Read სბს–2013 მეორე რჯული 13 Bible Online

მეორე რჯული 13 - სბს–2013 bible

მეორე რჯული 13

¹თქვენში რომ აღდგეს წინასწარმეტყველი ან სიზმართმხილველი და მოგცეთ რაიმე ნიშანი ან სასწაული,

²და ახდეს ეს ნიშანი ან სასწაული, რომელიც მან გაუწყათ, და თან გითხრათ: გავყვეთ სხვა ღმერთებსო (რომელთაც თქვენ არ იცნობთ) და ვემსახუროთო მათ,

³ყურს ნუ დაუგდებთ ამ წინასწარმეტყველის ან სიზმართმხილველის სიტყვებს, რადგან გცდით უფალი, თქვენი ღმერთი, რათა შეიტყოს, გიყვართ თუ არა უფალი, თქვენი ღმერთი, მთელი თქვენი სულითა და გულით;

⁴გაჰყევით უფლის, თქვენი ღმერთის, კვალს და გეშინოდეთ მისი. და დაიცავით მისი მცნებები, ისმინეთ მისი ხმა და ემსახურეთ მას, და მას მიეკარით.

⁵და ის წინასწარმეტყველი თუ სიზმართმხილველი უნდა მოიკლას, რადგან მან გირჩიათ განდგომა უფლის, თქვენი ღმერთისაგან, რომელმაც გამოგიყვანათ ეგვიპტიდან და გამოგისყიდათ მონობის სახლიდან, რათა იმ გზიდან აეცდინეთ, რომელზეც გიბრძანათ სიარული უფალმა, თქვენმა ღმერთმა. და აღმოფხვერით ბოროტება თქვენი წიაღიდან.

⁶თუ წაგაქეზოს შენმა ძმამ – დედაშენის ნაშობმა – ან შენმა შვილმა, ან შენმა ასულმა, ან შენს მკლავზე მწოლმა ცოლმა, ან მეგობარმა, რომელიც საკუთარ სიცოცხლეს გერჩივნა, და საიდუმლოდ გითხრას: „წავიდეთ და ვემსახუროთ სხვა ღმერთებს“, რომელთაც არც შენ იცნობ და არც შენი მამები იცნობდნენ,

⁷ღმერთებს იმ ხალხებისა, რომლებიც თქვენს ირგვლივ არიან – თქვენგან ახლოს თუ თქვენგან შორს, ქვეყნის კიდეებამდე,

⁸არ დათანხმდე და არ უსმინო მას. არ შეიბრალო, არ შეიბრალო იგი და არ დაინანო იგი,

⁹არამედ მოკალი. პირველი შენი ხელი უნდა აღიმართოს მის მოსაკლავად და მერე მთელი ერის ხელი.

¹⁰ჩაქოლე იგი, და მოკვდეს, რადგან განზრახული ჰქონდა, ჩამოეცილებინე უფლის, შენი ღმერთისაგან, რომელმაც გამოგიყვანა ეგვიპტის ქვეყნიდან – მონობის სახლიდან.

¹¹მთელი ისრაელი მოისმენს ამას და შეშინდება, და შემდგომ აღარ ჩაიდენენ ასეთ ბოროტებას თქვენში.

¹²და თუ გაიგებთ, რომ რომელიმე თქვენს ქალაქში, რომელიც საცხოვრებლად მოგცათ უფალმა, თქვენმა ღმერთმა,

¹³გამოჩნდნენ უღირსი კაცები თქვენი წიაღიდან და შეაცდინეს ამ ქალაქის მცხოვრებნი ამ სიტყვებით: „წავიდეთ და ვემსახუროთ სხვა ღმერთებს.“ თქვენ კი არ იცნობთ იმ ღმერთებს,

¹⁴გამოიძიე, გამოიკვლიე და კარგად გამოიკითხე და, თუ ეს სრული სიმართლეა და ნამდვილად მოხდა ეს სისაძაგლე თქვენში,

¹⁵მახვილის პირით შემუსრე იმ ქალაქის მცხოვრებნი, და დაარისხე იგი და ყველაფერი, რაც მასშია, თვით პირუტყვიც გაჟლიტეთ ბასრი მახვილით.

¹⁶მთელი ნადავლი შეაგროვეთ ქალაქის შუა მოედანზე და ცეცხლით დაწვით ქალაქიცა და მთელი ის ნადავლიც, როგორც უფლის, შენი ღმერთის, სრულადდასაწველი მსხვერპლი. დაე საუკუნო ნანგრევებად დარჩეს ეს ქალაქი და აღარასოდეს აშენდეს.

¹⁷ნუ მიეკარება შენი ხელი იმ დარისხებულს, რათა მოიქცეს უფალი რისხვისაგან და მოგცეს წყალობა და შეგინდოს, და გაგამრავლოს, როგორც შეჰფიცა შენს მამებს.

¹⁸და ასე იქნება, თუ მოუსმენ უფლის, შენი ღმერთის, ხმას, დაიცავ ყველა მის მცნებას, რომელთაც მე გაუწყებ დღეს, და გააკეთებ, რაც სწორია უფლის, შენი ღმერთის, თვალში.