Read სბს–2013 მეორე რჯული 14 Bible Online

მეორე რჯული 14 - სბს–2013 bible

მეორე რჯული 14

¹თქვენ ხართ ძენი უფლისა, თქვენი ღმერთისა. მკვდრის დატირებაზე ტანს ნუ დაისერავთ და თმას ნუ აიპარსავთ შუბლს ზემოთ.

²რადგან წმიდა ხალხი ხართ თქვენ უფლის, თქვენი ღმერთისათვის, და თქვენ ამოგირჩიათ უფალმა, რომ მისი უნჯი ხალხი ყოფილიყავით, ყველა სხვა ხალხებს შორის დედამიწის ზურგზე.

³ისეთი არაფერი ჭამოთ, რაც უფლისთვის სისაძაგლეა.

⁴აი, ის ცხოველები, რომელთა ჭამაც შეგიძლიათ: ხარი, ცხვარი, თხა,

⁵ირემი, ქურციკი, შველი, არჩვი, ანტილოპა, კამეჩი და ნიამორი.

⁶და ყოველი ჩლიქგაყოფილი პირუტყვი, თუ გაცალკევებული აქვს ჩლიქები მთლიანად და იცოხნის, ის ჭამეთ.

⁷ოღონდ ამათგან (მცოხნელთაგან და ჩლიქგაყოფილთაგან) არ ჭამოთ აქლემი, კურდღელი და კლდის ბოცვერი, რადგან იცოხნიან, მაგრამ ჩლიქი არა აქვთ გაცალკევებული, უწმიდურია ისინი თქვენთვის.

⁸და ღორი, რომელსაც ჩლიქი აქვს გაყოფილი, მაგრამ არ იცოხნის, უწმიდურია თქვენთვის. მათი ხორცი არ ჭამოთ და მათ მძორს ნუ მიეკარებით.

⁹და აი, რის ჭამა შეგიძლიათ იმათგან, რაც წყალშია: ჭამეთ ყოველი, რასაც ფარფლი და ქერცლი აქვს;

¹⁰და ყოველი, რასაც არა აქვს ფარფლი და ქერცლი, არ ჭამოთ, უწმიდურია ის თქვენთვის.

¹¹ყოველი წმიდა ფრინველი ჭამეთ.

¹²და აი, რა არ უნდა ჭამოთ ფრინველთაგან: ორბი, არწივი და სვავი,

¹³ძერა, შევარდენი, სონღული და მათნაირები,

¹⁴ყველა ყორანი მისი გვარობითურთ,

¹⁵სირაქლემა, ბუ, თოლია, მიმინო და ყველა მისნაირი,

¹⁶ბუკიოტი, ბუკნაჭო, ჭოტი,

¹⁷ვარხვი, სვავი, თევზიყლაპია,

¹⁸ყარყატი, ყანჩა და მისნაირნი, ოფოფი და ღამურა.

¹⁹და ყოველი ფრთიანი მწერი უწმიდურია თქვენთვის, ნუ შეჭამთ.

²⁰ყოველი წმიდა ფრინველი ჭამეთ.

²¹არ ჭამოთ არავითარი უსულადი ხიზანს მიეცი, რომელიც შენს კარიბჭეებშია, და ჭამოს, ან უცხოელს მიჰყიდეთ. თქვენ ხომ წმიდა ხალხი ხართ უფლის, თქვენი ღმერთისათვის.თიკანს ნუ მოხარშავთ თავისი დედის რძეში.

²²ყოველ წელს უფლისათვის გადადე მეათედი მთელი შენი მოსავლისა, რაც მოგდის მინდორში,

²³და იგი ჭამე უფლის წინაშე იმ ადგილას, რომელსაც უფალი ამოირჩევს თავისი სახელის იქ დასავანებლად: მიიტანე მეათედი შენი ხორბლისა, შენი ღვინისა და შენი ზეთისა, და შენი ცხვარ-ძროხის პირველმოგებულისა, რათა ისწავლო უფლის, შენი ღმერთის შიში სამუდამოდ.

²⁴და თუ შორი გზა იქნება და ვერ შეძლებ მის ტარებას იქამდე, რადგან შორსაა შენგან ის ადგილი, რომელიც ამოირჩია უფალმა, შენმა ღმერთმა, თავისი სახელის იქ დასავანებლად, როცა გაკურთხებს უფალი, შენი ღმერთი,

²⁵გადაცვალე ის ვერცხლზე, აიღე ის ვერცხლი და წადი იქ, რომელიც აირჩია უფალმა, შენმა ღმერთმა,

²⁶და გადაცვალე ის ვერცხლი იმაზე, რასაც შენი სული მოისურვებს: ცხვარ-ძროხაზე, ღვინო-არაყზე და, და რასაც ისურვებ. და ჭამეთ იქ უფლის, შენი ღმერთის, წინაშე, და გაიხარეთ შენ და შენმა სახლმა.

²⁷და არ დაივიწყო ლევიანები, რომელნიც შენს კარიბჭეებშია, რადგან მათ, შენგან განსხვავებით, არა აქვთ წილი და სამკვიდრო შენთან.

²⁸ყოველი მესამე წლის ბოლოს აიღე მეათედი ამ წლის მოსავლიდან და მიიტანე ქალაქის კარიბჭეებში.

²⁹და მოვიდნენ ლევიანები (რადგან შენგან განსხვავებით, არ გააჩნია თავისი წილი და სამკვიდრო); მოვიდნენ ხიზნები, ქვრივ-ობლები, რომლებიც შენს კარიბჭეებში არიან, და ჭამონ მაძღრისად, რათა აკურთხოს უფალმა, შენმა ღმერთმა, შენი ხელის ყოველი საქმე, რასაც აკეთებ.