Read სბს–2013 მეორე რჯული 20 Bible Online

მეორე რჯული 20 - სბს–2013 bible

მეორე რჯული 20

¹როცა ომში გახვალ შენი მტრის წინააღმდეგ და დაინახავ ცხენებსა და ეტლებს და შენზე უამრავ ჯარს, ნუ შეუშინდები მათ, რადგან შენთანაა უფალი, შენი ღმერთი, რომელმაც გამოგიყვანა ეგვიპტის ქვეყნიდან.

²და როცა ომს მიუახლოვდებით, მოდგეს მღვდელი და ხალხს ელაპარაკოს,

³და უთხრას მათ: „ისმინე, ისრაელ! თქვენ დღეს ებმებით ომში თქვენს მტრებთან. ნუ შეკრთება თქვენი გული, ნუ შეშინდებით, ან ნუ შეძრწუნდებით მათ წინაშე,

⁴რადგან უფალი, თქვენი ღმერთი, თქვენთან ერთად მოდის თქვენს მტრებთან საომრად, რათა გადაგარჩინოთ თქვენ.“

⁵ზედამხედველებმა კი ასე უთხრან ხალხს: „თქვენს შორის ვინც ახალი სახლი აიშენა და ვერ მოასწრო მისი კურთხევა, წავიდეს და შინ დაუბრუნდეს, რომ ბრძოლაში არ მოკვდეს და სხვამ არ აკურთხოს მისი სახლი;

⁶ვინც ვენახი გააშენა და ვერ მოასწრო ნაყოფის მოწევა, შინ წავიდეს, რომ ბრძოლაში არ მოკვდეს და სხვამ არ მოისთვლას მისი ვენახი;

⁷ვინც ქალი დანიშნა და ჯერ არ შეურთავს, წავიდეს და დაუბრუნდეს თავის სახლს, რომ ბრძოლაში არ მოკვდეს და სხვამ არ წაიყვანოს ის ქალი.“

⁸და კიდევ ელაპარაკონ ზედამხედველები ხალხს და უთხრან: „ვინც მშიშარაა და ჯაბანი, წავიდეს და დაუბრუნდეს თავის სახლს, რათა თავისი გულივით არ გაუდედლოს თავის მოძმეებს გული.“

⁹როცა ზედამხედველები მორჩებიან ხალხთან ლაპარაკს, მაშინ დაუყენეთ სარდლები ხალხს მეთაურებად.

¹⁰როცა მიუახლოვდები ქალაქს საომრად, ჯერ ზავისაკენ მოუწოდე მას.

¹¹თუ ზავზე დაგთანხმდეს და კარიბჭე გაგიღოს, მთელი ხალხი, ვინც კი იქ აღმოჩნდება, შენს ხარკს დაიდებს და ყმა გაგიხდება.

¹²და თუ არ დაგეზავა და ომი გაგიმართა, ალყა შემოარტყი,

¹³და როცა ხელში ჩაგიგდებს მას უფალი, შენი ღმერთი, მახვილის პირით განგმირე ყველა მისი მამაკაცი.

¹⁴მხოლოდ ქალები, ბავშვები, პირუტყვი და რაც ქალაქში იქნება, შეგიძლია ნადავლად დაიტაცო; ჭამე ნადავლი შენი მტრისა, რომელიც უფალმა, შენმა ღმერთმა, ჩაგიგდო ხელში.

¹⁵ასევე მოექეცი შენგან ძალზე დაშორებულ ყველა ქალაქს, რომლებიც არ ეკუთვნის აქაურ ხალხებს.

¹⁶მხოლოდ იმ ქალაქებში, რომლებსაც უფალი, შენი ღმერთი, გაძლევს სამკვიდროდ, არ აცოცხლო არც ერთი სული.

¹⁷პირწმინდად მოსპე ისინი – ხეთელები და ამორეველები, ქანაანელები და ფერიზელები, ხიველები და იებუსელები – როგორც გიბრძანა უფალმა, შენმა ღმერთმა.

¹⁸რათა არ გასწავლონ ყველა იმ სისაძაგლეების კეთება, რასაც ისინი აკეთებდნენ თავიანთი ღმერთებისათვის, და არ შესცოდოთ უფალს, თქვენს ღმერთს.

¹⁹თუ დიდხანს გეყოლება ქალაქი ალყაში, რათა იომო მის წინააღმდეგ მის ასაღებად, ნუ გაკაფავ ხეებს მის ირგვლივ, რადგან მის ნაყოფს ჭამ, და არ უნდა მოჭრა, რადგან ხე ადამიანი ხომ არ არის, რომ გაგექცეს და ციხესიმაგრეს შეაფაროს თავი?

²⁰მხოლოდ ის ხეები, რომლებიც იცი, რომ უნაყოფოა, შეგიძლია აჩეხო და ააგო მისგან სიმაგრე იმ ქალაქის წინააღმდეგ, რომელიც გეომება, ვიდრე არ დაიმორჩილებ.