Read სბს–2013 მეორე რჯული 26 Bible Online

მეორე რჯული 26 - სბს–2013 bible

მეორე რჯული 26

¹როდესაც შეხვალ ქვეყანაში, რომელსაც უფალი, შენი ღმერთი, გაძლევს და დაიმკვიდრებ მას და დასახლდები იქ,

²აიღე მიწის ყოველი პირველნაყოფი, რომელსაც მოისთვლი ქვეყანაში, რომელსაც უფალი, შენი ღმერთი, გაძლევს, ჩაალაგე კალათაში და წადი იმ ადგილას, რომელსაც ამოირჩევს უფალი, შენი ღმერთი, თავისი სახელის იქ დასავანებლად.

³და მიდი მღვდელთან, რომელიც იმ ჟამად იქნება, და უთხარი: „ვაცხადებ დღეს უფლის, შენი ღმერთის წინაშე, რომ მე მოვედი იმ ქვეყანაში, რომლის მოცემაც ფიცით აღუთქვა უფალმა ჩვენს მამებს.“

⁴გამოგართმევს მღვდელი კალათას ხელიდან და დადგამს უფლის, შენი ღმერთის, საკურთხევლის წინ.

⁵და განაცხადებ და იტყვი უფლის, შენი ღმერთის, წინაშე: „მოხეტიალე არამელი იყო მამაჩემი და ჩავიდა ეგვიპტეში, და ხიზნობდა იქ მცირერიცხოვანი ხალხით, და გადაიქცა იქ დიდ ერად, ძლიერ და მრავალრიცხოვნად.

⁶ცუდად გვეპყრობოდნენ ჩვენ ეგვიპტელნი, და გვჩაგრავდნენ და მძიმე სამუშაოს გვაკისრებდნენ,

⁷და შევღაღადეთ უფალს, ჩვენი მამების ღმერთს, და ისმინა უფალმა ჩვენი ხმა, და იხილა ჩვენი გაჭირვება, ჩვენი ჯაფა და ჩვენი ჩაგვრა,

⁸და გამოგვიყვანა ჩვენ უფალმა ეგვიპტიდან ძლიერი ხელით და აღმართული მკლავით, დიდი საშინელებით და ნიშნებით და სასწაულებით.

⁹და მოგვიყვანა ჩვენ ამ ადგილას, და მოგვცა ეს ქვეყანა, ქვეყანა, სადაც მოედინება რძე და თაფლი.

¹⁰და ახლა კი, აჰა, მოვიტანე პირველმოწეული ნაყოფი მიწისა, რომელიც შენ მომეცი, უფალო!“ და დადგი იგი უფლის, შენი ღმერთის, წინაშე, და თაყვანი ეცი უფალს, შენს ღმერთს.

¹¹და გაიხარე ლევიანთან და ხიზანთან ერთად, რომელიც შენს წიაღშია, ყოველი სიკეთით, რაც კი მოუცია უფალს, შენს ღმერთს, შენთვის და შენი სახლისათვის.

¹²როცა დაასრულო შენი მოსავლიდან ყოველი მეათედის გამოყოფა მესამე წელს – მეათედის წელს – მიეცი ლევიანს, ხიზანს, ობოლსა და ქვრივს, და მაძღრისად ჭამონ შენს კარიბჭეებთან.

¹³და თქვი უფლის, შენი ღმერთის, წინაშე: „გავიტანე სახლიდან წმიდა წილი და კიდეც მივეცი იგი ლევიანსა და ხიზანს, ობოლსა და ქვრივს, ყოველივე იმ შენი ბრძანებებისამებრ, რომელნიც მამცნე. არ გადამიხვევია შენი მცნებებიდან და არ დამვიწყნია.

¹⁴არ მიჭამია ჩემი მწუხარებისას და არ გამომიყვია იგი გაუწმედურებისას, და მკვდრისთვის არ გამიცია. ვისმინე უფლის, ჩემი ღმერთის, ხმა და შევასრულე ყოველივე, რაც მიბრძანე.

¹⁵გადმოიხედე შენი წმიდა სავანიდან, ზეციდან, და აკურთხე შენი ერი, ისრაელი, და მიწა, რომელიც ჩვენ მოგვეცი, როგორც შეჰფიცე ჩვენს მამებს, ქვეყანა, სადაც მოედინება რძე და თაფლი.“

¹⁶ამ დღეს გიბრძანებს უფალი, შენი ღმერთი, ამ წესებისა და სამართლის აღსრულებას. დაიცავი და შეასრულე ისინი მთელი შენი გულითა და მთელი შენი სულით.

¹⁷დღეს შენ აღიარე უფლის წინაშე, რომ შენი ღმერთია იგი, რომ ივლი მისი გზებით და დაიცავ მის წესებსა და მის მცნებებს, და მის სამართალს, და ყურად იღებ მის ხმას.

¹⁸და უფალმა აღგითქვა შენ დღეს, რომ შენ იქნები მისი რჩეული ერი, როგორც გელაპარაკა შენ, თუკი დაიცავ ყველა მის მცნებას,

¹⁹და რომ აგამაღლებს თავის გაჩენილ ყველა ხალხზე მეტი დიდებით, სახელითა და პატივით, რათა იყო წმიდა ერი უფლისთვის, შენი ღმერთისთვის, როგორც მან თქვა.