Read სბს–2013 რიცხვნი 35 Bible Online

რიცხვნი 35 - სბს–2013 bible

რიცხვნი 35

¹და ელაპარაკა უფალი მოსეს მოაბის ველებზე, იორდანესთან, იერიხოს პირდაპირ, და უთხრა:

²„უბრძანე ისრაელიანთ, რომ მისცენ ლევიანებს თავიანთი სამკვიდრო სამფლობელოდან ქალაქები საცხოვრებლად. და აგრეთვე საძოვრები მიეცით ქალაქების ირგვლივ მათ.

³იქნება ქალაქები მათთვის საცხოვრებლად, ხოლო მათი საძოვრები იქნება მათი ცხვარ-ძროხისა და მათი სხვა პირუტყვისათვის.

⁴ქალაქების საძოვრები, რომლებსაც მისცემთ ლევიანებს, ქალაქის გარე კედლიდან ათას წყრთაზე გადიოდეს ირგვლივ.

⁵გაზომეთ ქალაქგარეთ აღმოსავლეთ მხარეს 2 ათასი წყრთა, და სამხრეთ მხარეს 2 ათასი წყრთა და დასავლეთ მხარეს 2 ათასი წყრთა, და ჩრდილოეთ მხარეს 2 ათასი წყრთა, ხოლო ქალაქი იყოს შუაში: ეს იქნება მათი საძოვრები ქალაქებთან.

⁶ქალაქებიდან, რომლებსაც თქვენ მისცემთ ლევიანებს, ექვსი იყოს თავშესაფარი ქალაქი, სადაც გაქცევას დაანებებთ მკვლელს. და მათ გარდა მიეცით სხვა 42 ქალაქი.

⁷ყველა ქალაქი, რომელიც თქვენ უნდა მისცეთ ლევიანებს, იყოს 48 ქალაქი თავის საძოვრებიანად.

⁸და ქალაქები, რომლებსაც მისცემთ მათ ისრაელიანთა სამფლობელოებიდან, აიღეთ მრავალრიცხოვან ტომთაგან მეტი, ხოლო მცირერიცხოვანთაგან ნაკლები. ყოველმა ტომმა თავისი სამკვიდრებლის მიხედვით უნდა მისცეს ლევიანებს თავიანთი ქალაქებიდან, რასაც დაიმკვიდრებენ.

⁹და ელაპარაკა უფალი მოსეს და უთხრა:

¹⁰განუცხადე ისრაელიანთ და უთხარი მათ: როცა გადახვალთ იორდანეს გადაღმა, ქანაანის ქვეყანაში,

¹¹დაიგუეთ ქალაქები, რომლებიც თავშესაფარი ქალაქები იქნება თქვენთვის. და გაიქცევა იქ მკვლელი, რომელსაც უნებლიეთ შემოაკვდა კაცი.

¹²ეს ქალაქები იქნება თქვენთვის თავშესაფრად შურის მაძიებლისაგან, რომ არ მოკლან მკვლელი, ვიდრე წარსდგება სამსჯავროზე თემის წინაშე.

¹³და ქალაქებიდან, რომლებსაც თქვენ მისცემთ, ექვსი ქალაქი თავშესაფრად იყოს თქვენთვის.

¹⁴სამი ქალაქი მიეცით იორდანეს გამოღმა მხარეს და სამი ქალაქი მიეცით ქანაანის ქვეყანაში. თავშესაფარი ქალაქები იქნება ისინი.

¹⁵ისრაელიანთათვის და ხიზნისთვის და ახალმოსახლესათვის იყოს ეს ექვსი ქალაქი თავშესაფრად მათთვის, რათა შეძლოს იქ გაქცევა ყველამ, ვისაც უნებლიეთ შემოაკვდება კაცი.

¹⁶თუ ვინმე რკინის იარაღს დაარტყამს კაცს და მოკვდება იგი, მაშინ ის მკვლელია. სიკვდილით უნდა დაისაჯოს მკვლელი.

¹⁷და თუ ვინმე ხელით დაარტყამს ვინმეს ქვას, რასაც შეუძლია სიკვდილი გამოიწვიოს, და იგი მოკვდება, მაშინ ის მკვლელია. სიკვდილით უნდა დაისაჯოს მკვლელი.

