Read სბს–2013 მეორე რჯული 12 Bible Online

მეორე რჯული 12 - სბს–2013 bible

მეორე რჯული 12

¹აჰა, წესები და კანონები, რომელთაც უნდა ასრულებდეთ მთელი თქვენი დღე და მოსწრება იმ ქვეყანაში, სამკვიდროდ რომ მოგცათ უფალმა, თქვენი მამების ღმერთმა,

²გაანადგურეთ ყველა ის ადგილი, სადაც ის ხალხები, რომელთაც თქვენ განდევნით, თავიანთ ღმერთებს ემსახურებოდნენ, მაღალ მთებსა და ბორცვებზე, და ყველა ფოთლოვანი ხის ძირას.

³და დააქციეთ მათი სამსხვერპლოები, და დალეწეთ მათი ძეგლები, და მათი აშერები დაწვით ცეცხლით, და მათი ღმერთების ქანდაკებები დაჩეხეთ და მოსპეთ მათი სახელი იქიდან.

⁴ხოლო ასე ნუ მოექცევით უფალს, თქვენს ღმერთს.

⁵მხოლოდ იმ ადგილს მიმართეთ და იქ მიდით, რომელსაც ამოირჩევს უფალი, თქვენი ღმერთი, თქვენი ერთ-ერთი ტომის სამკვიდროდან თავისი სახელის დასადებად, თავის სავანედ.

⁶და იქ მიიტანეთ თქვენი სრულადდასაწველი და თქვენი საკლავი, თქვენი მეათედები, თქვენი ხელის აღსამართავი და თქვენი აღთქმული, თქვენი ნებაყოფლობითი შესაწირავები ცხვრისა და ფურის პირველმოგებული.

⁷და ჭამეთ იქ უფლის, თქვენი ღმერთის, წინაშე, და გაიხარეთ თქვენ და თქვენმა სახლმა თქვენი ნაამაგარით, რომელიც გიკურთხათ უფალმა, თქვენმა ღმერთმა.

⁸არ გააკეთოთ ყოველივე ის, რასაც ჩვენ აქ ვაკეთებთ დღეს, – თითოეული ჩვენთაგანი თავის ჭკუაზე,

⁹რადგან ჯერ კიდევ არ შესულხართ იმ ქვეყანაში, სადაც მშვიდობიანად იცხოვრებთ, იმ სამკვიდროში, რომელსაც უფალი, თქვენი ღმერთი, გაძლევთ.

¹⁰მაგრამ როცა გადახვალთ იორდანეს და დასახლდებით ქვეყანაში, რომელსაც უფალი, თქვენი ღმერთი, გიმკვიდრებთ, და სადაც დაგასვენებთ მტერთაგან, და უშიშრად იცხოვრებთ,

¹¹მაშინ იმ ადგილას, რომელსაც ამოირჩევს უფალი, თქვენი ღმერთი, თავისი სახელის დასავანებლად, მიიტანეთ ყოველივე, რასაც მე გიბრძანებთ: თქვენი სრულადდასაწველი და თქვენი საკლავი, თქვენი მეათედები, და თქვენი ხელის აღსამართავები და ყოველი რჩეული თქვენს აღთქმულთაგან, რაც კი აღუთქვით უფალს.

¹²და იმხიარულეთ უფლის, თქვენი ღმერთის, წინაშე თქვენ და თქვენმა ძეებმა, და თქვენმა ასულებმა, და თქვენმა მსახურებმა, და თქვენმა მხევლებმა, და ლევიანმა, რომელიც თქვენს კარიბჭესთან დგას (რადგან არა აქვს თავისი წილი და სამკვიდრო თქვენგან განსხვავებით).

¹³გაფრთხილდი, არ აღავლინო შენი სრულადდასაწველი ყველგან, სადაც თვალი მიგიწვდება,

¹⁴არამედ მხოლოდ იმ ადგილას, რომელსაც ამოირჩევს უფალი შენს ერთ-ერთ ტომში; იქ აღავლინე შენი სრულადდასაწველი, და იქ გააკეთე ყველაფერი, რასაც მე გიბრძანებ.

¹⁵ოღონდ ყოველთვის, როცა გულით მოისურვებ, შეგიძლია, დაკლა საკლავი და უფლის, შენი ღმერთის, კურთხევით ჭამო ხორცი, რომელიც მან მოგცა შენს ქალაქებში. გაუწმიდურებულსაც და გასუფთავებულსაც შეუძლია ჭამოს, როგორც ჭამენ ქურციკს და როგორც ჭამენ ირემს.

¹⁶ოღონდ სისხლი არ ჭამოთ, ის წყალივით დაღვარეთ მიწაზე.

