Read სბს–2013 მარკოზის სახარება 15 Bible Online

მარკოზის სახარება 15 - სბს–2013 bible

მარკოზის სახარება 15

¹და მაშინვე, დილით ადრე, მოითათბირეს მღვდელმთავრებმა უხუცესებთან, მწიგნობრებთან და მთელ სინედრიონთან ერთად და შეკრეს იესო, წაიყვანეს და გადასცეს პილატეს.

²და ჰკითხა მას პილატემ: „შენ ხარ იუდეველთა მეფე?“ ხოლო მან მიუგო და უთხრა: „შენ ამბობ.“

³და ბევრ რამეს აბრალებდნენ მას მღვდელმთავრები.

⁴პილატემ კვლავ ჰკითხა მას: „არაფერს უპასუხებ? ხედავ, რამდენს გაბრალებენ?“

⁵ხოლო იესო აღარაფერზე პასუხობდა, და გააოცა ამით პილატე.

⁶ხოლო დღესასწაულებზე იგი უთავისუფლებდა მათ ერთ პატიმარს, ვისაც სთხოვდნენ.

⁷და იყო ვინმე, ბარაბად წოდებული, ბორკილდადებული მეამბოხეებთან ერთად, რომელთაც ამბოხისას მკვლელობა ჩაედინათ.

⁸ავიდა ხალხი და დაუწყო თხოვნა, რასაც იგი ჩვეულებისამებრ უსრულებდა მათ.

⁹პილატემ მიუგო მათ და უთხრა: „გინდათ გაგითავისუფლოთ იუდეველთა მეფე?“

¹⁰რადგან იცოდა, რომ მღვდელმთავრებმა შურით გადასცეს იგი.

¹¹მღვდელმთავრებმა კი შეაგულიანეს ბრბო, რომ ბარაბას გათავისუფლება ეთხოვათ.

¹²პილატემ კვლავ მიმართა და უთხრა მათ: „რა გინდათ, რომ ვუყო მას, ვისაც თქვენ იუდეველთა მეფეს უწოდებთ?“

¹³მათ კი კვლავ იყვირეს: „ჯვარს აცვი იგი!“

¹⁴პილატემ უთხრა მათ: „მაგრამ რა ბოროტება ჩაიდინა?“ მაგრამ ისინი კიდევ უფრო მეტი დაჟინებით აყვირდნენ: „ჯვარს აცვი იგი!“

¹⁵პილატემ, რომელსაც სურდა ხალხის მომადლიერება, გაუთავისუფლა მათ ბარაბა, ხოლო იესო გამათრახების შემდეგ გადასცა, რათა ჯვარს ეცვათ.

¹⁶ჯარისკაცებმა შეიყვანეს იგი ეზოს შიგნით, პრეტორიუმში, და შეკრიბეს მთელი რაზმი,

¹⁷შემოსეს იგი ძოწეულით და დაადგეს ეკლისგან დაწნული გვირგვინი.

¹⁸და დაუწყეს მას მისალმება: „გიხაროდეს, იუდეველთა მეფევ!“

¹⁹და ურტყამდნენ თავში ლერწამს, აფურთხებდნენ და მუხლმოყრილნი სცემდნენ თაყვანს.

²⁰და როდესაც შეურაცხყვეს, გახადეს ძოწეული და მისივე ტანსაცმელი ჩააცვეს, და გამოიყვანეს, რომ ჯვარს ეცვათ.

²¹და აიძულეს ერთი გამვლელი, სიმონ კვირინელი, ალექსანდრეს და რუფეს მამა, რომელიც ყანიდან მოდიოდა, წამოეღო მისი ჯვარი.

²²და მიიყვანეს იგი იმ ადგილას, რომელსაც ჰქვია გოლგოთა (თარგმანით ეს არის თხემის ადგილი).

²³და მიაწოდეს მას მურნარევი ღვინო დასალევად, მაგრამ არ მიიღო.

²⁴და ჯვარს აცვეს და გაიყვეს მისი სამოსელი წილის ყრით, ვის რა ერგებოდა.

²⁵იყო მესამე საათი, როდესაც ჯვარს აცვეს იგი.

