Read სბს–2013 მეორე რჯული 11 Bible Online

მეორე რჯული 11 - სბს–2013 bible

მეორე რჯული 11

¹და გიყვარდეს უფალი, შენი ღმერთი, და მუდამ იცავდე, რაც გიბრძანა დასაცავად; იცავდე მის წესებს და მის კანონებს და მის მცნებებს.

²გახსოვდეს ეს დღეს, რაც არ უნახავთ თქვენს ძეთ, რომელთაც არც იციან და არც უნახავთ უფლის, თქვენი ღმერთის, სასჯელი, მისი დიდება, მისი ძლიერი ხელი და მისი აღმართული მკლავი,

³მისი სასწაულები და მისი საქმენი, რაც ეგვიპტეში დააწია ფარაონს, ეგვიპტის მეფეს და მთელ მის ქვეყანას,

⁴და რაც უყო ეგვიპტის ლაშქარს, მის ცხენებსა და მის ეტლებს, როგორ შთაანთქმევინა ისინი მეწამული ზღვის წყალს, როცა ისინი დაგედევნენ; და მოსპო ისინი უფალმა დღემდე,

⁵და რასაც უდაბნოში გიშვრებოდათ, ვიდრე ამ ადგილს მოაღწევდით,

⁶და რაც მან უყო დათანს და აბირამს, რეუბენის ძის, ელიაბის ძეთ, როცა გააღო მიწამ პირი და შთანთქა ისინი და მათი სახლები და მათი კარვები და მთელი სიმდიდრე, რაც კი ებადათ მთელს ისრაელში.

⁷რადგან თქვენმა თვალმა იხილა უფლის ყველა დიდი საქმეები, რაც მან მოიმოქმედა.

⁸მაშ დაიცავით ყველა მისი მცნება, რომელთაც მე გაუწყებთ დღეს, რათა გაძლიერდეთ და მიხვიდეთ და დაიმკვიდროთ ქვეყანა, რომლის დასამკვიდრებლადაც გადიხართ გაღმა;

⁹და რათა იდღეგრძელოთ იმ ქვეყანაში, რომლის მიცემაც ფიცით აღუთქვა უფალმა თქვენს მამებს და მათ შთამომავლობას, ქვეყანაში, სადაც რძე და თაფლი მოედინება.

¹⁰რადგან ქვეყანა, სადაც შენ მიდიხარ, რომ დაიმკვიდრო, არა ჰგავს ეგვიპტის ქვეყანას, საიდანაც თქვენ გამოხვედით, სადაც თესავდი თესლს და რწყავდი შენი ფეხით, როგორც რწყავენ ბაღ-ბოსტანს.

¹¹ხოლო ქვეყანა, რომლის დასამკვიდრებლადაც გაღმა გადიხარ, მთა-ველიანი ქვეყანაა და წვიმის წყლით ჟივდება,

¹²ქვეყანა, რომელზეც უფალი, შენი ღმერთი, ზრუნავს გამუდმებით. უფლის, შენი ღმერთის, თვალი ტრიალებს მასში წლიდან წლამდე.

¹³და თუ შეიგონებთ ჩემს მცნებებს, რომელთაც მე გიცხადებთ დღეს, რომ გიყვარდეთ უფალი, თქვენი ღმერთი, და ემსახუროთ მას მთელი თქვენი გულით და მთელი თქვენი სულით,

¹⁴მაშინ მივცემ თქვენს ქვეყანას თავის დროზე შემოდგომისა და გაზაფხულის წვიმებს. და თქვენც მოიწევთ თქვენს მარცვლეულს, ღვინოსა და ზეთს.

¹⁵და შენს სერებზე გავაჩენ ბალახს შენი პირუტყვისათვის, – და აღარ იშიმშილებთ.

¹⁶მაგრამ გაფრთხილდით, რომ არ შეცდეს თქვენი გული და რომ არ გადაიხაროთ უცხო ღმერთებისაკენ, არ ემსახუროთ და არ ეთაყვანოთ მათ.

