Read სბს–2013 რიცხვნი 5 Bible Online

რიცხვნი 5 - სბს–2013 bible

რიცხვნი 5

¹და ელაპარაკა უფალი მოსეს და უთხრა:

²„უბრძანე ისრაელიანთ, რომ გაიყვანონ ბანაკიდან ყოველი კეთროვანი და ყოველი ჩირქოვანი გამონადენის მქონე, და ყოველი მკვდართან შეხებით გაუწმინდურებული.

³კაციდან ქალამდე გაიყვანეთ; ბანაკის გარეთ გაიყვანეთ ისინი, რათა არ შებილწონ თავიანთი ბანაკები, სადაც მე ვმკვიდრობ.“

⁴და ასეც მოიქცნენ ისრაელიანები. გაიყვანეს ისინი ბანაკს გარეთ. როგორც უთხრა უფალმა მოსეს, ისე მოიქცნენ ისრაელიანები.

⁵და ელაპარაკა უფალი მოსეს და უთხრა:

⁶„უთხარი ისრაელიანთ: თუ კაცი ან ქალი ჩაიდენს დანაშაულს ადამიანის წინაშე, შემცოდეა ის უფლის წინაშეც, და დადანაშაულდება ის სული,

⁷და აღიაროს ჩადენილი ცოდვა და ზღოს თითოეულმა სრულად, რაც წაუხდინა და დაუმატოს მეხუთედი და მისცეს მას, ვისაც დაუშავა.

⁸თუ იმ კაცს არა ჰყავს ნათესავი, ვისაც უნაზღაურდება წანახედი, მაშინ წანახედის საზღაური ეკუთვნის უფალს, მღვდლისა იყოს იგი, შენდობის ვერძთან ერთად, რითაც იგი შეუნდობს მას.

⁹ყოველი აღსამართავი მსხვერპლი ისრაელიანთა ყოველი შესაწირავისა, რასაც ისინი მღვდელს წარუდგენენ, მას ეკუთვნის.

¹⁰ვინმეს მიერ შემოწირული მას ეკუთვნის. თუ ვინმე რამეს მისცემს მღვდელს, მღვდლისაა.“

¹¹და ელაპარაკა უფალი მოსეს და უთხრა:

¹²„განუცხადე ისრაელიანთ და უთხარი მათ: თუ ვინმეს ცოლი გზას ასცდება და უღალატებს ქმარს,

¹³დაწვება ვინმე მასთან თესლის მიღვრით, და დაფარული იქნება ეს მისი ქმრისგან, და ფარულად შეიბილწება ის, და მოწმე მის წინააღმდეგ არ იქნება, რადგან ზედ არავის წაუსწრია,

¹⁴და ქმარს ეწვევა სული ეჭვიანობისა, და იგი იეჭვიანებს თავის ცოლზე, ხოლო ცოლი შებილწულია; ან თუ ქმარს ეწვევა სული ეჭვიანობისა და იგი იეჭვიანებს ცოლზე, რომელიც არ არის შებილწული,

¹⁵მიიყვანოს ქმარმა ცოლი მღვდელთან და მიიტანოს შესაწირავი ცოლისათვის ეფის მეათედი ქერის ფქვილისა, ოღონდ არ დაასხას მას ზეთი და არ დააყაროს საკმეველი, რადგან ეს შესაწირავი ეჭვიანობისაა, ხსოვნის შესაწირავია, რომელიც გაახსენებს ცოდვას.

¹⁶და მიიყვანს ქალს მღვდელი და დააყენებს მას უფლის წინაშე.

¹⁷აიღებს მღვდელი წმიდა წყალს თიხის ჭურჭლით, და მიწას, რომელიც კარვის იატაკზეა და ჩაყრის მას წყალში.

¹⁸დააყენებს მღვდელი ქალს უფლის წინაშე, და თავსაბურველს მოხდის და დაუდებს მას ხელისგულზე ხსოვნის შესაწირავს, ეს ეჭვიანობის შესაწირავია. ხოლო მღვდელს ხელში ექნება მწარე წყალი – დამაწყევარი.

¹⁹და დააფიცოს იგი მღვდელმა და უთხრას ქალს: ‘თუ კაცი არ დაწოლილა შენთან, და თუ გზას არ აცდენილხარ შებილწვით შენი ქმრის უფლების ქვეშ მყოფი, უვნებელი იყავი ამ მწარე დამაწყევარი წყლისგან, –

²⁰ხოლო თუ ქმრის უფლების ქვეშ მყოფი გზას ასცდი და შეიბილწე, და იწვა შენთან მამაკაცი, შენი ქმრის გარდა.’

²¹და დააფიცოს მღვდელმა ეს ქალი წყევლის ფიცით, და უთხრას მას: ‘მიგცეს შენ უფალმა წყევლასა და ფიცს შენს ხალხში, რომ უფალმა დაგიდამბლაოს საშო და გაგისიოს მუცელი.

²²შევა ეს დამაწყევარი წყალი შენს შიგნეულში, რათა გაგისიოს მუცელი და დაგიდამბლაოს საშო!’ და იტყვის ქალი: ‘ამინ, ამინ!’

²³და ჩაწეროს ეს წყევლა მღვდელმა წიგნში, და გადარეცხოს ის მწარე წყლით.

²⁴ასვას ქალს მწარე დამაწყევარი წყალი და შევა მასში დამლახვრელი წყალი გამამწარებლად.

²⁵გამოართვას მღვდელმა ქალს ხელიდან ეჭვიანობის შესაწირავი და შეარხიოს ეს შესაწირავი უფლის წინაშე, და მიიტანოს იგი სამსხვერპლოსთან,

²⁶და აიღოს მღვდელმა ერთი პეშვი ამ შესაწირავისა, მისი სამახსოვროს ნაწილი, და დააკმიოს სამსხვერპლოზე, და შემდეგ ასვას ქალს ის წყალი.

²⁷როდესაც შეასმევს მას ამ წყალს, თუ იგი შებილწულია და უღალატა ქმარს, ეს დამაწყევარი წყალი შევა მასში გასამწარებლად და გაუსივდება მუცელი, დაუდამბლავდება საშო, და წყეული იქნება ეს ქალი თავის ხალხში.

²⁸და თუ არაა შებილწული ეს ქალი და სუფთაა, უვნებელი დარჩება და განაყოფიერდება თესლით.

²⁹ესაა წესი ეჭვიანობისა, როცა ქმრის უფლების ქვეშ მყოფი ქალი გზას ასცდება და შეიბილწება,

³⁰ან როცა მამაკაცს დაეუფლება სული ეჭვიანობისა, და იგი იეჭვიანებს თავის ცოლზე, მან უნდა მიიყვანოს ეს ქალი უფლის წინაშე, და გაუკეთოს მას მღვდელმა ყოველივე ამ წესისამებრ.

³¹და ქმარი თავისუფალი იქნება ცოდვისაგან, ხოლო იმ ქალის კისერზე იქნება მისი ცოდვა.“