Read სბს–2013 რიცხვნი 31 Bible Online

რიცხვნი 31 - სბს–2013 bible

რიცხვნი 31

²„შური იძიე მიდიანელებზე ისრაელიანთა გამო და მერე შეეძინები შენს ხალხს.“

³და უთხრა მოსემ ხალხს: „შეაიარაღეთ თქვენი ხალხი საომრად, რათა გაილაშქრონ მიდიანის წინააღმდეგ და უფლის შური მიაგონ მას.

⁴ათას-ათასი კაცი თითო ტომიდან, ისრაელის ყოველი ტომიდან გაგზავნეთ სალაშქროდ.“

⁵და გაწვეულ იქნა ათასობით კაცი ისრაელიანთაგან, ათას-ათასი თითოეული ტომიდან, სულ 12 ათასი შეიარაღებული კაცი.

⁶გაგზავნა ისინი საომრად მოსემ, ათასეული ყოველი ტომიდან, აგრთვე ფინეხასი, ძე ელეაზარ მღვდლისა, სალაშქროდ საწმიდრის ჭურჭლითა და საყიჟინო ბუკებით ხელში.

⁷და გაილაშქრეს მიდიანზე, როგორც უბრძანა უფალმა მოსეს, და მოსრეს ყოველი მამაკაცი.

⁸სხვა დახოცილებთან ერთად მათ დახოცეს მიდიანის მეფეები: ევი და რეკემი, ცური, ხური და რებაყი – მიდიანის ხუთი მეფე, და მოკლეს მახვილით აგრეთვე ბალაამიც, ძე ბეყორისა;

⁹დაატყვევეს ისრაელიანებმა მიდიანელი ქალები და მათი ბავშვები, და მთელი მათი პირუტყვი, და მთელი მათი ჯოგები და მთელი მათი ქონება დაიტაცეს.

¹⁰ცეცხლს მისცეს ყველა მათი ქალაქი მათ საზღვრებში და ყველა დაბა.

¹¹და წამოიღეს მთელი ნადავლი და მთელი ნაძარცვი, კაციდან პირუტყვამდე,

¹²და მოიყვანეს მოსესთან, ელეაზარ მღვდელთან და ისრაელიანთა თემთან ტყვეები, და მოიტანეს ნაძარცვი და ნადავლი ბანაკში, მოაბის ველებზე, რომელიც იორდანეს პირასაა, იერიხოს პირდაპირ.

¹³გამოვიდნენ მოსე, ელეაზარ მღვდელი და თემის ყველა თავკაცი მათ შესახვედრად ბანაკს გარეთ.

¹⁴და განრისხდა მოსე მხედართმთავრებზე, ათასისთავებსა და ასისთავებზე, რომელნიც დაბრუნდნენ ლაშქრობიდან.

¹⁵უთხრა მათ მოსემ: „ყველა ქალი ცოცხალი დატოვეთ?

¹⁶აჰა, მათი მიზეზით იყო, რომ ბალაამის რჩევით ისრაელიანები განუდგნენ უფალს და გადაამეტეს ფეღორის ცოდვას, რის გამოც ატყდა შავი ჭირი უფლის თემში.

¹⁷და ახლა მოკალით ყოველი ბიჭი, და ყოველი ქალი, რომელსაც შეცნობილი ჰყავს მამაკაცი.

¹⁸ხოლო ყოველი ქალი, რომელსაც არ შეუცვნია საწოლი მამაკაცისა, ცოცხალი დაიტოვეთ თქვენთვის.

¹⁹თქვენ კი ბანაკის გარეთ დაიბანაკეთ შვიდი დღე. ყველა, ვინც კაცი მოკლა, და ყველა, ვინც მოკლულს გაეკარა, გასუფთავდეს მესამე დღეს და მეშვიდე დღეს – თქვენცა და თქვენი ტყვეებიც.

²⁰და ყოველი სამოსი და ტყავის ყოველი ნივთი და რაც თხისურისგანაა დამზადებული, და ხის ყოველი ჭურჭელი გაასუფთავეთ.“

²¹უთხრა ელეაზარ მღვდელმა მეომრებს, ომში ნამყოფებს: „აჰა, წესი რჯულისა, რომელიც უფალმა უბრძანა მოსეს:

²²ოქრო და ვერცხლი, ბრინჯაო, რკინა, კალა და ტყვია,

²³ყოველი საგანი, რომელიც უძლებს ცეცხლს, ცეცხლში გაატარეთ და გასუფთავდება, მაგრამ გარდა ამისა, გამასუფთავებელი წყლითაც უნდა გასუფთავდეს. ხოლო ყველაფერი, რაც ცეცხლს ვერ გაუძლებს, წყალში გაავლეთ.

