Read სბს–2013 მეორე რჯული 31 Bible Online

მეორე რჯული 31 - სბს–2013 bible

მეორე რჯული 31

¹და წავიდა მოსე და ელაპარაკა ეს სიტყვები მთელ ისრაელს,

²და უთხრა მათ: „120 წლისა ვარ მე დღეს. აღარ შემიძლია გამოსვლა და შესვლა. და უფალმა მითხრა: ვერ გადახვალო შენ იორდანეზე.

³თქვენ თავად უფალი, თქვენი ღმერთი, გაგიძღვებათ წინ. ის გაანადგურებს იქ მცხოვრებ ხალხებს თქვენს წინაშე და დაგამკვიდრებთ იმ მიწაზე. იესო წაგიძღვებათ თქვენ, როგორც უფალმა თქვა.

⁴და ისევე მოექცევა უფალი იმ ხალხებს, როგორც მოექცა სიხონსა და ყოგს – ამორეველთა მეფეებს – და მათ ქვეყანას, სადაც გაწყვიტა ისინი.

⁵და თქვენს ხელში ჩაყრის მათ უფალი, და თქვენ მოექეცით მათ ისე, როგორც მე გაუწყეთ.

⁶გამაგრდით და განმტკიცდით, ნუ შეგეშინდებათ და ნუ შეძრწუნდებით მათ წინაშე, რადგან თავად უფალი, თქვენი ღმერთი, მოდის თქვენთან ერთად. ის არ დაგაგდებთ და არ მიგატოვებთ.“

⁷და მოუხმო მოსემ იესოს და უთხრა მთელი ისრაელის წინაშე: „გამაგრდი და განმტკიცდი, რადგან შენ შეიყვან ამ ხალხს იმ ქვეყანაში, რომლის მიცემაც ფიცით აღუთქვა უფალმა მათ მამებს, და შენ დაუმკვიდრებ მათ იმ მიწას.

⁸თავად უფალი წაგიძღვება შენ, იგი იქნება შენთან, არ დაგაგდებს და არ მიგატოვებს. ნუ შეგეშინდება და ნუ შედრკები.“

⁹და დაწერა მოსემ ეს რჯული და მისცა იგი ლევიან მღვდლებს, რომლთაც უფლის აღთქმის კიდობნის ტარება ევალებოდათ, და – ისრაელის ყველა უხუცესს.

¹⁰და უბრძანა მოსემ მათ ასე: „მეშვიდე წელს, მიტევების წელიწადს, კარვობის დღესასწაულზე,

¹¹როცა მთელი ისრაელი გამოცხადდება უფლის, თქვენი ღმერთის, წინაშე იმ ადგილას, რომელსაც უფალი ამოირჩევს, წაიკითხეთ ეს რჯული მთელი ისრაელის წინაშე მათ გასაგონად.

¹²შეკრიბე ხალხი: კაცები, ქალები და ბავშვები, და ხიზნები, რომლებიც შენს კარიბჭეებში არიან, რომ გაიგონონ და ისწავლონ, და ეშინოდეთ უფლისა, შენი ღმერთისა, და შეასრულონ და დაიცვან ამ რჯულის ყოველი სიტყვა.

¹³და მათმა შვილებმა, რომლებმაც ჯერ კიდევ არ იციან ეს, გაიგონ და ისწავლონ, რომ ეშინოდეთ უფლისა, თქვენი ღმერთისა, დღენიადაგ, სანამ იცოცხლებთ მიწაზე, რომლის დასამკვიდრებლადაც გადადიხართ იორდანეზე.“

¹⁴და უთხრა უფალმა მოსეს: „აჰა, მოახლოვდა შენი სიკვდილის ჟამი. მოუხმე იესოს და დადექით საკრებულო კარავთან, და მე დავარიგებ მას.“ და წავიდნენ მოსე და იესო და დადგნენ საკრებულო კარავთან.

¹⁵და გამოეცხადა უფალი მათ კარავში, როგორც ღრუბლის სვეტი, და დადგა კარვის შესასვლელთან.

