Read სბს–2013 მეორე რჯული 33 Bible Online

მეორე რჯული 33 - სბს–2013 bible

მეორე რჯული 33

¹ეს არის კურთხევა, რომლითაც აკურთხა მოსემ, ღვთისკაცმა, ისრაელიანები თავისი სიკვდილის წინ.

²მან თქვა: „უფალი სინაიდან მოვიდა, სეყირიდან ამოუბრწყინდა მათ, ფარანის მთიდან ამონათდა და გამოჩნდა წმიდათა ბევრეულით, მარჯვენით რჯულის შარავანდი ჰქონდა.

³უყვარს უფალს თავისი ხალხი! ყოველი წმიდა შენს ხელშია, უფალო, ყველა ისინი შენს ფეხებთან ტრიალებენ და ასრულებენ შენს ბრძანებებს.

⁴რჯული მოსემ მოგვცა, უძღვნა იგი იაკობის კრებულს.

⁵და დადგა მეფე იეშურუნის სათავეში, როცა შეიკრიბნენ ხალხის თავკაცნი, როცა ისრაელის ტომები შეიკრიბნენ.

⁶იცოცხლოს რეუბენმა და ნუ მოკვდება; და იყოს მისი ხალხი რიცხვმრავალი!

⁷და ეს თქვა იუდაზე: ‘ისმინე, უფალო, იუდას ხმა და მიიყვანე თავის ხალხთან იგი. მისი ხელი იბრძოლებს მისთვის და მტერთაგან შემწედ შენ ეყოლები.’

⁸და ლევიზე თქვა: ‘შენი თუმიმი და ურიმი დარჩეს შენს წმიდა კაცთან, რომელიც მასაში გამოსცადე, და ედავე – მერიბას წყლებთან,

⁹რომელიც ამბობს თავის მამასა და დედაზე: მე ისინი არ მინახავსო, ხოლო თავის ძმებზე: მე მათ არ ვიცნობო, და თავის ძეზე, ლევიანებზე: მე მისი არაფერი ვიციო. რადგან ისინი იცავენ შენს ნათქვამს და ინახავენ შენს აღთქმას,

¹⁰ასწავლიან შენს კანონებს იაკობს და შენს რჯულს აუწყებენ ისრაელს, საკმეველს დებენ შენს წინაშე და სრულადდასაწველს – შენს საკურთხეველზე.

¹¹აკურთხე, უფალო, მისი ძალა, და კეთილად მოხედე მისი ხელის ნაღვაწს. წელი მოსწყვიტე მის მოწინააღმდეგეებსა და მოძულეებს, რომ ფეხზე ვეღარ დადგნენ.’

¹²და ბენიამინზე თქვა: ‘უფლის საყვარელი უშიშრად ცხოვრობს! უფალი მფარველობს მას დღენიადაგ, და იგი დავანებულია უფლის ბეჭთა შორის.’

¹³და იოსებზე თქვა: ‘უფალმა აკურთხა მისი მიწა მაღლით ცის მადლიანი ძღვენით – ნამით – და ძირს განრთხმული უფსკრულების ძღვენით,

¹⁴მზისგან მოცემული მადლიანი მოსავლითა და მთვარის მადლიანი ნაყოფით,

¹⁵და ძველი მთების პირველნაყოფით, და საუკუნო ბორცვების მადლით,

¹⁶და მიწის მადლით და მისი სისავსით. მაყვლოვანში დავანებულის წყალობა გადმოვიდეს იოსების თავზე და მის ძმათა შორის გამორჩეულის კეფაზე.

¹⁷მას პირველნაშობი კუროს ბრწყინვალება აქვს, რქანი მისნი, რქა გარეული ხარისა; მით დარქენს ის ხალხებს მთელი ქვეყნის კიდემდე, რომლებიც არიან ათიათასები ეფრემისა და ათასეულები მანაშესი.’

¹⁸და ზებულუნზე თქვა: ‘იხარე, ზებულუნ, შენი გამოსვლისას; და, ისაქარ, იხარე შენს კარვებში!

¹⁹და მოიწვევენ მთაზე ხალხებს, იქ შესწირავენ სამართლის მსხვერპლს, რადგან ისინი ზღვათა სიუხვით საზრდოობენ და ქვიშაში დამარხული საგანძურებით.’

²⁰და გადზე თქვა: ‘კურთხეულია გადის განმვრცობი, ლომივით წევს და ბდღვნის ნადავლის თავ-ფეხს.

²¹და აირჩია თავისთვის საუკეთესო წილი, რადგან იქ იყო გადანახული რჯულმდებლის წილი. მოვიდა იგი ხალხის თავკაცებთან ერთად და აღუსრულა უფლის წესი და მისი სამართალი ისრაელს.’

²²და დანზე თქვა: ‘დანი ლომის ბოკვერია, ბაშანის მთებიდან გამოვარდნილი.’

²³და ნაფთალზე თქვა: ‘ნაფთალი მაძღარია წყალობით და სავსეა უფლის კურთხევით. დასავლეთით და სამხრეთით დაემკვიდრება.’

²⁴და აშერზე თქვა: ‘კურთხეულია შვილთა შორის აშერი. თავისი ძმების სასურველი იქნება, დაე, ტერფები წმინდა ზეთში ჩადგას.

²⁵რკინისა და ბრინჯაოსა იქნება შენი კარიბჭის ურდულები; სიბერე შენი იქნება ვითარცა სიჭაბუკე შენი.’

²⁶არ არის იეშურუნის ღმერთის სადარი, რომელიც ზეცაშია ამხედრებული შენს შემწედ და ღრუბლებში – თავისი დიდებით.

²⁷შენი თავშესაფარია ძველი ღმერთი, და მკლავი მარადიულისა საყრდენია შენი. მტრებს განდევნის შენი პირისგან და გეტყვის: მუსრი გაავლეო!

²⁸უშფოთველად ცხოვრობს ისრაელი, მარტო ცხოვრობს იაკობი პურისა და ღვინის ქვეყანაში; ცვარს აფრქვევს მისი ზეცა.

²⁹ბედი გქონია, ისრაელ! ვინ შეგედრება შენ, ერო, უფლის მიერ დაცულო, რომელიც შენი შეწევნის ფარია, და შენი დიდების მახვილი! შენი მტრები დაგემონებიან, და შენ ფეხით გადაჯეგავ მათი თაყვანისცემის გორაკებს.“