Read სბს–2013 მარკოზის სახარება 3 Bible Online

მარკოზის სახარება 3 - სბს–2013 bible

მარკოზის სახარება 3

¹და კვლავ შევიდა სინაგოგაში და იყო იქ კაცი, რომელსაც ხელი ჰქონდა გამხმარი.

²და უთვალთვალებდნენ, შაბათ დღეს თუ განკურნავდა, რომ ბრალი დაედოთ მისთვის.

³და უთხრა ხელგამხმარ კაცს: „დადექი შუაში.“

⁴ეუბნება მათ: „შაბათ დღეს კეთილის კეთებაა ნებადართული თუ ბოროტისა? სიცოცხლის ხსნა თუ დაღუპვა?“ და დუმდნენ ისინი.

⁵გადახედა მათ რისხვით მათი გულდახშულობით შეწუხებულმა, და უთხრა იმ კაცს: „გაიწოდე ხელი!“ და მანაც გაიწოდა და აღუდგა ხელი.

⁶და გავიდნენ ფარისევლები და მაშინვე დაიწყეს თათბირი ჰეროდიანებთან ერთად მის წინააღმდეგ, როგორ დაეღუპათ იგი.

⁷იესო კი თავის მოწაფეებთან ერთად ზღვისკენ გაემართა. დიდძალი ხალხი მისდევდა მას გალილეიდან და იუდეიდან,

⁸იერუსალიმიდან, იდუმეადან, იორდანეს გაღმიდან. დიდძალი ხალხი მივიდა მასთან ტვიროსისა და სიდონის სანახებიდან, როდესაც გაიგეს, რა მოიმოქმედა.

⁹და უთხრა თავის მოწაფეებს, ნავი გაემზადებინათ მისთვის, რათა ხალხს არ შეევიწროვებინა,

¹⁰რადგან ბევრი განკურნა, ისე რომ ზედ აწყდებოდა ყველა, ვისაც რა სენი სჭირდა, და ცდილობდა, შეხებოდა მას.

¹¹უწმიდური სულებიც, როგორც კი მას დაინახავდნენ, ეცემოდნენ მის წინაშე და ყვიროდნენ და ამბობდნენ: „შენა ხარ ძე ღმერთისა!“

¹²და მკაცრად უბრძანებდა მათ, რათა არ გაემჟღავნებინათ იგი.

¹³და ავიდა მთაზე და მოუხმო, ვინც მას სურდა, და მივიდნენ მასთან.

¹⁴და დაადგინა თორმეტნი, რათა მასთან ერთად ყოფილიყვნენ და გაეგზავნა საქადაგებლად,

¹⁵და ჰქონოდათ განკურნებისა და ეშმაკების განდევნის ხელმწიფება.

¹⁶და დაადგინა თორმეტნი და უწოდა სახელად: სიმონს – პეტრე;

¹⁷იაკობ ზებედესას და იოანეს, იაკობის ძმას უწოდა ბოანერგეს, რაც ნიშნავს – ქუხილის ძენი;

¹⁸ანდრია და ფილიპე, ბართლომე და მათე, თომა და იაკობ ალფესი, თადეოზი და სიმონ კანანელი.

¹⁹და იუდა ისკარიოტელი, რომელმაც გასცა იგი.

²⁰და მივიდა სახლში და კვლავ იმდენმა ხალხმა მოიყარა თავი, რომ პურიც ვეღარ ჭამეს.

²¹და გაიგეს მისიანებმა და მის შესაპყრობად წამოვიდნენ, რადგან ამბობდნენ: „შეშლილი არის!“

²²იერუსალიმიდან ჩამოსულმა მწიგნობრებმა თქვეს: „ბელზებული ჰყავს და ეშმაკთა მთავრით სდევნის ეშმაკებს.“

²³და მოუხმო მათ და იგავებით უთხრა: „როგორ შეუძლია სატანას სატანის განდევნა?

²⁴თუ სამეფო თავისივე თავის წინააღმდეგ გაიყოფა, ის სამეფო ვეღარ გაძლებს.

²⁵და თუ სახლი თავისივე თავის წინააღმდეგ გაიყოფა, ის სახლი ვეღარ გაძლებს;

²⁶და თუ სატანა თავის თავს წინ აღუდგა და გაიყო, ვეღარ გაძლებს, არამედ დაუდგა აღსასრული.

²⁷ვერავინ შეძლებს ძლიერის სახლში შესვლას და მისი ნივთების გატაცებას, თუ ჯერ ძლიერს არ შეკრავს, და მაშინღა გაძარცვავს მის სახლს.

²⁸ჭეშმარიტად გეუბნებით თქვენ: ყველა ცოდვა და გმობა მიეტევება კაცთა შვილებს, რამდენსაც უნდა გმობდნენ;

²⁹ხოლო ვინც სულიწმიდას დაგმობს, აღარასოდეს მიეტევება, არამედ საუკუნო ცოდვის თანამდებია.“ –

³⁰რადგან თქვეს: „უწმიდური სული ჰყავს.“

³¹და მივიდნენ მისი ძმები და დედა, გარეთ დადგნენ და გაგზავნეს მის დასაძახებლად.

³²და ისხდა მის გარშემო ხალხი, და უთხრეს: „გარეთ არიან შენი დედა და შენი დები და შენი ძმები და გეძებენ.“

³³მიუგო მათ და უთხრა: „ვინ არიან ჩემი დედა და ჩემი ძმები?“

³⁴და გადახედა თავის გარშემო მსხდომთ და უთხრა: „აჰა, ჩემი დედა და ჩემი ძმები.

³⁵რადგან ის, ვინც ღმერთის ნებას ასრულებს, არის ჩემი ძმაც, დაც და დედაც.“