¹⁶და უთხრა უფალმა მოსეს: „აჰა, შენ მალე მიიძინებ შენს მამებთან, ეს ხალხი კი ადგება და სამეძაოდ აეკიდება იმ ქვეყნის უცხო ღმერთებს, რომელშიც ის შედის, და მე მიმატოვებს, და დაარღვევს ჩემს აღთქმას, რომელიც დავუდე მას.

¹⁷და აღიგზნება ჩემი რისხვა მასზე იმ დღეს, და მივატოვებ და დავუმალავ ჩემს სახეს, შთაინთქმება ის და შეემთხვევა მრავალი უბედურება და გაჭირვება. და იტყვის იმ დღეს: იმიტომ ხომ არ შემემთხვა ეს უბედურება, რომ ღმერთი არ არის ჩემშიო?

¹⁸და მე დავუმალავ ჩემს სახეს იმ დღეს ყველა იმ ბოროტების გამო, რომელსაც იზამენ, სხვა ღმერთებისკენ პირმიქცეულნი.

¹⁹და ახლა ჩაიწერეთ ეს გალობა, და ასწავლეთ ისრაელიანთ იგი, ჩაუდევი მათ ბაგეებში, რომ მემოწმებოდეს ეს სიმღერა ისრაელიანებთან,

²⁰რადგან მე მათ შევიყვან იმ ქვეყანაში, რომელიც ფიცით აღვუთქვი მათ მამებს, სადაც მოედინება რძე და თაფლი, და შეჭამენ ისინი და გაძღებიან და გასუქდებიან, და მიბრუნდებიან სხვა ღმერთებისკენ, და მათ მოემსახურებიან, და განმარისხებენ, და ჩემს აღთქმას დაარღვევენ.

²¹და, როცა შეემთხვევათ მათ მრავალი უბედურება და გაჭირვება, ეს სიმღერა მოწმედ იქნება მათ წინაშე, რადგან არ წაიშლება იგი მათი შთამომავლობის ბაგიდან; მე ვიცი მათი ზრახვა, რომელსაც ისინი განიზრახავენ დღეს, სანამ შევიყვანდე იმ ქვეყანაში, რომელიც ფიცით აღვუთქვი.“

²²და ჩაწერა მოსემ ეს სიმღერა იმ დღეს და შეასწავლა იგი ისრაელის ძეთ.

²³და უბრძანა უფალმა იესო ნავეს ძეს და უთხრა: „გამაგრდი და განმტკიცდი, რადგან შენ შეიყვან ისრაელის ძეთ იმ ქვეყანაში, რომელიც მე მათ ფიცით აღვუთქვი, და მე ვიქნები შენთან.“

²⁴და როცა დაასრულა მოსემ ამ რჯულის სიტყვების ჩაწერა გრაგნილში,

²⁵ასე უბრძანა ლევიანებს, უფლის აღთქმის კიდობნის მტვირთველთ:

²⁶„აიღეთ ეს რჯულის გრაგნილი და დადეთ იგი უფლის, თქვენი ღმერთის, აღთქმის კიდობნის გვერდით, და იყოს იქ მოწმედ თქვენს წინააღმდეგ.

²⁷რადგან მე ვიცი თქვენი ურჩობა და თქვენი სიჯიუტე: და აჰა, როცა მე ვცხოვრობ თქვენთან დღეს, ეურჩებით უფალს, და რაღას იზამთ ჩემი სიკვდილის შემდეგ?

²⁸შემიკრიბეთ თქვენი ტომების ყველა უხუცესი და თქვენი ზედამხედველნი და მე ვიტყვი მათ გასაგონად ამ სიტყვებს, და მათ წინააღმდეგ მოწმედ მოვიყვან ცასა და მიწას.

²⁹მე ვიცი, რომ ჩემი სიკვდილის შემდეგ გაირყვნებით და გადაუხვევთ იმ გზიდან, რომელიც მე გიბრძანეთ. და შეგემთხვევათ უბედურება მომავალ დღეებში, რადგან ბოროტებას ჩაიდენთ უფლის თვალწინ და განარისხებთ მას თქვენი ხელის ნამოქმედარით.“

³⁰და წარმოთქვა მოსემ ისრაელის მთელი კრებულის გასაგონად ამ სიმღერის სიტყვები ბოლომდე: