Read სბს–2013 მეორე რჯული 18 Bible Online

მეორე რჯული 18 - სბს–2013 bible

მეორე რჯული 18

¹ლევიან მღვდლებს და ლევის მთელ ტომს, ისრაელიანთა სხვა ტომებივით არ ექნებათ წილი და სამკვიდრო ისრაელთან; მათი წილია საუფლო მსხვერპლი, და იმით უნდა იკვებონ.

²ლევის ტომს სამკვიდრო წილი არ ექნება თავის მოძმეთა შორის. თვით უფალია მათი სამკვიდრო, როგორც აუწყა მან მათ.

³აი რა უნდა განეკუთვნოს მღვდლებს ხალხისაგან, მათგან, ვინც მსხვერპლად სწირავს ხარს ან ცხვარს: თითოეულმა მისცეს მღვდელს ბეჭი, ყბები და კუჭი.

⁴პირველმოწეული მარცვლეული, ღვინო, ზეთი შენი მოსავლიდან, და აგრეთვე ცხვრის პირველგანაპარსიდან მიეცი მღვდელს,

⁵რადგან ის ამოირჩია უფალმა, შენმა ღმერთმა, ყველა შენი ტომიდან, რათა იდგნენ და მსახურებდნენ უფლის სახელით ის და მისი ძენი სამუდამოდ.

⁶და თუ მოვა ლევიანი ისრაელის რომელიმე ქალაქიდან სადაც ის ცხოვრობდა, და მოვა თავისი სულის სურვილით იმ ადგილას, რომელსაც ამოირჩევს უფალი,

⁷და იმსახურებს უფლის, შენი ღმერთის, სახელით, როგორც ყველა მისი მოძმე ლევიანი, რომლებიც იქ დგანან უფლის წინაშე,

⁸მანაც მათი თანაბარი წილი უნდა მიიღოს საკვებად, თუნდაც მამამისის გაყიდული ქონებიდან ჰქონდეს რაღაც საარსებო.

⁹როცა მიხვალ იმ ქვეყანაში, რომელსაც უფალი, შენი ღმერთი, გაძლევს, არ დაიწყო შენც იმ ხალხის მსგავსად სისაძაგლეების კეთება.

¹⁰ნუ იქნება თქვენში თავისი ძისა და თავისი ასულის ცეცხლში გამტარებელი, ჯადოქარი, მისანი, მარჩიელი, მსახვრალი,

¹¹გრძნეული, მესულთანე, ჯადოქარი და მკვდართა გამომხმობი,

¹²ვინაიდან სისაძაგლეა უფლისათვის ყოველივე ამის მოქმედი, და ამ სისაძაგლეთა გამო უფალი, შენი ღმერთი, სდევნის მათ შენგან.

¹³უნაკლო იყავი უფალთან, შენს ღმერთთან,

¹⁴რადგან ის ხალხები, რომელთაც შენ განდევნი, გრძნეულებსა და მისნებს უსმენენ. შენთვის კი ამის ნება არ მოუცია უფალს, შენს ღმერთს.

¹⁵ჩემნაირ წინასწარმეტყველს აღგიდგენს შენ უფალი, შენი ღმერთი, შენი წიაღიდან, შენს მოძმეთაგან, მას უსმინე.

¹⁶რადგან, როცა შენ შესთხოვე უფალს, შენს ღმერთს, ხორებთან თავშეყრის დღეს: მეტს ნუღარ გავიგონებო უფლის, ჩემი ღმერთის, ხმას და ამ დიდ ცეცხლს ნუღარ ვიხილავ, რომ არ მოვკვდეო.

¹⁷მითხრა მე უფალმა: „კარგი ქნეს, ეს რომ გითხრეს შენ;

¹⁸შენნაირ წინასწარმეტყველს აღვუდგენ მათ ძმათა წიაღიდან, შენს მსგავსს, და ჩავუდებ ჩემს სიტყვას ბაგეებში, და ის ეტყვის მათ ყველაფერს, რასაც ვუბრძანებ.

¹⁹ხოლო ის, ვინც არ გაიგონებს ჩემს სიტყვებს, რომელთაც ჩემი სახელით ილაპარაკებს წინასწარმეტყველი, მე თვითონ დავსჯი მას.

²⁰ხოლო წინასწარმეტყველი, რომელიც გათავხედდება და ჩემი სახელით იმას ილაპარაკებს, რისი თქმაც მე მისთვის არ მიბრძანებია, და რომელიც ილაპარაკებს სხვა ღმერთების სახელით, სასიკვდილოდ მიეცით ის წინასწარმეტყველი.“

²¹და თუ იტყვი შენს გულში: „როგორ გავიგებ სიტყვას, რომელიც უფალს არ უთქვამს?“

²²თუ წინასწარმეტყველი ილაპარაკებს უფლის სახელით და არ ასრულდება ის სიტყვა და არ ახდება, მაშინ ის სიტყვა არ უთქვამს უფალს. იგი თავხედურად უთქვამს წინასწარმეტყველს, – ნუ შეგეშინდება მისი.