Read სბს–2013 მათეს სახარება 15 Bible Online

მათეს სახარება 15 - სბს–2013 bible

მათეს სახარება 15

¹მაშინ მივიდნენ იესოსთან იერუსალიმიდან ფარისეველნი და მწიგნობარნი და უთხრეს:

²„რატომ არღვევენ შენი მოწაფეები უხუცესთა გადმოცემას? რადგან ხელს არ იბანენ პურის ჭამის წინ.“

³ხოლო მან მიუგო და უთხრა მათ: „თქვენ რატომღა არღვევთ ღმერთის მცნებას თქვენი გადმოცემის გამო?

⁴რადგან ღმერთმა თქვა: ‘პატივი ეცი მამას და დედას, და მამის ან დედის აუგის მთქმელი სიკვდილით მოკვდეს.’

⁵თქვენ კი ამბობთ: ‘თუ ვინმე ეტყვის თავის მამას ან დედას: ეს ძღვენია, რითაც ჩემგან უნდა გესარგებლა,

⁶მას აღარ ესაჭიროება პატივის მიგება თავისი მამისა და დედისათვის.’ ამრიგად, თქვენ გააუქმეთ ღმერთის მცნება თქვენი გადმოცემით.

⁷თვალთმაქცნო, კარგად წინასწარმეტყველებდა თქვენზე ესაია, როდესაც ამბობდა:

⁸‘ეს ხალხი პატივს მცემს ბაგეებით, მათი გული კი შორს არის ჩემგან.

⁹ამაოდ მცემენ თაყვანს, რადგან ადამიანთა მცნებებს ისე ასწავლიან, თითქოს მოძღვრება იყოს.’“

¹⁰და მოუწოდა ხალხს და უთხრა მათ: „ისმინეთ და შეიგნეთ:

¹¹ადამიანს ბილწავს არა პირში შემავალი, არამედ ის, რაც პირიდან გამოდის. ეს ბილწავს ადამიანს.“

¹²მაშინ მოვიდნენ მოწაფეები და უთხრეს მას: „იცი, რომ ფარისევლები ამ სიტყვის მოსმენამ დააბრკოლა?“

¹³მან კი მიუგო და უთხრა: „ყოველი ნერგი, რომელიც ჩემს ზეციერ მამას არ დაურგავს, ძირფესვიანად აღმოიფხვრება.

¹⁴მოეშვით მათ: ისინი ბრმათა ბრმა წინამძღოლები არიან. ხოლო თუ ბრმას ბრმა მიუძღვის, ორივენი ორმოში ჩაცვივდებიან.“

¹⁵მიუგო პეტრემ და უთხრა მას: „განგვიმარტე ეს იგავი.“

¹⁶ხოლო მან უთხრა: „ნუთუ ვერც თქვენ გაიგეთ ვერაფერი აქამდე?

¹⁷ვერ გაიგეთ, რომ ყველაფერი, რაც პირში შედის, მუცელს გაივლის და გარეთ გაიყრება?

¹⁸პირიდან გამოსული კი გულიდან გამოდის და სწორედ ის ბილწავს ადამიანს.

¹⁹რადგან გულიდან ამოდიან: ბოროტი ზრახვანი, მკვლელობანი, მრუშობანი, მეძაობანი, ქურდობანი, ცრუმოწმობანი, გმობანი.

²⁰სწორედ ეს ბილწავს ადამიანს, დაუბანელი ხელით ჭამა კი არ ბილწავს ადამიანს.“

²¹წამოვიდა იქიდან იესო და მივიდა ტვიროსისა და სიდონის მხარეებში.

²²და, აჰა, ქანაანელი ქალი მოვიდა მასთან იმ ადგილებიდან, შეჰღაღადა მას და უთხრა: „შემიწყალე მე, უფალო, ძეო დავითისა! ჩემი ქალიშვილი ეშმაკეულია.“

²³მაგრამ მან სიტყვაც არ უპასუხა. მოწაფეები მივიდნენ მასთან და სთხოვეს: „გაუშვი იგი, რადგან უკან მოგვყვირის ჩვენ.“

²⁴მან მიუგო და უთხრა: „მე მოვლინებული ვარ მხოლოდ ისრაელის სახლის დაღუპულ ცხვრებთან.“

²⁵ქალი კი მივიდა, დაემხო მის წინ და უთხრა: „მიშველე მე, უფალო!“

²⁶მან მიუგო და უთხრა: „არ არის კარგი, რომ შვილებს წაართვა პური და ძაღლებს გადაუგდო.“

²⁷ქალმა უთხრა: „დიახ, უფალო, მაგრამ ძაღლებიც ხომ ჭამენ ნამცეცებს, რომლებიც მათი ბატონების სუფრიდან ცვივა.“

²⁸მაშინ მიუგო იესომ და უთხრა: „ო, ქალო! დიდია შენი რწმენა. დაე მოგეცეს შენ შენი სურვილისამებრ.“ და იმავე ჟამს განიკურნა მისი ქალიშვილი.

²⁹და წავიდა იესო იქიდან და მივიდა გალილეის ზღვასთან, ავიდა მთაზე და დაჯდა იქ.

³⁰და მივიდა მასთან დიდძალი ხალხი. თან ჰყავდათ კოჭლები, ბრმები, მუნჯები, ხეიბრები და მრავალი სხვა. დასხეს მის ფეხთით და მან განკურნა ისინი.

³¹ისე რომ, უკვირდა ხალხს, როცა ხედავდა, რომ მუნჯები ლაპარაკობდნენ, ხეიბრები გამოჯანსაღდნენ, კოჭლები დადიოდნენ და ბრმები ხედავდნენ. და ადიდებდნენ ისრაელის ღმერთს.

³²იესომ კი მოუხმო თავის მოწაფეებს და უთხრა: „მებრალება ეს ხალხი, უკვე სამი დღეა, რაც ჩემთან არიან და საჭმელი არაფერი აქვთ. არ მინდა მათი უჭმელად გაშვება, რომ გზაში არ დაუძლურდნენ.“

³³უთხრეს მას მოწაფეებმა: „სად ვიშოვით უდაბურ ადგილას იმდენ პურს, რომ ამდენი ხალხი გავაძღოთ?“

³⁴და უთხრა მათ იესომ: „რამდენი პური გაქვთ?“ მათ უთხრეს: „შვიდი და მცირეოდენი თევზი.“

³⁵და უბრძანა ხალხს, რომ მიწაზე დამსხდარიყვნენ.

³⁶აიღო შვიდი პური და თევზები, მადლი შესწირა, დატეხა და დაურიგა თავის მოწაფეებს, მოწაფეებმა კი – ხალხს.

³⁷და ჭამა ყველამ და გაძღა. ნარჩენი ნატეხებისაგან კი შვიდი სავსე კალათა აკრიფეს.

³⁸მჭამელი კი 4 ათასამდე კაცი იყო, გარდა ქალებისა და ბავშვებისა.

³⁹და როდესაც გაუშვა ხალხი, ჩაჯდა ნავში და წავიდა მაგდალას საზღვრებში.