივე, რაც აღიკვეთა, უნდა შესრულდეს.

¹⁰და თუ ცოლი ქმრის სახლში დადებს აღთქმას, ან რასმე აღიკვეთს,

¹¹და გაიგებს მისი ქმარი და არაფერს ეტყვის და არ დაუშლის, მაშინ უნდა შესრულდეს ყოველი მისი აღთქმა და ყოველი აღკვეთა, რაც აღიკვეთა.

¹²მაგრამ თუ გააუქმებს მათ მისი ქმარი, როცა გაიგებს, მაშინ მის ბაგეთაგან წარმოთქმული ყოველი აღთქმა თუ აღკვეთა, ნუ შესრულდება. მისმა ქმარმა გააუქმა ისინი და უფალი აპატიებს ცოლს.

¹³ყოველ აღთქმას და ყოველ ფიცით აღკვეთას თავის დასათრგუნად მისი ქმარი ამტკიცებს და მისი ქმარი აუქმებს.

¹⁴მაგრამ თუ ქმარი არაფერს ამბობდა დღითი დღე, ამით დაამტკიცებს ყოველ მის აღთქმას, ან ყოველ მის აღკვეთას, რაც მასზეა. მან დაამტკიცა ისინი, რაკი არაფერი თქვა, როცა გაიგო.

¹⁵ხოლო თუ ქმარი გააუქმებს მათ მას შემდეგ, რაც გაიგო, მაშინ მასზე იქნება ცოლის ცოდვა.

¹⁶ეს ის წესებია, რომლებიც უფალმა ბრძანებით დაუდო მოსეს, ცოლ-ქმრის შესახებ, მამისა და მისი ასულის შესახებ, მისი ყმაწვილქალობისას, მამამისის სახლში.“