²⁴და გაირეცხეთ თქვენი სამოსი მეშვიდე დღეს, და გასუფთავდით და შემდეგ შედით ბანაკში.“

²⁵და ელაპარაკა უფალი მოსეს და უთხრა:

²⁶„აღრიცხეთ ტყვედ შეპყრობილნი, კაციდან პირუტყვამდე, შენ და ელეაზარ მღვდელმა და თემის თავკაცებმა.

²⁷და გაუყავით ნადავლი შუაზე ომში ნამყოფ მეომართ და მთელ თემს.

²⁸აიღეთ ხარკი უფლისათვის ომში ნამყოფ მეომართაგან: თითო სული ხუთასზე, ადამიანთაგან და ნახირიდან, სახედართაგან და ცხვრიდან.

²⁹მათი ნახევრიდან აიღე ეს და მიეცი ელეაზარ მღვდელს საუფლო შესაწირავად.

³⁰და ისრაელიანთა თემის ნახევრიდან აიღე თითო წილი ორმოცდაათზე ადამიანთაგან, ნახირიდან, სახედართაგან, ცხვარ-თხათაგან, ყოველი პირუტყვიდან, და მიეცი ისინი ლევიანებს, რომლებიც უფლის კარვის სამსახურს ეწევიან.“

³¹და გააკეთეს მოსემ და ელეაზარ მღვდელმა, როგორც უბრძანა უფალმა მოსეს.

³²და იყო მეომართა მიერ ნაალაფარის გარდა ფარებიდან – 675 ათასი,

³³ნახირიდან – 72 ათასი,

³⁴სახედარი – 61 ათასი,

³⁵და ქალები, რომელთაც არ ჰქონდათ შეცნობილი მამაკაცის საწოლი – 32 ათასი.

³⁶ომში ნამყოფთა ნახევარი წილი ფარებიდან იყო 77 500.

³⁷და უფლის სახარკო ამ ფარებიდან იყო 675.

³⁸უფლის სახარკო 36 ათასიანი ნახირიდან იყო 72.

³⁹უფლის სახარკო 30 500-იანი რემადან იყო 61.

⁴⁰უფლის სახარკო 16 ათასი ადამიანიდან იყო 32.

⁴¹მისცა მოსემ ხარკი, უფლის შესაწირი ელეაზარ მღვდელს, როგორც უბრძანა უფალმა მას.

⁴²და ისრაელიანთა ნახევრიდან, რომელიც გამოყო მოსემ მეომართაგან,

⁴³ეს ნახევარი იყო თემისათვის: ფარებიდან – 77500,

⁴⁴ნახირიდან – 36 ათასი,

⁴⁵რემადან – 30500 სული,

⁴⁶და ადამიანები 16 ათასი.

⁴⁷აიღო მოსემ ისრაელიანთა ნახევრისაგან ერთი ორმოცდამეათედი წილი ადამინთაგან და პირუტყვთაგან, და მისცა ეს ლევიანებს, უფლის კარვის სამსახურის შემსრულებელთ, როგორც უბრძანა უფალმა მას.

⁴⁸და მივიდნენ მოსესთან ლაშქრის ათასეულთა მეთაურები: ათასისთავები და ასისთავები,

⁴⁹და უთხრეს: „შენმა მსახურებმა აღრიცხეს მეომრები, რომელნიც ჩვენს ხელქვეით არიან, და არ აკლია მათგან არც ერთი კაცი.

⁵⁰და შევწირავთ შესაწირავს უფალს, ვინც რა იპოვა ოქროს ნივთებიდან – სალტეები, სამაჯურები, ბეჭდები, საყურეები და ყელსაბამებ, ჩვენი სულების შენდობისათვის უფლის წინაშე.“

⁵¹აიღეს მოსემ და ელეაზარ მღვდელმა ეს ოქრო მათგან, ყოველი ეს სამკაული, ოსტატურად ნაკეთები.

⁵²და მთელი ოქრო, რაც უფალს შესწირეს ათასისთავებმა და ასისთავებმა იყო 16750 შეკელი.

⁵³მეომრებს კი, თითოეულს თავისი წილი ჰქონდათ დატაცებული.

⁵⁴და აიღეს მოსემ და ელეაზარ მღვდელმა ოქრო ათასისთავებისაგან და ასისთავებისაგან და მიიტანეს საკრებულო კარავში უფლის წინაშე ისრაელიანთა სამახსოვროდ.