¹⁷არ შეგიძლია, ჭამო შენს ქალაქებში პურის, ღვინისა და ზეთის მეათედი და შენი ცხვრისა და ფურის პირველმოგებული, და ყოველი შენი აღთქმული შესაწირავი, რომელიც აღთქმული გაქვს – შენი ნებაყოფლობითი შესაწირავები და შენი ხელის აღსამართავი.

¹⁸არამედ მხოლოდ უფლის, შენი ღმერთის, წინაშე ჭამეთ ის იმ ადგილას, რომელსაც ამოირჩევს უფალი, შენი ღმერთი, შენ და შენმა ძემ და შენმა ასულმა, შენმა მსახურმა და შენმა მხევალმა, და ლევიანმა, რომელიც შენს ქალაქში ცხოვრობს. და გაიხარე უფლის, შენი ღმერთის, წინაშე მთელი შენი ნაამაგრით.

¹⁹იცოდე, არ მიატოვო ლევიანი, ვიდრე ცოცხლობ შენს მიწაზე.

²⁰როდესაც გააფართოვებს უფალი, შენი ღმერთი, შენს საზღვარს, როგორც გაუწყა და იტყვი: შევჭამო ხორცს, რადგან გული მიგივა ხორცის საჭმელად, მაშინ შენი გულის სურვილისამებრ ჭამე ხორცი.

²¹თუ შორს იქნება შენგან ის ადგილი, რომელსაც ამოირჩევს უფალი, შენი ღმერთი, თავისი სახელის იქ დასავანებლად, როგორც მე გიბრძანე, დაკალი შენი ზვარაკი ან ცხვარი, რომელიც მოგცა უფალმა, და ჭამე შენს ქალაქში, როცა მოგესურვება,

²²ოღონდ, როგორც ქურციკსა და ირემს ჭამენ, ისე ჭამეთ ის; გაუწმიდურებულსაც და გასუფთავებულსაც შეუძლიათ ჭამონ ის.

²³მხოლოდ მკაცრად ეკრძალე, რათა არა ჭამო სისხლი, რადგან სისხლი სულია და არ უნდა ჭამო სული ხორცთან ერთად.

²⁴არ ჭამო ის, წყალივით დაღვარე მიწაზე;

²⁵არ ჭამოთ ის, რათა კარგად იყვნეთ შენ და, შენს შემდეგ, შენი ძენი, რადგან იმას გააკეთებ, რაც სწორია უფლის თვალში.

²⁶ოღონდ აიღე შენი წმიდა შესაწირავები, რაც გექნება, და შენი აღთქმული მსხვერპლები და მიდი იმ ადგილას, რომელსაც გამოარჩევს უფალი.

²⁷და შესწირე შენი სრულადდასაწველი, ხორცი და სისხლი, უფლის, შენი ღმერთის, საკურთხეველზე. შენი სხვა მსხვერპლის სისხლი უნდა დაიღვაროს უფლის, შენი ღმერთის, საკურთხეველზე, ხორცი კი ჭამე.

²⁸დაიცავი და გაიგონე ყველა ეს სიტყვა, რომელსაც მე გიბრძანებ, რათა კარგად იყვნეთ შენ და შენი შვილები, შენს შემდეგ, უკუნისამდე, რადგან იმას გააკეთებ, რაც კარგი და სწორია უფლის, შენი ღმერთის თვალში.

²⁹როდესაც მოსრავს უფალი, შენი ღმერთი, ხალხებს, რომლებთანაც შენ მიდიხარ, რომ განდევნო ისინი შენი პირისაგან, და განდევნი მათ, და დასახლდები მათ მიწაზე,

³⁰გაფრთხილდი, არ გაება მახეში მას შემდეგ, რაც მოისპობიან შენი პირისაგან, და არ დაუწყო ძებნა მათ ღმერთებს და არ თქვა: როგორც ეს ხალხები ემსახურებიან თავიანთ ღმერთებს, მეც ისე მოვიქცევიო.

³¹და არ მოექცე უფალს, შენს ღმერთს, ასე, რადგან ყველა სისაძაგლეს, რაც უფალს სძულს, ისინი თავიანთ ღმერთებს უკეთებდნენ. ისინი თავიანთი ღმერთების გულისთვის იმასაც კი აკეთებდნენ, რომ ცეცხლში უწვავდნენ თავიანთ ძეებსა და ასულებს.

³²ყოველი სიტყვა, რომელსაც მე გიბრძანებთ, შეასრულეთ. ნურც რამეს მიუმატებთ მას და ნურც რამეს მოაკლებთ.