¹⁷თორემ აღეგზნება რისხვა უფლისა თქვენზე და დახშავს ცას, და არ მოვა წვიმა, და მიწა აღარ მოგცემთ ნაყოფს, და მალევე გადაშენდებით ამ მშვენიერი ქვეყნიდან, რომელსაც უფალი გაძლევთ თქვენ.

¹⁸და ჩაიდეთ ეს ჩემი სიტყვები გულსა და სულში, და შეიბით იგი ნიშნად მაჯაზე, და იყოს ის თქვენს შუბლსაკრავებში.

¹⁹და ასწავლეთ ის თქვენს შვილებს, ელაპარაკეთ მათ შინ და გარეთ, გზაზე სვლისას, დაწოლისას და ადგომისას.

²⁰და წააწერეთ ის თქვენი სახლების წირთხლებსა და თქვენს კარიბჭეებს,

²¹რათა გამრავლდნენ თქვენი და თქვენი შვილების დღენი იმ მიწაზე, რომლის მოცემაც ფიცით აღუთქვა უფალმა თქვენს მამებს, ვიდრე ცა და დედამიწას იარსებებს.

²²რადგან, თუ მტკიცედ დაიცავთ ყველა ამ ბრძანებას, რომელთაც ახლა მე გაუწყებთ შესასრულებლად, გეყვარებათ უფალი, თქვენი ღმერთი, და ივლით მისი გზით და მას მიეკვრებით,

²³მაშინ განდევნის უფალი ყველა ამ ხალხს თქვენი პირისაგან და თქვენ დაეუფლებით თქვენზე მრავალრიცხოვან და ბევრად ძლიერ ხალხებს.

²⁴ყოველი ადგილი, სადაც თქვენ ფეხს დასცემთ, თქვენი იქნება – მთელი ქვეყანა უდაბნოდან ლიბანამდე, მდინარიდან – მდინარე ევფრატიდან – დასავლეთის ზღვამდე თქვენი სამფლობელო იქნება.

²⁵წინ ვერავინ დაგიდგებათ. თქვენს შიშსა და ზარს დასცემს უფალი, თქვენი ღმერთი, მთელი დედამიწის ზურგს, სადაც კი ფეხს დასცემთ, როგორც მან აღგითქვათ.

²⁶აჰა, მე დღეს გთავაზობთ კურთხევას – ან შეჩვენებას:

²⁷კურთხევას – თუ შეისმენთ უფლის, თქვენი ღმერთის, მცნებებს, რომელთაც მე გაუწყებთ დღეს,

²⁸ხოლო შეჩვენებას – თუ არ შეისმენთ უფლის, თქვენი ღმერთის, მცნებებს, და გადაუხვევთ იმ გზიდან, რომელსაც მე გაუწყებთ დღეს, და გაჰყვებით უცხო ღმერთებს, რომელთაც არ იცნობთ.

²⁹და როცა შეგიყვანს უფალი, შენი ღმერთი, იმ ქვეყანაში, რომლის დასამკვიდრებლადაც მიდიხარ, მაშინ აღავლინე კურთხევა გერიზიმის მთაზე და შეჩვენება – ღებალის მთაზე,

³⁰რომლებიც აქვეა, იორდანეს გაღმა, მზის დასავლის გზისკენ, ქანაანელთა ქვეყანაში, რომლებიც ყარაბაში ცხოვრობენ, გილგალის ახლოს, მორეს მუხნარის ახლოს.

³¹რადგან თქვენ გადადიხართ იორდანეზე, რომ მიხვიდეთ იმ ქვეყნის დასამკვიდრებლად, რომელსაც უფალი, თქვენი ღმერთი, გაძლევთ, და დაიმკვიდრებთ მას და იქ დასახლდებით,

³²დაიცავით შესასრულებლად ყველა მცნება და სამართალი, რომელსაც მე გაუწყებთ თქვენ დღეს.