Read სბს–2013 მეორე რჯული 5 Bible Online

მეორე რჯული 5 - სბს–2013 bible

მეორე რჯული 5

¹და მოუწოდა მოსემ მთელს ისრაელს და უთხრა მათ: ისმინე, ისრაელ, წესები და კანონები, რომელთაც მე ვიტყვი დღეს თქვენს გასაგონად. დაისწავლეთ ისინი და ეცადეთ მათი შესრულება.

²უფალმა, ჩვენმა ღმერთმა, დაგვიდო აღთქმა ხორების მთაზე.

³ჩვენს მამებთან კი არ დადო უფალმა ეს აღთქმა, არამედ ჩვენთან, ყველა ჩვენგანთან, ვინც აქ ცოცხლები ვართ დღეს.

⁴პირისპირ გელაპარაკებოდათ უფალი მთაზე ცეცხლის შუაგულიდან.

⁵მე კი ვიდექი უფალსა და თქვენს შორის იმ დროს, რათა მეუწყებინა თქვენთვის სიტყვა უფლისა, რადგან გეშინოდათ ცეცხლისა და არ ასულხართ მთაზე. და მან მითხრა მე:

⁶„მე ვარ უფალი, შენი ღმერთი, რომელმაც გამოგიყვანე ეგვიპტის ქვეყნიდან, მონობის სახლიდან:

⁷ნუ იყოლიებ სხვა ღმერთებს ჩემს გარდა.

⁸ნუ გაიკეთებ კერპებს და ნურც რაიმე სხვა მსგავსებას იმისა, რაც მაღლა ცაშია, რაც დაბლა მიწაზეა, და რაც წყალშია მიწის სიღრმეში.

⁹თაყვანი არ სცე მათ და არც ემსახურო, რადგან მე ვარ უფალი, შენი ღმერთი, ღმერთი შურისმგებელი, რომელიც მამათა ცოდვებს შვილებს მოვკითხავ, ჩემი მტრების მესამე და მეოთხე თაობამდე,

¹⁰და ჩემს მოყვარულ და ჩემი მცნებების დამცველ ათასეულ თაობათა მწყალობელი.

¹¹ნუ ახსენებ უფლის, შენი ღმერთის, სახელს ამაოდ, რადგან დაუსჯელი არ გადაურჩება უფალს მისი სახელის ფუჭად მახსენებელი.

¹²დაიცავი შაბათის უქმე, რათა წმიდად შეინახო იგი, როგორც გიბრძანა უფალმა, შენმა ღმერთმა.

¹³ექვსი დღე იმუშავე და აკეთე ყოველგვარი საქმე,

¹⁴ხოლო მეშვიდე დღე – უფლის, შენი ღმერთის, შაბათია, ამ დღეს არა საქმე არ აკეთოთ, არც შენ, არც შენმა ძემ, არც შენმა ასულმა, არც შენმა მსახურმა, არც შენმა მხევალმა, არც შენმა ხარმა, არც შენმა სახედარმა, არც შენმა პირუტყვმა, არც შენმა ხიზანმა, რომელიც შენს კარზეა, რათა შენსავით დაისვენოს შენმა მსახურმა და შენმა მხევალმა.

¹⁵გახსოვდეს, რომ მონა იყავი ეგვიპტელთა ქვეყანაში, და გამოგიყვანა უფალმა, შენმა ღმერთმა, იქიდან ძლიერი ხელით და აღმართული მკლავით. ამისათვის გიბრძანა შენ უფალმა, შენმა ღმერთმა, რომ დაიცვა შაბათი დღე.

¹⁶პატივი ეცი მამასა შენსა და დედასა შენსა, როგორც გიბრძანა შენ უფალმა, შენმა ღმერთმა, რათა დღეგრძელი იყო და კარგად იყო იმ მიწაზე, რომელსაც უფალი, შენი ღმერთი, გაძლევს.

¹⁷არა კლა.

