Read სბს–2013 მეორე რჯული 7 Bible Online

მეორე რჯული 7 - სბს–2013 bible

მეორე რჯული 7

¹როცა მიგიყვანს უფალი, შენი ღმერთი, იმ ქვეყანაში, რომლის დასამკვიდრებლადაც მიდიხარ და განდევნის მრავალრიცხოვან ხალხებს იქიდან – ხეთელებს და გირგაშელებს, ამორეველებსა და ქანაანელებს, ფერიზელებს, ხიველებს და იებუსელებს – შვიდ ხალხს, შენზე მრავალრიცხოვანსა და ძლიერს,

²და ხელში ჩაგაგდებინებს მათ უფალი, შენი ღმერთი, და დაამარცხებ მათ, დაარისხე ისინი, არ შეკრა მათთან კავშირი და არც დაინდო.

³არ დაუმოყვრდე მათ, შენი ასული არ მისცე მის ძეს და მისი ასული არ მოუყვანო შენს ძეს ცოლად;

⁴რადგან განაშორებენ შენს ძეს ჩემგან, და მსახურებას დაუწყებენ უცხო ღმერთებს, და აღიგზნება რისხვა უფლისა თქვენზე და სწრაფად გაგანადგურებთ.

⁵არამედ ასე მოექეცით მათ: დაანგრიეთ მათი სამსხვერპლოები და მათი ძეგლები დაამსხვრიეთ, მათი აშერები აკაფეთ, და მათი ქანდაკებები დაწვით ცეცხლში.

⁶რადგან წმიდა ხალხი ხარ შენ უფლის, შენი ღმერთისათვის. შენ ამოგირჩია უფალმა, შენმა ღმერთმა, რომ იყო მისთვის უნჯ ხალხად ყველა ხალხთაგან, რომელნიც დედამიწის ზურგზე არიან.

⁷მრავალრიცხოვნების გამო ვერ ამოგირჩევდათ თქვენ უფალი – თქვენ ხომ ყველა სხვა ხალხებზე მცირერიცხოვანი ხართ,

⁸არამედ, თქვენდამი მისი სიყვარულის გამო ამოგირჩიათ, და კიდევ იმისათვის, რომ დაეცვა ფიცი, რომელიც შეჰფიცა თქვენს მამებს, – აი ამიტომ გამოგიყვანათ უფალმა ძლიერი ხელით და გიხსნათ მონობის სახლიდან, ეგვიპტის მეფის, ფარაონის, ხელიდან.

⁹იცოდე, რომ უფალი, შენი ღმერთი, არის ღმერთი, ერთგული ღმერთი, რომელიც იცავს აღთქმას და წყალობას მის მოყვარულთათვის და მის მცნებათა დამცველთათვის ათას თაობამდე.

¹⁰და მიაგებს მის მოძულეებს მისაგებელს მათ დასაღუპად. არ დააგვიანებს, თავის მოძულეს პირადად მიუზღავს.

¹¹მაშ დაიცავი მცნებები, წესები და კანონები, რომელთაც მე გაუწყებ დღეს შესასრულებლად.

¹²და თუ შეისმენთ ამ სამართალს და დაიცავთ და შეასრულებთ, უფალი, შენი ღმერთი, შეგინახავს აღთქმას და წყალობას, რაც შეჰფიცა შენს მამებს.

¹³და შეგიყვარებს, და გაკურთხებს, და გაგამრავლებს, და გიკურთხებს მუცლის ნაყოფს და მიწის ნაყოფს, მარცვლეულს და ღვინოს, და ზეთს; ცხვარ-ძროხის ნამატს იმ ქვეყანაში, რომელიც შენთვის მოსაცემად აღუთქვა შენს მამებს.

¹⁴კურთხეული იქნები ყველა ხალხზე მეტად. თქვენში არ იქნება უნაყოფო, და არც თქვენს პირუტყვში – ბერწი.

¹⁵და აგაშორებს უფალი ყოველგვარ სატკივარს. არ შეგყრის ეგვიპტის საშინელ სნებებს, რაც ნანახი გაქვს და იცი, შენს მოძულეებს კი გაუჩენს.

¹⁶და მოსპობ ყველა ხალხებს, რომელთაც უფალი, შენი ღმერთი, გაძლევს. არ დაინდოს შენმა თვალმა ისინი. და არ ემსახურო მათ ღმერთებს, რადგან მახე იქნება ეს შენთვის.

¹⁷თუ გონებაში გაგივლის: ჩვენზე მრავალრიცხოვანი არიან ეს ხალხები და როგორ შევძლებთ მათ განდევნასო?

¹⁸ნუ შეუშინდები მათ. გაიხსენე, რა უყო უფალმა, შენმა ღმერთმა ფარაონსა და მთელ ეგვიპტეს,

¹⁹გაიხსენე ის დიდი განსაცდელები, რაც იხილეს შენმა თვალებმა, და ნიშნები და სასწაულები, და ძლიერი ხელი და აღმართული მკლავი, რომლითაც გამოგიყვანა შენ უფალმა, შენმა ღმერთმა, იგივეს გაუკეთებს უფალი, შენი ღმერთი, ყველა ხალხებს, რომლისაც გეშინია.

²⁰კრაზანასაც მიუსევს უფალი, შენი ღმერთი, ვიდრე არ გაანადგურებს მათ, ვინც შენ გადაგირჩა და დაგემალა.

²¹ნუ უფრთხი მათ, რადგან უფალი, შენი ღმერთი, შენთან არის, დიადი და მრისხანე ღმერთი.

²²თანდათანობით განდევნის უფალი, შენი ღმერთი ამ ხალხებს შენგან. შენ არ მოგეცა მათი სწრაფად მოსპობის ხელმწიფება, რათა არ აოხრდეს ის ქვეყანა და არ მოზვავდეს ველის ნადირი.

²³და დაყრის მათ უფალი, შენი ღმერთი, და შეარყევს მათ დიდი შერყევით, ვიდრე ერთიანად არ განადგურდებიან.

²⁴და ხელში ჩაგიგდებს მათ მეფეებს, და მოსპობ მათ სახელს ცისქვეშეთიდან. წინ ვერავინ დაგიდგება, ვიდრე არ გადააშენებ მათ.

²⁵ცეცხლში დაწვი მათი ღმერთების ქანდაკებები. ნუ ისურვებ წასაღებად, ვერცხლსა და ოქროს, ზედ რომ აკრავთ, რათა მახედ არ გექცეს, რადგან ეს სისაძაგლეა უფლის, შენი ღმერთისათვის.

²⁶და ნუ შეიტან სისაძაგლეებს შენს სახლში, რომ შენც მასავით დარისხებული არ გახდე. შეიძულე და შეიზიზღე, რადგან დარისხებულია იგი.