²⁶და იყო წარწერა მისი ბრალდებისა ამგვარად დაწერილი: „მეფე იუდეველთა.“

²⁷და მასთან ერთად ჯვარს აცვეს ორი ავაზაკი, ერთი მის მარჯვნივ და მეორე მარცხნივ.

²⁸და აღსრულდა წერილი, რომელშიც ნათქვამია: „ბოროტმოქმედთა შორის შეირაცხა.“

²⁹გამვლელები გმობდნენ მას, თავს აქნევდნენ და ამბობდნენ: „ეჰა, ტაძრის დამანგრეველო და სამ დღეში ამშენებელო,

³⁰იხსენი საკუთარი თავი და გადმოდი ჯვრიდან!“

³¹ასევე მღვდელმთავარნი, მწიგნობრებთან ერთად, დასცინოდნენ და ერთმანეთს ეუბნებოდნენ: „სხვებს იხსნიდა, საკუთარი თავის ხსნა კი არ შეუძლია.

³²ქრისტე, მეფე ისრაელისა, ჩამოვიდეს ახლა ჯვრიდან, რომ ვიხილოთ და ვირწმუნოთ.“ და მასთან თანაჯვარცმულებიც ლანძღავდნენ მას.

³³და როდესაც მეექვსე საათი დადგა, ბნელმა მოიცვა მთელი დედამიწა მეცხრე საათამდე.

³⁴მეცხრე საათზე შესძახა იესომ დიდი ხმით: „ელოი, ელოი, ლამა საბაქთანი?“ რაც ნიშნავს: „ღმერთო ჩემო, ღმერთო ჩემო, რად მიმატოვე მე?“

³⁵იქ მდგომთაგან ზოგიერთებმა გაიგონეს და თქვეს: „აჰა, ელიას უხმობს.“

³⁶ერთი ვიღაც გაიქცა, ღრუბელი ძმრით გაჟღინთა, წამოაგო ლერწამზე და მიაწოდა დასალევად, თან ამბობდა: „აბა, ვნახოთ, თუ მოვა ელია მის ჩამოსახსნელად.“

³⁷იესომ ხმამაღლა შესძახა და სული განუტევა.

³⁸და ტაძრის ფარდა ორად გაიპო თავიდან ბოლომდე.

³⁹როდესაც მის წინ მდგომმა ასისთავმა დაინახა, რომ ასე შესძახა და განუტევა სული, თქვა: „ჭეშმარიტად ღმერთის ძე იყო ეს ადამიანი.“

⁴⁰აქ იყვნენ ქალებიც, რომლებიც შორიდან უყურებდნენ. მათ შორის იყო მარიამ მაგდალელი, და მარიამი, იაკობ მცირისა და იოსეს დედა, და სალომე,

⁴¹რომლებიც მის გალილეაში ყოფნისას თან დაჰყვებოდნენ და ემსახურებოდნენ მას. ასევე მრავალი სხვაც, რომლებიც მასთან ერთად ამოვიდნენ იერუსალიმს.

⁴²როდესაც მოსაღამოვდა, რაკი პარასკევი იყო, რომელიც შაბათის წინადღეა,

⁴³მოვიდა იოსებ არიმათიელი, პატივდებული მრჩეველი, რომელიც თავადაც მოელოდა ღმერთის სასუფეველს, გაბედა და შევიდა პილატესთან და გამოითხოვა იესოს ცხედარი.

⁴⁴პილატეს გაუკვირდა, რომ უკვე მკვდარი იყო და დაუძახა ასისთავს და ჰკითხა, მოკვდა თუ არა უკვე.

⁴⁵და რომ შეიტყო ასისთავისაგან, უბოძა იოსებს ცხედარი.

⁴⁶და იყიდა მან ტილო, გარდამოხსნა იგი, შეგრაგნა ტილოთი და დაასვენა სამარხში, რომელიც კლდეში იყო გამოკვეთილი, და ლოდი მიაგორა სამარხს კარზე.

⁴⁷მარიამ მაგდალელმა და მარიამმა, იოსეს დედამ, დაინახეს, სადაც დაასვენეს იგი.