Read სბს–2013 მეორე რჯული 22 Bible Online

მეორე რჯული 22 - სბს–2013 bible

მეორე რჯული 22

¹შენი მოძმის დაკარგული ხარი ან ცხვარი რომ ნახო, დაიჭირე და პატრონს მიჰგვარე.

²ხოლო თუ იგი შენთან ახლოს არ ცხოვრობს, ან შენ ვერ იცნო, ვისია პირუტყვი, შინ წაიყვანე და იქ გყავდეს, ვიდრე შენი მოძმე მოიკითხავდეს, და მაშინ დაუბრუნე.

³ასევე მოექეცი მის სახედარს და ასევე მოექეცი მის სამოსელს, და ასევე მოექეცი შენი მოძმის ყველა დანაკარგს, რაც დაკარგა და შენ იპოვე, თვალს ნუ აარიდებ.

⁴შენი მოძმის გზაზე დავარდნილი სახედარი ან ხარი რომ ნახო, თვალი არ აარიდო, მოეხმარე შენს მოძმეს მის წამოყენებაში.

⁵დედაკაცმა არ ჩაიცვას მამაკაცის სამოსელი და არ შეიმოსოს კაცი ქალის სამოსლით, რადაგან სძულს უფალს, შენს ღმერთს, ყველა ამის მოქმედი.

⁶თუ გზად მიმავალი წააწყდები ხეზე ან მიწაზე ჩიტის ბუდეს, რომელშიც დედა ზის ბარტყებზე ან კვერცხებზე, ნუ დაიჭერ დედას და ბარტყებს.

⁷დედა გაუშვი, ბარტყები კი შინ წაასხი, რათა ხელი მოგემართოს და იდღეგრძელო.

⁸თუ ახალ სახლს იშენებ, ბანს მოაჯირი შემოარტყი, რათა არავინ გადმოვარდეს ბანიდან და სისხლი არ დაედოს შენს სახლს.

⁹ნუ დათესავ ვენახში სხვა თესლს, რომ არ გააუწმიდურო ნაყოფი თესლისა, რომელსაც დათესავ და ვენახის მოსავალიც.

¹⁰ნუ მოხნავ გუთანში ერთად შებმული ხარითა და ვირით.

¹¹არ ჩაიცვა მატყლისა და სელის ნარევით ნაქსოვი სამოსელი.

¹²ფოჩები გაუკეთე შენი მოსასხამის ოთხივე კიდეს.

¹³თუ შეირთავს ვინმე ცოლს და შევა მასთან, და შემდეგ მოიძულებს მას იგი,

¹⁴ცილს დასწამებს და სახელს გაუტეხს და იტყვის: „ეს ქალი შევირთე, შევედი მასთან და ვერ ვპოვე მასში ქალწულობის ნიშნები,“

¹⁵ყმაწვილი ქალის მამამ და დედამ გაუტანონ ყმაწვილი ქალის ქალწულობის ნიშნები ქალაქის უხუცესებს კარიბჭესთან,

¹⁶და უთხრას ყმაწვილი ქალის მამამ უხუცესებს: „ჩემი ასული მივეცი მე ამ კაცს ცოლად და მან მოიძულა იგი,

¹⁷ცილი დასწამა და თქვა: ქალწული არ გამოდგაო შენი ასული; და აჰა, ნიშნები ჩემი ასულის ქალწულობისა.“ და გაშალონ სამოსელი ქალაქის უხუცესთა წინაშე.

¹⁸და აიყვანონ იმ ქალაქის უხუცესებმა ქმარი და გვემონ იგი,

¹⁹და დააჯარიმონ 100 ვერცხლით და მისცენ ყმაწვილი ქალის მამას, რადგან სახელი გაუტეხა ისრაელიან ქალწულს. და დარჩება ქალი მის ცოლად: ვერ გაუშვებს მას თავის სიცოცხლეში.

²⁰და თუ მართალი გამოდგა ეს სიტყვა და არ აღმოაჩნდა ქალწულობა ყმაწვილ ქალს,

²¹გამოიყვანონ ყმაწვილი ქალი თავისი მამის სახლის კართან და ჩაქოლონ ქალაქის ხალხმა, და მოკვდეს, რადგან სამარცხვინო საქმე ჩაიდინა ისრაელში: იმრუშა თავისი მამის სახლში. ასე აღმოფხვრი ბოროტებას შენი წიაღიდან.

²²თუ კაცს ქმრიან ქალთან მწოლარეს წაასწრეს, ორივე მოკლან – კაციც და ქალიც. ასე აღმოფხვრი ბოროტებას ისრაელიდან.

²³თუ კაცზე დანიშნულ ქალწულს ვინმე შეხვდება ქალაქში და დაწვება მასთან,

²⁴გამოიყვანეთ ორივე იმ ქალაქის კარიბჭესთან და ქვით ჩაქოლეთ, და მოკვდებიან – ქალწული იმისათვის, რომ არ მოუხმო საშველად, კაცი კი იმისათვის, რომ ნამუსი ახადა თავისი მოყვასის ცოლს. ასე აღმოფხვრი ბოროტებას შენი წიაღიდან.

²⁵თუ მინდორში ნახავს კაცი დანიშნულ ქალწულს, ძალით დაიჭერს და დაწვება მასთან, მოიკლას კაცი, რომელიც ქალთან დაწვა;

²⁶ქალწულს კი ნურაფერს უზამ. არა აქვს მას სასიკვდილო ცოდვა: რადგან ეს იმას ჰგავს, კაცი რომ დაესხას თავის მოყვასს და მოკლას იგი,

²⁷რადგან კაცმა იგი მინდორში ნახა, ქალწულმა იკივლა, და იქ არავინ იყო მისი შემწე.

²⁸თუ ნახავს კაცი ქალწულს, რომელიც არაა დანიშნული, დაიჭერს მას და დაწვება მასთან, და წაასწრებენ,

²⁹მისცეს მასთან მწოლარე კაცმა ყმაწვილი ქალის მამას 50 ვერცხლი და ქალი გახდება იმ კაცის ცოლი, რადგან ნამუსი ახადა მას, ვერ გაუშვებს მას თავის სიცოცხლეში.

³⁰არავინ შეირთოს თავისი მამის ცოლი რათა არ შეარცხვინოს თავისი მამა.