Read სბს–2013 მეორე რჯული 15 Bible Online

მეორე რჯული 15 - სბს–2013 bible

მეორე რჯული 15

¹ყოველ მეშვიდე წელს გქონდეს პატიების წელი.

²პატიება ნიშნავს, რომ მევალემ უნდა აპატიოს თავის მოყვასს სესხი, რადგან პატიების წელი უფლის სახელით ცხადდება.

³უცხოელს შეგიძლია მოსთხოვო ვალი, მაგრამ შენს მოძმეს უნდა აპატიო.

⁴თუმცა, არავინ იქნება თქვენში გლახაკი, რადგან კურთხევით გაკურთხებს უფალი იმ ქვეყანაში, რომელსაც უფალი, შენი ღმერთი, გაძლევს დასამკვიდრებლად,

⁵ოღონდ თუ შეისმენ უფლის, შენი ღმერთის, ხმას, და დაიცავ შესასრულებლად ყველა იმ მცნებას, რომელსაც მე გიბრძანებ დღეს.

⁶რადგან უფალი, შენი ღმერთი, გაკურთხებს შენ, როგორც გაუწყა, რომ შენ ასესხებ მრავალ ხალხებს, შენ კი არ ისესხებ. შენ იბატონებ ბევრ ხალხებზე, ისინი კი არ იბატონებენ შენზე.

⁷თუ იქნება შენთან გლახაკი, ერთი შენი მოძმეთაგანი, შენს რომელიმე ქალაქში, იმ მიწაზე, რომელსაც უფალი, შენი ღმერთი, გაძლევს, ნუ გაიქვავებ გულს და ნუ გაძუნწდები შენი ღარიბი მოძმის მიმართ,

⁸არამედ ხელგაშლილი იყავი და ასესხე მას მისი გასაჭირისამებრ, რაც მას სჭირდება.

⁹გაფრთხილდი, რომ გულში უღირსი ფიქრი არ შეგეპაროს და არ თქვა: მოახლოვდაო მეშვიდე წელი, პატიების წელიწადი, და უარი არ უთხრა შენს გლახაკ მოძმეს, თორემ ის უფალს შესჩივლებს და ცოდვა დაგედება.

¹⁰მიცემით მიეცი მას, და რომ ასესხებ, გულს ნუ შეიწუხებ – და გაკურთხებს უფალი, შენი ღმერთი, ყოველ შენს საქმესა და ნაამაგარში.

¹¹რადგან არ დაილევა გლახაკი შენს ქვეყანაში, ამიტომ გიბრძანებ, ხელგაშლილი იყო შენი მოძმის მიმართ, შენი ღარიბისა და შენი უპოვარის მიმართ შენს ქვეყანაში.

¹²თუ მოგეყიდოს შენი ებრაელი მოძმე, ქალი ან კაცი, ექვსი წელი გემსახუროს, და მეშვიდე წელს გაათავისუფლე.

¹³და როცა გაათავისუფლებ, ხელცარიელი არ გაუშვა.

¹⁴დაასაჩუქრე შენი ფარიდან, შენი კალოდან და შენი საწნახლიდან; რითაც გაკურთხა უფალმა, შენმა ღმერთმა, მიეცი მას.

¹⁵გახსოვდეს, რომ შენც მონა იყავი ეგვიპტის ქვეყანაში და გამოგიხსნა უფალმა, შენმა ღმერთმა. ამიტომ გიბრძანებ ამ სიტყვას დღეს.

¹⁶და თუ გეტყვის, რომ არ უნდა შენგან წასვლა, რადგან მან შეგიყვარა შენ და შეიყვარა შენი სახლი, და რომ, კარგად არის შენთან,

¹⁷მაშინ აიღე სადგისი, ყური მიადებინე კარებზე და გაუხვრიტე. და შენი მსახური იქნება სამუდამოდ. ასევე მოექეცი შენს მხევალსაც.

¹⁸ნუ გეძნელება მისი გათავისუფლება, რადგან მოჯამაგირის ორმაგი ქირა დაიმსახურა შენგან ექვს წელიწადში. და აკურთხებს უფალი, შენი ღმერთი, ყოველ შენს საქმეს, რასაც ხელს მოჰკიდებ.

¹⁹შესწირე უფალს, შენს ღმერთს, ყოველი პირველმოგებული მამალი შენი ცხვარ-ძროხიდან. არ ამუშაო შენი პირველმოგებული სახარე და არ გაპარსო შენი ცხვრის პირველმოგებული.

²⁰უფლის, შენი ღმერთის, წინაშე ჭამეთ იგი ყოველ წელიწადს შენ და შენმა სახლმა იმ ადგილას, რომელსაც ამოირჩევს უფალი.

²¹და თუ რაიმე ხინჯი ექნება პირუტყვს – სიკოჭლე ან სიბრმავე, ან რაიმე ცუდი ნაკლი, ნუ შესწირავ უფალს, შენს ღმერთს.

²²შენს კარიბჭეებში ჭამე იგი. გაუწმიდურებულსაც და გასუფთავებულსაც შეუძლია ჭამოს იგი ისევე, როგორც ქურციკი და ირემი.

²³ოღონდ მისი სისხლი არ ჭამო, წყალივით დაღვარე მიწაზე.