¹⁸არ იმრუშო.

¹⁹არ იპარო.

²⁰ცრუ მოწმედ არ დადგე შენი მოძმის წინააღმდეგ.

²¹არ ისურვო შენი მოყვასის ცოლი, არ ისურვო შენი მოყვასის სახლი, არც მისი ყანა, არც მისი მსახური, არც მისი მხევალი, არც მისი ხარი, არც მისი სახედარი და არაფერი, რაც შენი მოყვასისაა.“

²²ეს სიტყვები უთხრა უფალმა მთელ თქვენს კრებულს მთაზე, ცეცხლის, ღრუბლისა და კუნაპატი სიბნელიდან დიდი ხმით, და სხვა მეტი არაფერი დაუმატებია ამ სიტყვებისთვის. და დაწერა ისინი ქვის ორ დაფაზე, და მომცა მე.

²³და როცა მოისმინეთ ხმა სიბნელიდან, და მთა ცეცხლში იწვოდა, მაშინ მოხვედით ჩემთან ახლოს თქვენი ტომების მთავრები და თქვენი ერის უხუცესები

²⁴და მითხარით: „აჰა, გვიჩვენა ჩვენ უფალმა, ჩვენმა ღმერთმა, თავისი დიდება და თავისი სიდიადე, და მისი ხმა მოგვესმა ცეცხლის შუაგულიდან. იმ დღეს ვიხილეთ, რომ ღმერთი ელაპარაკა ადამიანს და ადამიანი ცოცხალი გადარჩა.

²⁵და ახლა რიღისთვის დავიხოცოთ? ხომ გვშთანთქავს ეს დიდი ცეცხლი! თუ ჩვენ კვლავ მოვისმენთ უფლის, ჩვენი ღმერთის, ხმას, მაშინვე დავიხოცებით.

²⁶რადგან რომელ ხორციელს შეუძლია, რომ მოისმინოს ცეცხლის შუაგულიდან მოლაპარაკე ღმერთის ხმა და ჩვენსავით ცოცხალი გადარჩეს?

²⁷შენ მიდი და მოისმინე, რას იტყვის უფალი, ჩვენი ღმერთი, და შემდეგ მოგვიყევი ჩვენ ყველაფერი, რასაც გეტყვის უფალი, ჩვენი ღმერთი. ჩვენ კი მოგისმენთ და შევასრულებთ.“

²⁸ისმინა უფალმა თქვენი ლაპარაკის ხმა, მე რომ მელაპარაკებოდით, და მითხრა: „ვისმინე ამ ხალხის ლაპარაკის ხმა, შენ რომ გელაპარაკებოდნენ. ყველაფერი სწორია, რაც შენ გელაპარაკნენ.

²⁹ნეტავ ისეთი გული ჰქონოდათ, რომ შინებოდათ ჩემი და დაეცვათ ყველა ჩემი მცნება ყოველთვის, რათა კარგად ყოფილიყვნენ ისინი და მათი ძენი უკუნისამდე.

³⁰წადი, უთხარი მათ, დაბრუნდნენ თავ-თავიანთ კარვებში.

³¹ხოლო შენ აქ დადექი ჩემთან, და მე გეტყვი ყველა მცნებას, წესებს და კანონებს, რაც უნდა ასწავლო მათ, რათა შეასრულონ იმ ქვეყანაში, რომელსაც მე დასამკვიდრებლად ვაძლევ მათ.“

³²ისე უნდა დაიცვათ შესასრულებლად, როგორც უფალმა, თქვენმა ღმერთმა, გიბრძანათ. ნუ გადაუხვევთ ნურც მარჯვნივ და ნურც მარცხნივ.

³³იარეთ ყველა იმ გზით, რომელიც გამცნოთ თქვენმა ღმერთმა, რათა იცოცხლოთ და კარგად იყოთ, და დღეგრძელნი იყოთ იმ ქვეყანაში, რომელსაც დაეუფლებით.