¹⁸ან თუ ვინმე ხის იარაღს დაარტყამს ხელით, რომლითაც შეიძლება მოკვდეს, და იგი მოკვდება, მაშინ ის მკვლელია. სიკვდილით უნდა დაისაჯოს მკვლელი.

¹⁹მესისხლეს თვით შეუძლია მოკლას მკვლელი; როგორც კი შეხვდება მას, თვითონ შეუძლია მისი მოკვლა.

²⁰და თუ ვინმე სიძულვილით ხელს ჰკრავს ვინმეს, ან განზრახ რაიმეს სტყორცნის მას და იგი მოკვდება,

²¹ან თუ მტრობით დაარტყამს ხელს, და იგი მოკვდება, სიკვდილით უნდა დაისაჯოს ის, რომელმაც დაარტყა მას, რადგან მკვლელია იგი; მესისხლეს შეუძლია მოკლას ეს მკვლელი, როცა შეხვდება მას.

²²მაგრამ თუ უცაბედად, მტრობის გარეშე, ჰკრავს ხელს, ან ესვრის მას რაიმე საგანს განზრახვის გარეშე,

²³ან რაიმე ქვას, რომლითაც შეიძლება მოკვდეს, უნებლიეთ მოახვედრებს მას და ის მოკვდება, თუმცა იგი არ იყო მისი მტერი და არც მისთვის ავის მოსურნე,

²⁴მაშინ უნდა განსაჯოს თემმა მკვლელსა და მესისხლეს შორის ამ წესის მიხედვით;

²⁵და უნდა იხსნას თემმა მკვლელი მესისხლის ხელიდან, და უნდა დააბრუნოს იგი თავშესაფარ ქალაქში, სადაც გაიქცა, რათა დამკვიდრდეს იქ, ვიდრე მოკვდებოდეს წმიდა ზეთით ცხებული მღვდელთმთავარი.

²⁶ხოლო თუ მკვლელი გავა თავშესაფარი საზღვრიდან, სადაც იგი გაიქცა,

²⁷და მას ნახავს მესისხლე მისი თავშესაფარი ქალაქის საზღვრის გარეთ, სადაც იგი გაიქცა, და მოკლავს მესისხლე მკვლელს, მაშინ არაა მესისხლეზე სისხლი,

²⁸რადგან თავის თავშესაფარ ქალაქში უნდა დამკვიდრებულიყო იგი, ვიდრე მღვდელმთავარი მოკვდებოდა. ხოლო მღვდელმთავრის სიკვდილის შემდეგ შეიძლება დაუბრუნდეს მკვლელი თავის სამფლობელოს.

²⁹ეს გფონდეთ თქვენთვის სამართლის წესად თაობიდან თაობამდე, ყველგან სადაც კი იცხოვრებთ.

³⁰ყველა, ვინც კაცს მოკლავს, მოწმეთა ჩვენების საფუძველზე უნდა მოიკლას. მაგრამ მარტო ერთი მოწმის მხილებით არავინ არ უნდა დაისაჯოს სიკვდილით.

³¹არ აიღოთ გამოსასყიდი მკვლელის გამოსახსნელად, რომელიც სასიკვდილო დამნაშავეა, არამედ სიკვდილით უნდა დაისაჯოს.

³²და არ აიღოთ გამოსასყიდი თავშესაფარ ქალაქში გაქცეულისთვის მის დასაბრუნებლად ქვეყანაში საცხოვრებლად, ვიდრე მღვდელმთავარი ცოცხალია.

³³არ წაბილწოთ მიწა, სადაც თქვენ ცხოვრობთ, რადგან სისხლი ბილწავს მიწას, და მიწა ვერ გამოისყიდის მასზე დაღვრილ სისხლს, თუ არა მისი დამღვრელის სისხლით.

³⁴და არ გააბინძუროთ მიწა, რომელზეც ცხოვრობთ, სადაც მე ვმკვიდრობ; რადგან მე, უფალი, ვმკვიდრობ ისრაელიანთა შორის.“