Read სბს–2013 მეორე რჯული 27 Bible Online

მეორე რჯული 27 - სბს–2013 bible

მეორე რჯული 27

¹და უბრძანეს მოსემ და უხუცესებმა ისრაელიანთ: „დაიცავით ყოველი მცნება, რომელსაც მე გიბრძანებთ დღეს.

²და იმ დღეს, როდესაც გადახვალთ იორდანეზე, იმ ქვეყანაში, რომელსაც უფალი, თქვენი ღმერთი გაძლევთ, აღმართეთ დიდი ლოდები, კირით შეათეთრეთ,

³და ზედ დააწერეთ ყოველი სიტყვა ამ რჯულისა, როგორც კი გადახვალთ იორდანეზე, იმ ქვეყანაში შესასვლელად, რომელსაც უფალი, თქვენი ღმერთი გაძლევთ, სადაც მოედინება რძე და თაფლი, როგორც თქვა უფალმა, თქვენი მამების ღმერთმა.

⁴და როცა გადახვალთ იორდანეზე, დადგით ღებალის მთაზე ის ლოდები, რომლებზეც მე გიცხადებთ დღეს, და კირით შეათეთრეთ ისინი.

⁵და აუგე იქ საკურთხეველი უფალს, შენს ღმერთს, ქვის საკურთხეველი, კვერი არ მიაკარო ქვას.

⁶მთლიანი ქვებით ააგე უფლის, შენი ღმერთის, საკურთხეველი და აღუვლინე მასზე სრულადდასაწველები უფალს, შენს ღმერთს.

⁷და შესწირე სამშვიდობო მსხვერპლები, და ჭამე იქ, და გაიხარე უფლის, შენი ღმერთის წინაშე.

⁸და დაწერე ქვებზე ამ რჯულის ყველა სიტყვა გარკვევით.“

⁹და უთხრეს მოსემ და ლევიანმა მღვდლებმა მთელ ისრაელს: „გაიგონე და ისმინე, ისრაელ! დღეს გახდი შენ უფლის, შენი ღმერთის, ერი.

¹⁰და ისმინე უფლის, შენი ღმერთის, ხმა და შეასრულე მისი მცნებანი და მისი წესები, რომელთაც მე დღეს გიცხადებ.“

¹¹და უბრძანა მოსემ ხალხს იმ დღეს და უთხრა:

¹²„ესენი იდგნენ გერიზიმის მთაზე ხალხის საკურთხებლად, როცა გადახვალ იორდანეს: სიმეონი, ლევი, იუდა, ისაქარი, იოსები და ბენიამინი.

¹³და ესენი იდგნენ ღებალის მთაზე დასაწყევლად: რეუბენი, გადი, აშერი, ზებულუნი, დანი და ნაფთალი.

¹⁴და ლევიანები ეტყვიან მთელს ისრაელს ხმამაღლა:

¹⁵‘წყეულიმც იყოს კაცი, რომელმაც გააკეთოს ქანდაკი ან ჩამოსხმული კერპი, სისაძაგლე უფლისათვის, ოსტატის ხელით ნაკეთები, და დადგას ფარულად!’ და მიუგებს მთელი ერი და იტყვის: ‘ამინ!’

¹⁶‘წყეულიმც იყოს მაგინებელი თავისი მამისა და დედისა!’ და იტყვის მთელი ერი: ‘ამინ!’

¹⁷‘წყეულიმც იყოს, ვინც მოყვასის მიჯნა გადასწიოს!’ და იტყვის მთელი ერი: ‘ამინ!’

¹⁸‘წყეულიმც იყოს, ვინც ბრმას აურიოს კვალი!’ და იტყვის მთელი ერი: ‘ამინ!’

¹⁹‘წყეულიმც იყოს, ვინც სამართალი გაუმრუდოს ხიზანსა და ქვრივ-ობოლს!’ და იტყვის მთელი ერი: ‘ამინ!’

²⁰‘წყეულიმც იყოს, ვინც თავისი მამის ცოლთან დაწვეს, რადგან კალთა გადაუწია მამას.’ და იტყვის მთელი ერი: ‘ამინ!’

²¹‘წყეულიმც იყოს, ვინც პირუტყვთან დაეცეს!’ და იტყვის მთელი ერი: ‘ამინ!’

²²‘წყეულიმც იყოს, ვინც თავის დასთან ან თავისი მამის ასულთან, ან თავისი დედის ასულთან დაწვეს!’ და იტყვის მთელი ერი: ‘ამინ!’

²³‘წყეულიმც იყოს, ვინც თავის სიდედრთან დაწვეს!’ და იტყვის მთელი ერი: ‘ამინ!’

²⁴‘წყეულიმც იყოს თავისი მოყვასის ფარულად მკვლელი!’ და იტყვის მთელი ერი: ‘ამინ!’

²⁵‘წყეულიმც იყოს, ვინც ქრთამი აიღოს კაცის მოსაკლავად და უცოდველი სისხლის დასაღვრელად!’ და იტყვის მთელი ერი: ‘ამინ!’

²⁶‘წყეულიმც იყოს, ვინც გატეხს რჯულის ამ სიტყვებს და არ შეასრულებს მათ!’ და იტყვის მთელი ერი: ‘ამინ!’